U dzień naradžeńnia byłoha padpałkoŭnika HUBAZiKa Stanisłava Łupanosava Viarchoŭny sud apublikavaŭ vinšavańnie — 18 hadoŭ kałonii
Siońnia svoj dzień narodzinaŭ adznačaje Stanisłaŭ Łupanosaŭ, padpałkoŭnik HUBAZiK, adna z centralnych fihur siarod tych siłavikoŭ, jakija pierajšli na bok narodu. Ź jahonym imieniem źviazvajuć stratu režymam vialikaj kolkaści kanfidencyjnaj infarmacyi, u tym liku baz danych. Režym Łukašenki pavinšavaŭ Łupanosava prysudam.
Na sajcie Viarchoŭnaha suda źjaviłasia infarmacyja ab prysudzie Stanisłavu Łupanosavu: jamu zavočna dali 18 hadoŭ kałonii ŭzmocnienaha režymu. A taksama štraf u 48 tysiač rubloŭ.
U prysudzie havorycca, što byłoha siłavika pryznali vinavatym u niesankcyjanavanym kapiravańni infarmacyi, «zdradzie dziaržavie», vydačy dziaržaŭnych sakretaŭ i dziejańniach z vykarystańniem słužbovych paŭnamoctvaŭ, jakija nanieśli «istotnuju škodu dziaržavie».
Łupanosava asudzili pa artykułach 352, 356 i 424 Kryminalnaha kodeksa.
Na toje, što infarmacyju apublikavali ŭ dzień naradžeńnia Łupanosava — a jamu siońnia 40 hod, — źviarnuli ŭvahu ŭ adnym z telehram-kanałaŭ «Bajpoła», jaki niadaŭna raździaliŭsia na dźvie častki.
Sam Łupanosaŭ kamientuje heta tak.
«Hetaja infarmacyja technična była apublikavanaja daŭno, ale dostup dla ŭsich da jaje adkryli tolki siońnia. Prynamsi, nichto jaje raniej nie bačyŭ, a siońnia źjaviłasia. Nakolki ja razumieju, tut niejki asabisty simvalizm u takoj acency maich zasłuh pierad Radzimaj. Jany mnie dali pa maksimałcy.
I ja heta traktuju jak strach, nu i chaj bajacca, bo samaha hałoŭnaha ŭ svaim žyćci ŭ spravie vyzvaleńnia Biełarusi ja jašče nie zrabiŭ. Ja liču, usio napieradzie.
Adznačaju dzień narodzinaŭ», — skazaŭ «Našaj Nivie» Stanisłaŭ Łupanosaŭ.
Niadaŭna jon davaŭ vialikaje intervju «Našaj Nivie».
Akaŭnt Kabančuka ŭzłamali — ale ci biełaruskija śpiecsłužby?3
Kamientary
Tiem boleje, hubopikam.