Natatka pra cikavy histaryčny konkurs i anons vystavy-ekskursii ŭ jaho miežach.
U Viciebsku prachodzić konkurs historyka-kulturnych interpretacyj horadu i jaho vakolic.
Arhanizatary ŭ asobach Viciebskaha abłasnoha krajaznaŭčaha muzieja i kulturnickaha partała Vitebsk4.me prapanavali maładym ludziam parazvažać nad tym, jakich pomnikaŭ nie chapaje rodnamu horadu, pamiać pra jakija padziei varta adlustravać na jaho vulicach, jakija histaryčna i mastacka važnyja miaściny Viciebsku i vakolic dahetul nijak nie adznačanyja, jakija łandšafty patrabujuć adnaŭleńnia albo pieraasensavańnia. Pa ŭmovach konkursu abjektami interpretacyj, dasłanych u tekstavym vyhladzie, mohuć stacca jak realnyja hieroi i padziei, tak i vyrazna mifičnyja fienomieny viciebskaj daŭniny. Udzielniki mohuć sprajecyravać «pamiać pra prošłaje» na siońniašni dzień i prezientavać svaje varyjanty interpretacyi ciapierašniaha viciebskaha łandšaftu. Sposaby adnaŭleńnia pamiaci taksama nie abmiažoŭvajucca: muziei, haradskija śviaty, halerei, virtualnyja ekskursii, rolevyja hulni, miemaryjały — jak paasobku, tak i kompleksna. Adzinaje, što treba abhruntavać u abaviazkovym paradku — čamu mienavita hetaja pamiać musić być reaniminavanaja ŭ śviadomaści haradžan.
Dla bolš detalovaha znajomstva z umovami konkursu, a taksama z materyjałami, jakija mohuć stacca krynicaj natchnieńnia dla budučaj interpretacyi, u siecivie zapracavała admysłovaja staronka.
Akramia taho, u miežach konkursu 27 listapada ŭ viciebskim centry ramiostvaŭ «Zadźvińnie» adkryjecca krajaznaŭčaja vystava, jakaja raspaviadzie pra značnyja abjekty ŭ viciebskich vakolicach. Čamu les kala pasiołka Łužasna nazyvajuć «ciopłym» i čamu majontak «Miłaje» — samy ramantyčny na Biełarusi, čym admietnaja historyja kamiennaha kryža ŭ vioscy Chabaty i čamu tam zachavałasia adzinaja «dakastryčnickaja» carkva na Haradoččynie, čamu žychary ŭźbiarežža voziera Łośvida pamiatajuć Napaleona i jaki los pieražyła adzinaja zachavanaja ŭ Viciebskim rajonie carkva‑»muraŭjoŭka»? Vybitny padźvinski krajaznaŭca, cudoŭny pramoŭca, kandydat histaryčnych navuk Mikoła Pivavar praviadzie z dapamohaj ekspazicyi virtualnuju ekskursiju pa hetych i šmat jakich inšych pryciahalnych punktach viciebskaha navakolla.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary