Śledča-apieratyŭnaja hrupa praciahvaje pracavać na miescy avaryi na Śvietłahorskim CKK, pra heta paviedamiŭ aficyjny pradstaŭnik SK Alaksandr Suchadolski.
«Pavodle śledstva, 7 červienia ŭ cechu vyparnoj stancyi pa vytvorčaści rakitavaha aleju Śvietłahorskaha CKK pravodzilisia techničnyja pracy. Prykładna ŭ 15:40 adbyłasia ŭspyška hazapavietranaj sumiesi. U vyniku vybuchu zahinuli try rabotniki pradpryjemstva va ŭzroście 24, 31 i 42 hadoŭ. Jašče dva čałavieki atrymali cialesnyja paškodžańni», — prainfarmavaŭ pradstaŭnik SK.
«Ciapier dapytvajuć inžynierna-techničnych rabotnikaŭ kambinata i kiraŭnikoŭ, zadziejničanych na vytvorčaści. Kanfiskavali dakumientacyju, jakaja rehłamientuje praviadzieńnie vytvorčych i ramontnych rabot, tabieli pracoŭnaha času i inšyja nieabchodnyja dla śledstva materyjały», — adznačyŭ Suchadolski.
Što tyčycca pryčyny vybuchu, to jana jašče vyśviatlajecca. Śledstva praviaraje viersiju farmavańnia vybuchovaj hazapavietranaj sumiesi ŭ chodzie praviadzieńnia ramontna-ačyščalnych rabot biez rehłamientu, a taksama viersiju ab dapuščanych parušeńniach u technałahičnym pracesie.
Raspačali kryminalnuju spravu pa fakcie zdareńnia.
Avaryja na pradpryjemstvie adbyłasia 7 červienia prykładna ŭ 15:30.
U telehram-kanale homielskaha telebačańnia ŭ 15:46 napisali, što na terytoryi celułoznaha kambinata adbyŭsia vybuch, a ratavalniki šukajuć dvaich rabotnikaŭ, jakija znachodzilisia pobač ź miescam avaryi.
U paźniejšych aficyjnych paviedamleńniach havaryłasia pra ŭspyšku hazapavietranaj sumiesi ŭ ciepłaabmieńniku. Jana adbyłasia padčas praviadzieńnia prafiłaktyčnych i ramontnych rabot u cechu vyparki škipinaru.
Pra vybuch pisali i ŭ sacyjalnych sietkach.
«Siońnia ŭ rajonie 15:30 mocna bachnuła z boku pramzony. Praź niepraciahły čas — sireny mašyn, jakija imčacca ŭ toj bok», — havorycca ŭ adnym z dopisaŭ.
«Vybuch byŭ vielmi mocny, i čuli jak padali roznyja askiepki, potym sirena… Sapraŭdy krychu byli na panicy, z pryčyny ŭsioj abstanoŭki ŭ Homielskaj vobłaści! Daj Boh, kab usie byli žyvyja i dziakuj Bohu, što heta nie źviazana sa SVA (vajnoj. — NN)!!!» — adznačyŭ aŭtar adnaho dopisu.
Žychar Śvietłahorska raskazaŭ «Našaj Nivie», što terytoryja kambinata była ačeplenaja. Šmat milicyi i śledčych. Bahata vylili pažarnaj pieny.
SK učora zajaviŭ, što havaryć pra dakładnuju kolkaść zahinułych i paciarpiełych na Śvietłahorskim CKK rana, bo śledčyja pakul nie majuć dostupu da usioj paškodžanaj terytoryi. Mahčyma, pad zavałami jašče jość ludzi.
U 2020 hodzie na śvietłahorskim pradpryjemstvie ŭ vyniku vybuchu na čanie rakitavaha aleju zahinuŭ 40-hadovy zvarščyk Alaksandr Rusinovič.
Vytvorčaść bielenaj celułozy spačatku ŭzvodziła kitajskaja kampanija za kitajskija ž inviestycyi. Ale ŭ vyniku kanfliktu ŭ 2018 hodzie kitajcy admovilisia ad supracoŭnictva ź biełaruskim bokam. Davodzili da ładu abstalavańnie inšyja śpiecyjalisty.
Zapuścili novuju vytvorčaść u 2020 hodzie. Jana vyrablaje sulfatnuju bielenuju celułozu, jakuju vykarystoŭvajuć u papiarovaj vytvorčaści i vyrabie niekatorych budaŭničych materyjałaŭ.
U Biełarusi nazirajucca prablemy ź internetam. Voś što pišuć pra heta ludzi2
Kamientary