Rada BNR: RPC — hałoŭnaja pryčyna mižrelihijnaj napružanaści ŭ Biełarusi
Rada Biełaruskaj Narodnaj Respubliki vystupiła z asudžeńniem pazicyi RPC da dziejnaści hreka-katolikaŭ u Biełarusi i, u pryvatnaści, zasnavańnia Vatykanam u Biełarusi Apostalskaj administratury dla katolikaŭ uschodniaha abradu.
Rada Biełaruskaj Narodnaj Respubliki asudžaje ŭmiašalnictva Rasiejskaj pravasłaŭnaj carkvy ŭ dziejnaść inšych relihijnych supolnaściaŭ Biełarusi, u tym liku sproby RPC pieraškodzić stvareńniu Apostalskaj administratury dla viernikaŭ vizantyjskaha abradu ŭ Biełarusi, havorycca ŭ zajavie.
Biełaruś (Vialikaje Kniastva Litoŭskaje) tradycyjna była miescam relihijnaj talerancyi i mirnaha suisnavańnia roznych relihijnych supolnaściaŭ: hreka-katalickaj bolšaści, a taksama ryma-katalickaj, pravasłaŭnaj i pratestanckich mienšaściaŭ dy niechryścijanskich mienšaściaŭ, pieradusim pradstaŭlenych musulmanami i judejami, što znajšli na Biełarusi prytułak paśla vyhnańnia ź inšych krainaŭ. Ciarpimaść i pavaha da raznastajnaści byli, jość i zastanucca adnymi z hałoŭnych kaštoŭnaściaŭ dla biełaruskaha naroda.
Hałoŭnaj krynicaj mižrelihijnaj napružanaści ŭ Biełarusi stała Rasiejskaja pravasłaŭnaja carkva, hvałtam nasadžanaja biełarusam u pieršaj pałovie XIX stahodździa, a ŭ ciapierašnim vyhladzie sfarmavanaja ŭ stalinskim SSSR u 1943 hodzie i pradstaŭlenaja siońnia niesamastojnym ekzarchatam pad falšyvaj nazvaj «Biełaruskaja pravasłaŭnaja carkva», jak adznačaje Rada BNR.
Za čas svajoj dziejnaści na terytoryi Biełarusi hetaja arhanizacyja prajaviła siabie pieradusim nie jak carkva, a jak rasiejski kałanijalny instytut, instrumient rusifikacyi i cisku na tradycyjnyja biełaruskija chryścijanskija cerkvy, da jakich sama Rasiejskaja pravasłaŭnaja carkva nie naležyć. U saviecki čas Rasiejskaja pravasłaŭnaja carkva była instrumientam u rukach tatalitarnaha savieckaha režymu, jaki pravodziŭ palityku etnacydu biełarusaŭ i palityčnaha teroru suprać lubych inšadumcaŭ. Šmatlikija ijerarchi RPC byli supracoŭnikami złačynnaj arhanizacyi KDB SSSR i zastajucca ahientami śpiecsłužbaŭ aŭtarytarnych režymaŭ Łukašenki i pucinskaj Rasiei.
U sučasnaj Biełarusi RPC — adno ź ideałahičnych apiryščaŭ režymu Łukašenki. Jana karystajecca nieabhruntavanymi pryvilejami z boku aŭtarytarnaj łukašenkaŭskaj dziaržavy ŭ toj čas, jak mnohija inšyja biełaruskija chryścijanskija cerkvy ciarpiać dyskryminacyju, kanfiskacyju majomaści i represii suprać śviataroŭ.
Biełaruskaje aŭtakiefalnaje pravasłaŭje — sapraŭdny praciah miascovych pravasłaŭnych tradycyjaŭ na biełaruskich ziemlach ad siaredniaviečča i adno z duchoŭnych apiryščaŭ mnohich biełarusaŭ u vyhnańni — vymušanaje ŭ Biełarusi isnavać va ŭmovach asabliva žorstkaha pieraśledu.
Nasupierak asnovam chryścijanskaha vučeńnia tak zvanaja «Biełaruskaja pravasłaŭnaja carkva» nie asudžaje hvałt, zabojstvy i katavańni, za jakija niasie adkaznaść režym Łukašenki. Naadvarot, z šerahaŭ biełaruskaha ekzarchatu RPC sistematyčna i metanakiravana vyciskajucca śviatary i aktyvisty, jakija stajać na sumlennych chryścijanskich — i pahatoŭ na demakratyčnych prabiełaruskich — pazicyjach. Dziesiacihodździami RPC zajmajecca indaktrynacyjaj pravasłaŭnych biełarusaŭ u duchu rasiejskaha nacyjanalizmu i «rasiejskaha śvietu».
Najbolš krasamoŭna svaju sutnaść RPC prajaviła ŭ kantekście ciapierašniaj vajny Rasiei suprać Ukrainy. Kiraŭnictva RPC i jaje biełaruskaha ekzarchatu adkryta padtrymlivaje rasiejskuju vajskovuju ahresiju i błasłaŭlaje rasiejskich zachopnikaŭ, jakija ździajśniajuć vajennyja złačynstvy na terytoryi Ukrainy. Struktury tak zvanaj BPC byli zaŭvažanyja ŭ zbory materyjalna dapamohi dla rasiejskich ahresaraŭ.
Dziejnaść Biełaruskaha ekzarchatu RPC pavinna być pradmietam pilnaha rasśledavańnia z boku orhanaŭ achovy zakonu i kanstytucyjnaha ładu ŭ budučaj demakratyčnaj Biełarusi. Tak zvanaja «Biełaruskaja pravasłaŭnaja carkva» Maskoŭskaha patryjarchatu niasie adkaznaść za prasoŭvańnie ekstremisckaj antydziaržaŭnaj ideałohii, padtrymku rasiejskaj ahresii va Ukrainie i padtrymku dyktatarskaha režymu ŭ Biełarusi.
Tradycyjnyja biełaruskija cerkvy ŭschodniaha abradu, u tym liku Biełaruskaja hreka-katalickaja carkva, Biełaruskaja aŭtakiefalnaja pravasłaŭnaja carkva, majuć poŭnaje prava samastojna vyznačać svaju ŭnutranuju arhanizacyjnuju strukturu, a taksama pavinny karystacca ŭsialakaj padtrymkaju budučaj demakratyčnaj biełaruskaj dziaržavy jak instytuty, što ŭtvarajuć histaryčnuju i duchoŭnuju kaštoŭnaść.
Kamientary