Badziažnych katoŭ i sabak u Biełarusi stanovicca ŭsio bolš. 70% ź ich asudžany na hibiel
Prablema, źviazanaja z kolkaściu biazdomnych žyvioł na vulicach, z kožnym hodam nabiraje ŭ Biełarusi abaroty, paviedamiŭ na pres-kanfierencyi načalnik upraŭleńnia žyllovaj haspadarki Minžyłkamhasa Andrej Ramaška.
«Prablema z hodu ŭ hod nabiraje abaroty, kolkaść adłoŭlenych biazdomnych katoŭ i sabak z kožnym hodam pavialičvajecca. Tak, kali ŭ 2022 hodzie pa ŭsioj krainie było adłoŭlena kala 22 tysiač žyvioł, to za piać miesiacaŭ biahučaha hoda heta kolkaść składaje ŭžo 10 tysiač», — cytuje słovy čynoŭnika «Sputnik».
Kažučy pra los hetych žyvioł, Ramaška paviedamiŭ, što tolki niešmatlikija ź ich traplajuć da novych uładalnikaŭ. Pavodle jaho słoŭ, u minułym hodzie kala 10% ad usich adłoŭlenych u krainie žyvioł byli viernutyja ich haspadaram, 20% — zdabyli novych haspadaroŭ.
«Heta značyć, 70% takich žyvioł, na žal, u adpaviednaści z zakanadaŭstvam asudžanyja na hibiel», — dadaŭ jon.
«Prablema ŭ tym, što siońnia pytańnie abychodžańnia z žyviołami rehulujecca tolki pastanovaj urada, ale ŭ bolšaj stupieni hety dakumient raspaŭsiudžvajecca na praviły ŭtrymańnia svojskich žyvioł u žyllovym fondzie», — adznačyŭ načalnik upraŭleńnia.
Ramaška nahadaŭ, što ŭ Biełarusi nieabchodna rehistravać žyvioł paśla ich nabyćcia.
«Siońnia rehistracyja ažyćciaŭlajecca miascovymi vykanaŭčymi i rasparadčymi orhanami praz słužbu «Adno akno», ale praces rehistracyi nie daskanały, bo zvyčajna paźniej składana identyfikavać žyviołu, kali ŭładalnik hetaha nie zachoča», — rastłumačyŭ pradstaŭnik profilnaha viedamstva.
Razam z tym, pavodle słoŭ čynoŭnika, u Biełarusi ŭ apošnija hady viadziecca ŭzmocnienaja rabota pa ŭdaskanaleńni zakanadaŭstva ŭ hetaj śfiery. U pryvatnaści, užo raspracavany i abmiarkoŭvajecca, a chutka budzie vyniesieny i na hramadskaje abmierkavańnie prajekt zakona ab adkaznym abychodžańni z žyviołami, jaki dazvolić urehulavać pytańni ich rehistracyi i identyfikacyi.
U charaktarystyki biudžetnikaŭ pačali ŭnosić danyja pra najaŭnaść apastyla dypłoma. Navošta?14
Kamientary