Niekatoryja siabry NATO mohuć uvieści vojski va Ukrainu — były hienieralny sakratar

U pačatku hetaha tydnia prezident Ukrainy Uładzimir Zialenski zajaviŭ, što prymie zaprašeńnie na ŭdzieł u lipieńskim samicie krain NATO tolki pry peŭnych umovach. Pavodle jaho słoŭ, hety samit budzie dobraj placoŭkaj dla taho, kab padpisać tam dakumienty ab harantyjach biaśpieki dla Ukrainy. U advarotnym vypadku, skazaŭ Zialenski, jon nie bačyć sensu ŭ takich sustrečach.

Sa słoŭ Rasmusiena, vyklučna važna, kab Ukrainie byli dadzienyja piśmovyja harantyi biaśpieki — pieravažna jašče da samitu, mahčyma, pa-za ramkami NATO. Hetyja harantyi pavinny achoplivać abmien raźviedvalnymi źviestkami, naroščvańnie vytvorčaści bojeprypasaŭ, apieracyjnuju sumiaščalnaść sa standartami NATO i pastaŭku ŭzbrajeńniaŭ u kolkaściach, dastatkovych dla ŭtrymańnia Rasii ad novych napadaŭ.

«Kali NATO nie zdoleje damovicca ab vyraznym šlachu dla Ukrainy, isnuje vidavočnaja mahčymaść, što niekatoryja krainy raspačnuć dziejańni ŭ indyvidualnym paradku. My viedajem, što Polšča vielmi nastrojenaja na akazańnie kankretnaj dapamohi Ukrainie. I ja nie mahu vyklučyć mahčymaści, što Polšča ŭ hetym kantekście ŭciahniecca jašče macniej na nacyjanalnym uzroŭni, a za joj pojduć bałtyjskija krainy — całkam mahčyma, uklučajučy varyjant z adpraŭkaj vojskaŭ na pole boju», — skazaŭ Anders Rasmusien.

Jak piša brytanskaja hazieta Guardian, Rasmusien, jaki vystupaje ŭ jakaści aficyjnaha daradcy prezidenta Uładzimira Zialenskaha pa pytańniach miesca Ukrainy ŭ budučaj architektury jeŭrapiejskaj biaśpieki, u hetyja dni ździajśniaje turne pa Jeŭropie i ZŠA, kab acanić pierapady nastrojaŭ siarod sajuźnikaŭ napiaredadni krytyčna važnaha dla Ukrainy samitu, jaki adkryjecca 11 lipienia.

«Dumaju, palaki hatovyja surjozna razhledzieć pytańnie ab tym, kab uziać inicyjatyvu ŭ svaje ruki i sabrać «kaalicyju dobraj voli», kali Ukraina ničoha nie atrymaje na samicie ŭ Vilni. My nie pavinny niedaaceńvać polskich nastrojaŭ: jany adčuvajuć što Zachodniaja Jeŭropa zanadta doŭha admaŭlałasia prysłuchoŭvacca da ich pieraściarohaŭ nakont rasijskaha mientalitetu», — skazaŭ Anders Rasmusien.

Słovy Rasmusiena prahučali na fonie zajaŭ jaho pierajemnika na pasadzie kiraŭnika Paŭnočnaatłantyčnaha aljansu Jensa Stołtenbierha pra toje, što choć pytańnie harantyj biaśpieki dla Ukrainy budzie ŭklučanaje ŭ paradak dnia samitu, adnak zhodna z 5-m artykułam Vašynhtonskaj damovy NATO moža harantavać usialakuju biaśpieku tolki dla svaich paŭnapraŭnych siabroŭ.

Raniej Uładzimir Zialenski pryznaŭ, što va Ukrainy niama šancu ŭstupić u NATO, pakul idzie vajna. «Nie tamu, što nie chočam, a tamu, što heta niemahčyma, — skazaŭ jon. — My ludzi adekvatnyja i razumiejem, što nivodnuju krainu NATO my nie budziem uciahvać u vajnu».

Adnak Rasmusien adchiliŭ hety arhumient. Ź jahonych słoŭ, admova ad vydačy Ukrainie darohi ŭ NATO da zakančeńnia vajny budzie aznačać faktyčna prava vieta dla Pucina.

Na dumku Rasmusiena, u vypadku, kali samit NATO nie pryniasie vynikaŭ, Ukraina maje zakonnaje prava źviarnucca da krain-udzielnic paasobku pa vajskovuju dapamohu.

«Paśla davoli pavolnaha razvarušvańnia takoha rodu idei ŭpeŭniena nabirajuć siłu», — skazaŭ na zakančeńnie eks-kiraŭnik NATO.

• 36
• 0
• 3
• 2
• 1
• 1
• 3
• 0