Jeŭrapiejski Forum: repartaž + foty

18:34

Forum skončyŭ pracu. Praviedzieny jon byŭ na vysokim arhanizacyjnym uzroŭni. Pa jaho vynikach byli pryniata rezalucyja i Prahrama dziejańniaŭ.

Alaksandr Milinkievič u zaklučnym vystupie zaznačyŭ:

«Kali źjavicca čałaviek, jakoha padtrymaje bolšaść apazicyi, u jakoha budzie vydatnaja prahrama i kamanda, ja stanu pobač i budu vykonvać lubuju pracu, jakuju mnie daduć.

Razam z tym kažu, što ja hatovy iści na vybary, bo maju na heta siły i dośvied».

Alaksandr Milinkievič upeŭnieny, što vybary 2011 hoda buduć praściejšymi, čym vybary 2006 hoda, što budzie bolej šancaŭ na pieramohu.

«Nie budzie toj atmaśfiery zapałochvańnia», jakaja była ŭ 2006 h., pierakanany palityk.

Razam z tym, jon kateharyčny praciŭnik bajkotu vybaraŭ.

«Nie ŭdzielničajučy ŭ vybarach, my pazbaŭlajem ludziej dadatkovaj infarmacyi».

Kali my nie pojdziem na vybary, to ŭładzie nie treba navat falsifikavać vybary, tym samym my lehimityzujem uładu».

Milinkievič vykazaŭ spadziavańnie, što na nastupnyja vybary biełaruskaja apazicyja pojdzie adzinaj kałonaj pad łozunhami «Niezaležnaść, demakratyja, jeŭrapiejskaść».

* * *

U Minsku pačaŭsia Biełaruski Jeŭrapiejski Forum – vialiki zbor prychilnikaŭ Alaksandra Milinkieviča.

Forum, u jakim biare ŭdzieł bolš za 1 000 ŭdzielnikaŭ, pačaŭsia a 11-j hadzinie ŭ vialikaj zale DK Minskaha aŭtamabilnaha zavoda, na paŭdniovym uschodzie stalicy.

Zała i bałkony zaniatyja poŭnaściu. Mierapryjemstva pačałosia z vykanańnia himna «Mahutny Boža». Viadzie forum telezorka telekanała «Biełsat» Pavieł Mažejka.

Zała azdoblena bieł-čyrvona-biełymi ściahami, ściahami BCHD, Maładoha frontu, niezarehistravanaj Partyi svabody i prahresu, «Pravaha aljansu», «Ruchu za Svabodu».

Nad scenaj łunajuć vialikija bieł-čyrvona-bieły ściah i ściah Jeŭrasajuza.

Scena taksama azdoblenaja vialikim pano: na jakim sinim koleram adlustravany abrys Jeŭropy z zoračkami pa kontury. Usio pryhoža i žyćcieśćviardžalna.

U adroźnieńnie ad paŭtornaha źjezda BCHD tut – zbolšaha znajomyja ŭsio tvary.

Adkryŭ mierapryjemstva namieśnik staršyni Ruchu Za Svabodu Viktar Karniajenka, jaki ŭ svaim vystupie dosyć samakrytyčna zaznačyŭ, što ciapier takimi forumami nikoha nie ździviš.

Viktar Karniajenka zadavaŭ pytańnie: «Jakaja meta forumu?» I sam adkazaŭ:

«Stymulavańnie dyskusii, ci patrebien nam Jeŭrasajuz i dyjałoh uładaŭ ź ES».

Dalej vystupaŭ pasoł Šviecyi ŭ Biełarusi (Šviecyja zaraz staršynstvuje ŭ ES) Stefan Eryksan. Vystupaŭ jak zaŭsiody na čystaj biełaruskaj movie, jakaja daść foru niekatorym biełaruskim dziejačam.

Dalej pajšli videazvaroty. Pieršy – Vacłava Haŭła, u jakim eks-prezident Čechii, zaznačyŭ, što Biełaruś naležyć da krain jeŭrapiejskaj demakratyi, «i my, u Jeŭropie, budziem vitać Biełaruś u ES», prademanstravali taksama zvaroty Vitaŭtasa Łandśbierhisa i staršyni Jeŭraparłamienta Ježy Buzka, jaki ŭ svaim zvarocie zaznačyŭ, što

«Jeŭropa praciahvaje ruku najpierš biełaruskim hramadzianam, a nie ŭładam».

Buzak adznačyŭ, miž inšym, što lider Ruchu «Za svabodu» Alaksandr Milinkievič – sapraŭdy hodny i dastojny lider.

Na hetym videazvaroty skončylisia.

Pierad udzielnikami forumu vystupiła jeŭradeputat, vice-staršynia Jeŭrapiejskaj narodnaj partyi Karyn Vortman-Kool, jakaja zaznačyła, što Jeŭrasajuz nie bačyć źmianieńnia situacyi ŭ Biełarusi.

Da ŭdzielnikaŭ forumu źviarnulisia taksama vice-staršynia polskaha Sienata Źbihnieŭ Ramašeŭski (darečy, baćka dyrektarki Biełsata Ahnieški Ramašeŭskaj), najbolšym pa časie byŭ vystup člena Jeŭraparłamienta Jacka Pratasieviča – staršyni delehacyi pa suviaziach ź Biełaruśsiu.

Pratasievič vystupaŭ pa-anhielsku. Jon zaznačyŭ: «My nikoli nie dyktavali biełaruskim uładam, što im rabić, ale čakajem, što dla Biełarusi budzie bolš svabody». Čamu Jeŭropa heta robić? «My nie prosta susiedzi, my - braty i siostry»,

Pratasievič padkreśliŭ, što Jeŭraparłamient budzie praciahvać supracoŭničać ź biełaruskaj apazicyjaj i hramadskimi dziejačami,

pakul u krainie nie buduć praviedzienyja svabodnyja vybary.

