Abmiežavali vyjezd z krainy dla «palityčnych», čynoŭnikaŭ i siłavikoŭ

Zabarona dla «palityčnych administratyŭščykaŭ» i z dazvołu KDB

KDB zmoža abmiežavać vyjezd nie tolki tym, chto znachodzicca na prafiłaktyčnym uliku ŭ orhanach dziaržaŭnaj biaśpieki, ale i tym, čyj «vyjezd supiarečyć intaresam nacyjanalnaj biaśpieki Respubliki Biełaruś». Zabarona moža ŭvodzicca na termin da paŭhoda. Jakija hramadzianie i na jakich padstavach buduć traplać u hetuju katehoryju — nie paviedamlajecca.

Vyjezd taksama zabaroniać tym asobam, «u dačynieńni da jakich viadziecca administracyjny praces za ŭčynieńnie administracyjnych pravaparušeńniaŭ suprać paradku kiravańnia, — u metach zabieśpiačeńnia vykanańnia pastanovy sudździ ab nakładańni administracyjnaha spahnańnia ŭ vyhladzie štrafu».

Raniej abvinavačanych ź Biełarusi taksama nie vypuskali, ale heta tyčyłasia tych, chto ŭžo atrymaŭ štraf i nie apłaciŭ jaho. Ciapier ža vyjezd budzie zabaronieny i tym, u dačynieńni da kaho viadziecca administracyjny praces, a rašeńnie sudom pakul jašče nie pryniataje.

U «pravaparušeńni suprać paradku kiravańnia» ŭvachodziać tak dobra znajomyja biełarusam «palityčnyja» artykuły KaAP: niepadparadkavańnie zakonnamu rasparadžeńniu abo patrabavańniu słužbovaj asoby pry vykanańni joj słužbovych paŭnamoctvaŭ, parušeńnie paradku arhanizacyi abo praviadzieńnia masavych mierapryjemstvaŭ i hetak dalej.

Zabarona dla siłavikoŭ

Vyšejšyja čynoŭniki zmohuć vyjechać za miažu tolki paśla ŭzhadnieńnia z Alaksandram Łukašenkam. A mienavita:

• staršyni abłasnych i Minskaha haradskoha vykanaŭčych kamitetaŭ;
• načalnik Słužby biaśpieki;
• načalnik Apieratyŭna-analityčnaha centra;
• staršynia Kamiteta dziaržaŭnaj biaśpieki,
• ministr unutranych spraŭ;
• ministr zamiežnych spraŭ;
• ministr abarony;
• ministr pa nadzvyčajnych situacyjach;
• staršynia Dziaržaŭnaha pahraničnaha kamiteta;
• staršynia Dziaržaŭnaha mytnaha kamiteta;
• staršynia Śledčaha kamiteta;
• staršynia Dziaržaŭnaha kamiteta sudovych ekśpiertyz;
• načalnik Dziaržaŭnaj inśpiekcyi achovy žyviolnaha i raślinnaha śvietu.

Vyjezd ź Biełarusi «kiraŭnikoŭ dziaržaŭnych orhanaŭ, a taksama kiraŭnikoŭ dziaržaŭnych arhanizacyj i rabotnikaŭ, jakija ažyćciaŭlajuć zabieśpiačeńnie dziejnaści i techničnaje absłuhoŭvańnie dziaržaŭnych orhanaŭ, jakim pradastaŭleny dopusk da dziaržaŭnych sakretaŭ», budzie vyznačacca ŭradam.

U hetym zakonie paznačana, što vyjezd za miažu siłavikoŭ budzie «vyznačacca łakalnym pravavym aktam» adpaviednych viedamstvaŭ. Vierahodna, u ich budzie zamacavanaja norma «pa ŭzhadnieńni z kiraŭnictvam». Heta budzie tyčycca vajskoŭcaŭ, supracoŭnikaŭ, rabotnikaŭ i asob hramadzianskaha piersanału voinskich farmavańniaŭ i vajenizavanych arhanizacyj Biełarusi, a mienavita:

• Uzbrojenych Sił Respubliki Biełaruś;
• orhanaŭ pahraničnaj słužby;
• unutranych vojskaŭ Ministerstva ŭnutranych spraŭ;
• orhanaŭ dziaržaŭnaj biaśpieki;
• transpartnych vojskaŭ;
• Słužby biaśpieki;
• Apieratyŭna-analityčnaha centra;
• orhanaŭ finansavych rasśledavańniaŭ Kamiteta dziaržaŭnaha kantrolu;
• Śledčaha kamiteta;
• Dziaržaŭnaha kamiteta sudovych ekśpiertyz;
• orhanaŭ unutranych spraŭ;
• orhanaŭ i padraździaleńniaŭ pa nadzvyčajnych situacyjach;
• Dziaržaŭnaj inśpiekcyi achovy žyviolnaha i raślinnaha śvietu;
• Dziaržaŭnaj fieldjehierskaj słužby pry Ministerstvie suviazi i infarmatyzacyi.

U zakonie taksama adznačana, što im moža być admoŭlena ŭ vyjeździe z krainy «ŭ metach zabieśpiačeńnia intaresaŭ nacyjanalnaj biaśpieki da spynieńnia abstavinaŭ, jakija pieraškadžajuć ich vyjezdu».

Akramia taho, u vypadku najaŭnaści ŭ hetaj katehoryi asob bijamietryčnaha pašparta na čas słužby jany abaviazanyja pieradać jaho ŭ kadravuju słužbu svajoj arhanizacyi.

Kali ŭvodziacca hetyja zabarony?

Zabarona dla «palityčnych administratyŭščykaŭ» — praz šeść miesiacaŭ paśla aficyjnaha apublikavańnia hetaha zakona.

Inšyja pałažeńni — paśla aficyjnaha apublikavańnia hetaha zakona.

Zakonaprajekt pastupiŭ u parłamient letam minułaha hoda. Dakumient byŭ pryniaty ŭ pieršym čytańni Pałataj pradstaŭnikoŭ u kastryčniku minułaha hoda, a ŭ druhim čytańni — u krasaviku hetaha hoda. Pry hetym u jaho ŭnosili praŭki: naprykład, u śpis tych siłavikoŭ, kamu mohuć admović u vyjeździe za miažu, unieśli jehieraŭ.

Zakonaprajekt uchvalili ŭ Saviecie Respubliki, a paśla jaho padpisaŭ Alaksandr Łukašenka.

• 5
• 0
• 19
• 11
• 5
• 6
• 52
• 0