Suprać palitviaźnia Aleha Jafremienki zaviali treciuju kryminalnuju spravu
Aleha nieadnarazova źmiaščali ŭ ŠIZA, a niadaŭna suprać jaho raspačali ŭžo treciuju kryminalnuju spravu — znoŭ pa č. 1 art. 411 KK. U chutkim časie nad palitviaźniem adbudziecca sud, jak paviedamlaje «Viasna».
15 žniŭnia minułaha hoda ŭ sudzie Leninskaha rajona Mahilova Alehu Jafremienku prysudzili ŭ dadatak da raniejšych čatyroch hadoŭ z pałovaj kałonii jašče hod u źniavoleńni. Jaho abvinavacili pa č. 1 art. 411 Kryminalnaha kodeksa («Złosnaje niepadparadkavańnie patrabavańniam administracyi papraŭčaj ustanovy»).
Raniej palitviaźniu ŭžo ŭzmacniali režym: u vieraśni 2021 hoda z kałonii, dzie jon adbyvaŭ termin za padsiečku milicyjantu, Aleha pieraviali na turemny režym.
Z 18 listapada Aleh pačaŭ adbyvać termin u papraŭčaj kałonii №9. Ale, pa infarmacyi pravaabaroncaŭ, administracyja ŭstanovy ŭvieś čas ciśnie na Aleha, i novy sud nad im staŭ vynikam jakraz hetaha.
Kamientary