«Toje, što niekali padavałasia kašmaram, projdzie, a toje, što padavałasia sałodkaj maraj, chutka pieratvorycca ŭ rečaisnaść»,

«Vam patrebna tolki trochi mužnaści i lider, zdolny ŭziać na siabie adkaznaść», - reziumavaŭ Pratasievič.

Vystupiŭ pradstaŭnik rasijskaha ruchu ««Pravoje dieło» Dźmitry Bykaŭ. Jon zhadaŭ hetatydniovy zvarot prezidenta Rasii Dźmitry Miadźviedzieva da Fiederalnaha schodu, u jakim kiraŭnik susiedniaj dziaržavy zajaviŭ, što nikoli nie viernucca staryja časy i Rasii nakanavana žyć u Jeŭropie.

Cytavańnie Miadźviedzieva, jaki času ad času najaždžaje na Pucina, było prychilna sustreta załaj.

Dalej pajšli vystupy biełaruskich udzielnikaŭ forumu.

Staršynia Partyi BNF Alaksiej Janukievič zreahavaŭ na słovy Vitaŭtasa Łandśbierhisa, što maŭlaŭ, Biełaruś – heta most miž Jeŭropaj i Rasijaj.

«Nijaki my nie most, – zapiarečyŭ lider Partyi BNF, most – heta kiepski varyjant, pa im usie topčucca. A Biełaruś – paŭnavartasny čalec Jeŭropy».

Janukievič adznačyŭ, što ciapier biełaruskija ŭłady pavinny mieć prava ŭdzielničać u dyjałohu ź Jeŭropaj tolki ŭ adnym vypadku,

kali atrymajuć sprviadlivuju pieramohu na svabodnych i demakratyčnych vybarach u Biełarusi».

Lider «Maładoha frontu» Źmicier Daškievič zhadaŭ Kanhres demakratyčnych sił, što prajšoŭ u hetaj zali čatyry z pałovaj hady tamu. «Tady, skazaŭ Daškievič, u zale było bahata ŭdzielnikaŭ ź siarpom i mołatam na hrudziach», Siońniašni skład udzielnikaŭ unušaje aptymizm, bo tut sabralisia adnadumcy, a metaj forumu pavinna stać vypracoŭka stratehii pieramohi na vybarach.

Daškievič nahadaŭ pratestanckaje vysłoŭje pra toje, što źmieny ŭ hramadstvie adbuducca ŭ adzin dzień, pryčym kali ich nie čakaješ.

Pierad udzielnikami forumu vystupili taksama staršynia «Pravaha aljansu» Jury Karetnikaŭ, MCHSS «Małady demakraty» Alaksandr Šumkievič i lider ruchu «Maładaja Biełaruś» Artur Fińkievič,

jaki adznačyŭ, što moładź nie zapałochać ni turmami, ni štrafami, ni palityčnymi pryzyvami ŭ vojska.

Vystupiŭ lider niezarehistravanaj Partyi svabody i prahresu Uładzimir Navasiad, što vielmi elehantna hladzieŭsia ŭ šaliku na šyi.

Ad BCHD vystupaŭ Pavieł Sieviaryniec. Jon zaznačyŭ, što Biełaruś razam ź inšymi krainami Centralnaj i Uschodniaj Jeŭropy – Litvoj, Słavakijaj, Małdovaj – paklikana adradzić Jeŭropu.

a «siońniašni režym budzie asudžany Boham i historyjaj».

Taksama Sieviaryniec zaznačyŭ, što budučym prezidentam Biełarusi budzie jeŭrapiejec, jaki lubić Biełaruś – udzielniki forumu zaŭśmichalisia.

«My hatovy ŭziać adkaznaść za krainu», -- nahadaŭ tradycyjny deviz hramadskich dziejačoŭ Sieviaryniec dy zaznačyŭ, što «serca Biełarusi bjecca ŭ hetaj zale».

Pierad udzielnikami forumu vystupiła Zinaida Bandarenka, a staršynia mandatnaj kamisii Juraś Hubarevič aznajomiŭ udzielnikaŭ vialikaha zboru z hałoŭnaj intryhaj forumu: kolkaściu ŭdzielnikaŭ.

U vyniku: zarehistravalisia 809 delehataŭ, 98 hanarovych haściej, 7 kiraŭnikoŭ dypłamatyčnych misij i 52 žurnalisty.

Ciapier na forumie pačałasia praca pa siekcyjaj: siekcyja palityki, ekanomiki i hramadstva.

* * *

Napiaredadni forumu namieśnik staršyni Ruchu Za Svabody Juraś Hubarevič adznačyŭ, što nijakich pastanovaŭ adnosna bližejšych vybaraŭ prymacca nie budzie.

«My chočam pravieści trošku šyrejšaje, čym čysta palityčnaje mierapryjemstva. Buduć pracavać try siekcyi na temu palityki, ekanomiki i hramadstva».

Sam Milinkievič jašče nie peŭny, ci budzie ŭdzielničać u nastupnych vybarach.

Forum projdzie napiaredadni rašeńnia Jeŭrasajuza ab padaŭžeńni ci prypynieńni sankcyj suprać biełaruskich čynoŭnikaŭ. Jano budzie prymacca 17 listapada ŭ Brusieli. Tamu zryvać pracu mierapryjemstva, jak ličycca, niavyhadna dla ŭładaŭ.

• 0
• 0
• 0
• 0
• 0
• 0
• 0
• 0