Nie tak važna vybrać «pravilny» soncaachoŭny krem, jak važna paźbiehnuć hetych šaści pamyłak

Pa danych SAAZ, zachvorvańnie na miełanomu za apošnija 50 hadoŭ vyrasła ŭ siem razoŭ. Ad złajakasnych novaŭtvareńniaŭ skury štohod va ŭsim śviecie pamiraje bolš za 60 tysiač čałaviek.

Dermatołahi nahadvajuć, što vykarystańnie soncaachoŭnaha kremu adyhryvaje «klučavuju rolu» ŭ abaronie skury. Za vyklučeńniem dziaciej da šaści miesiacaŭ, soncaachoŭny krem rekamiendujecca nanosić usim. Choć ludzi sa śvietłaj skuraj mohuć być bolš schilnyja da soniečnych apiokaŭ, usie typy skury ŭraźlivyja da ŭździejańnia ultrafijaletavaha vypramieńvańnia.

Vydańnie NPR paprasiła dermatołahaŭ padzialicca paradami, jak lepš abaraniać skuru, i pieraličyć raspaŭsiudžanyja pamyłki, što dapuskajuć pacyjenty.

1. Pieražyvajecie za chimičnyja rečyvy? Pasprabujcie minieralnuju alternatyvu

Daśledavańni pakazvajuć, što niekatoryja aktyŭnyja inhredyjenty, što vykarystoŭvajucca ŭ chimičnych soncaachoŭnych kremach, mohuć usmoktvacca ŭ kroŭ (naprykład, aksibienzon), ale pakul niama ni dokazaŭ biaśpieki hetaj źjavy, ni dokazaŭ škody. Bolšaść dermatołahaŭ kažuć, što ryzyka soniečnych apiokaŭ namnoha pieravyšaje lubuju patencyjnuju ryzyku ad soncaachoŭnych chimičnych rečyvaŭ. Adnak, kali vy zaniepakojenyja, jość varyjanty, jak paźbiehnuć hetych chimičnych złučeńniaŭ.

Alternatyvaj vystupajuć fizičnyja soncaachoŭnyja kremy, jakija taksama nazyvajuć minieralnymi soncaachoŭnymi srodkami. Vyrablajuć ich z aksidu cynku i dyjaksidu tytanu, i jany mohuć fizična błakavać ultrafijaletavyja pramiani.

Minieralnyja soncaachoŭnyja srodki lepš padychodziać dla adčuvalnaj skury, bo jany mienš jaje razdražniajuć.

2. Naniasieńnie dastatkovaj kolkaści soncaachoŭnaha kremu hetak ža važna, jak i SPF

Pa słovach daktaroŭ, dastatkova soncaachoŭnaha kremu z faktaram abarony ad sonca 30 (SPF 30), bo takim čynam vy błakujecie kala 97% ultrafijaletavych pramianioŭ. Z bolš vysokim SPF vy nie atrymajecie našmat bolš abarony ad sonca.

Zamiest taho, kab zasiarodzicca na ličbie SPF, dermatołahi rajać źviarnuć uvahu na kolkaść soncaachoŭnaha kremu, jakuju vy nanosicie.

Małaja kolkaść kremu — adna z pamyłak, jakuju dapuskajuć mnohija ludzi.

Lekary rajać vykarystoŭvać ekvivalent čarki (heta niedzie 40 hramaŭ vadkaha soncaachoŭnaha kremu), kab pakryć vaša cieła i tvar. Kali vy pakryvajecie tolki tvar, vykarystoŭvajcie prykładna čajnuju łyžku.

3. Soncaachoŭnyja srodki z bolš vysokim SPF nie dziejničajuć uvieś dzień

Mnohija ludzi vykarystoŭvajuć srodki z soncaachoŭnym faktaram SPF 50 ci navat z bolš vysokim faktaram abarony ad sonca, miarkujučy, što heta daje im bolš praciahłuju abaronu pa časie. Ale heta nie tak.

Soncaachoŭnyja srodki z bolš vysokim SPF patrabujuć častaha paŭtornaha prymianieńnia, bo jany zmyvajucca, kali čałaviek płavaje ci pacieje.

Dermatołahi rajać paŭtorna nanosić soncaachoŭny krem kožnyja dźvie hadziny, kab zabiaśpiečyć poŭnuju abaronu.

4. Pachmurnyja dni mohuć pryvieści da soniečnych apiokaŭ

Mnohija ludzi ličać, što abłoki abaraniajuć ich ad sonca, i zabyvajucca pra soncaachoŭnyja srodki, ale i ŭ pachmurny dzień možna abhareć.

Abłoki błakujuć kala 20% soniečnaha śviatła, ale praź ich vy ŭsio adno atrymlivajecie kala 80% ultrafijaletavych pramianioŭ. Tak što navat u pachmurnaje nadvorje nie zabudźciesia ŭziać z saboj soncaachoŭny krem.

5. Hałaŭnyja ŭbory, adzieńnie i soncaachoŭnyja akulary taksama abaraniajuć ad sonca

Navat adzin dzień na soncy moža abpalić rahavicu, a z časam znachodžańnie na soncy moža vyklikać kataraktu. Aptymalny sposab abarony vačej — našeńnie soncaachoŭnych akularaŭ, jakija zabiaśpiečvajuć 100% abarony ad ultrafijaletavaha vypramieńvańnia.

Ad sonca abaraniajuć hałaŭnyja ŭbory i adzieńnie. Jość navat śpiecyjalnaje adzieńnie z ubudavanaj u tkaninu abaronaj ad sonca ad takich brendaŭ, jak Columbia, Cotopaxi, Sombra i Mott50. Jość i paraški, jakija možna zasypać u pralnuju mašynu, kab pakryć adziežu chimičnym soncaachoŭnym kremam, — jany nadajuć pamytym rečam SPF 30, jaki zastajecca paśla nie adnaho myćcia. I jašče adzin pradukt, jaki moža spadabacca siemjam z maleńkimi dziećmi, — heta UF-nalepki na skuru. Jany mianiajuć koler, kali treba paŭtorna nanieści soncaachoŭny krem.

6. Abnaŭlajcie kremy štosiezon

Jość sens kuplać novyja soncaachoŭnyja srodki štosiezon, bo chimičnyja rečyvy ŭ ich słabiejuć i z časam stanoviacca mienš efiektyŭnymi.

Nie treba zachoŭvać soncaachoŭny krem u miescach, jakija mocna nahravajucca, naprykład, u bahažniku ci bardačku aŭtamabila, bo tam jon psujecca pad uździejańniem ciapła. Lepš uvieś siezon zachoŭvać krem u suchim chaładnavatym miescy.

Bolš materyjałaŭ pra zdaroŭje:

Soncaachoŭny krem: kitajskija navukoŭcy stvaryli lepšy i bolš biaśpiečny

Daktary pieraasensoŭvajuć ahresiŭnyja mietady lačeńnia raku

Čatyry vitaminy dla suchoj skury

• 19
• 0
• 3
• 1
• 2
• 2
• 2
• 0