Chaču pasłać jasny sihnał Pucinu: stomy nie budzie, nie damo zrabić Ukrainu druhoj Biełaruśsiu — Barel
Vysoki pradstaŭnik ES u pytańniach zamiežnaj palityki i palityki biaśpieki Žazep Barel padkreśliŭ, što členy Jeŭrasajuza pradoŭžać padtrymku Ukrainy ŭ vajnie z Rasijaj nasupierak śpiekulacyjam ab mahčymaj «stomlenaści». Pra heta Barel zajaviŭ pavodle vynikaŭ niefarmalnaj sustrečy ministraŭ zamiežnych spraŭ dziaržaŭ ES u Stakholmie ŭ piatnicu, paviedamlaje «Jeŭrapiejskaja praŭda».
Top-dypłamat Jeŭrasajuza padkreśliŭ, što za 15 miesiacaŭ vajny Rasija nie admoviłasia ad namieru «padparadkavać» Ukrainu i praciahvać jaje źniščać. Tamu važna zabiaśpiečyć doŭhaterminovyja instrumienty padtrymki Kijeva ŭ dadatak da karotkaterminovych, jakija isnujuć u ciapierašni čas.
«I ja chaču pasłać vyrazny sihnał Pucinu: niama i nie budzie nijakaj stomlenaści. My budziem praciahvać padtrymlivać Ukrainu stolki, kolki joj treba, i stolki, kolki spatrebicca», — skazaŭ Barel.
Jon padkreśliŭ, što ŭ ciapierašniaj situacyi Ukraina nie moža admovicca ad baraćby, bo heta pastaviła b pad pahrozu jaje isnavańnie jak nacyi, zatoje Rasija nie choča hetaha zrabić.
«Mnohija ludzi kažuć, što chočuć miru. My chočam. I tyja, chto choča miru bolš, čym chto-niebudź inšy, — heta ŭkraincy. Ukraincy chočuć miru. My chočam miru. Ale my nie chočam kapitulacyi. My nie chočam, kab Ukraina stała druhoj Biełaruśsiu», — padkreśliŭ top-dypłamat ES.
Raniej Barel zajaviŭ, što Piekin, choć i zastajecca važnym partnioram Brusiela, užo straciŭ mahčymaść być pasrednikam u raźviazanaj Rasijaj vajnie.
Kamientary