75-hadovaha viciebskaha demakratyčnaha aktyvista asudzili da aryštu ŭ sudzie Vierchniadźvinskaha rajona, ale padrabiaznaściaŭ, pavodle jakoha mienavita artykuła jon pakarany, siabram i znajomym nie paviedamili.
U Barysa Chamajdy niama blizkich svajakoŭ, jakija mahli b daviedacca dakładnuju pryčynu aryštu, i tamu jon raspaviadzie pra heta chiba što sam, kali vyjdzie na volu.
Najvierahodniej, što adbyvać aryšt Chamajda budzie ŭ navapołackim IČU, bo pry Vierchniadźvinskim RAUS niama adpaviednych pamiaškańniaŭ. Da ŭsiaho, dla tak zvanych «palityčnych», aryštavanych pa administracyjnych artykułach, na Viciebščynie nie prymajuć pieradač: pra heta ŭ karnych ustanovach isnuje admysłovaje ŭnutranaje rasparadžeńnie.
U termin prysudžanaha aryštu ŭvojduć tyja troje sutak, jakija Barys Chamajda ŭžo adbyŭ za kratami. Jon byŭ zatrymany 28 lipienia kala 11:30 na pieronie čyhunačnaj stancyi Bihosava.
Najstarejšy viciebski apazicyjny aktyvist i viernik u apošnija hady stała biare ŭdzieł u pilihrymkach. Hetym razam jon źbiraŭsia prajści piecham 10 km ad Bihosava da Rosicy, dzie pilihrymy źbiralisia ŭšanavać pamiać ksiandzoŭ-maryjanaŭ Juryja Kašyry i Antonija Laščeviča, spalenych u 1943 hodzie razam sa svaimi parafijanami ŭ miascovym kaściole.
Adnak u dyziel-ciahniku pamiežniki (Bihosava i Rosica znachodziacca na biełaruska-łatyšskim pamiežžy) praviarali ŭ pasažyraŭ pašparty i im nie spadabałasia, što na pašparcie Barysa Chamajdy była vokładka z vyjavaj «Pahoni». Tłumačeńni pra toje, što «Pahonia» jość navat na aficyjnym hierbie Viciebskaj vobłaści, pamiežniki słuchać nie stali i pieradali Barysa Chamajdu supracoŭnikam milicyi.
Ciapier čytajuć
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami2121
Kamientary