Navalnaha asudzili da 19-ci hadoŭ kałonii asobaha režymu pa spravie ab «ekstremiźmie»
Alaksieja Navalnaha abvinavačvali adrazu pa šaści artykułach, ciapier jon adbyvaje dzieviacihadovy termin.
Maskoŭski haradski sud na vyjaznym pasiadžeńni ŭ PK-6 Uładzimirskaj vobłaści asudziŭ Alaksieja Navalnaha da 19-ci hadoŭ pazbaŭleńnia voli ŭ kałonii asobaha režymu pa kryminalnaj spravie ab «ekstremiźmie», paviedamlaje telekanał «Dožd́».
Navalnaha abvinavačvali pa šaści artykułach: ab stvareńni ekstremisckaj supolnaści, zaklikach da ekstremizmu, stvareńni NKA, jakaja zamachvajecca na pravy hramadzian, finansavańni ekstremizmu, a taksama ab uciahvańni niepaŭnaletnich u niebiaśpiečnyja dziejańni i ab reabilitacyi nacyzmu. Abvinavačańnie zapytvała dla jaho 20 hadoŭ pazbaŭleńnia voli.
Jak raspaviadaŭ dyrektar FBK Ivan Ždanaŭ, abvinavačańni Navalnaha źviazanyja z pracaj jaho štaboŭ i Fondu, zboram danataŭ, tvitami byłoha apieratara FBK Paŭła Zialenskaha ab samaspaleńni žurnalistki Iryny Słavinaj, udziełam u mitynhach ludziej maładziejšych za 18 hadoŭ, a pavodle artykuła ab reabilitacyi nacyzmu — z publikacyjaj vałhahradskim štabam kałažu z ablitym zialonkaj manumientam «Radzima-maci kliča!» u znak salidarnaści z Navalnym paśla napadu na jaho ŭ 2017 hodzie.
Ciapier Navalny adbyvaje dzieviacihadovy termin pa svajoj minułaj spravie ŭ PK-6 strohaha režymu ŭ Mielechavie Uładzimirskaj vobłaści. Paśla ŭstupleńnia ŭ siłu prysudu jaho pavinny buduć pieravieści ŭ kałoniju asobaha režymu, dzie adbyvajuć pakarańnie asabliva niebiaśpiečnyja recydyvisty i asudžanyja da pažyćciovych terminaŭ.
Za dzień da abviaščeńnia prysudu Navalny paprasiŭ nie prajaŭlać ź im salidarnaści «hałašeńniem pra stalinskija terminy». Na jaho dumku, takoje pakazalna strohaje pakarańnie treba dla taho, kab zapałochać hramadzian, a nie jaho samoha. Jon zaklikaŭ prychilnikaŭ nie dać siabie zapałochać i praciahvać rabić usio što mahčyma dla supracivu.
Sud pačaŭ razhladać spravu ab ekstremiźmie suprać Navalnaha 19 červienia. Vyjaznyja pasiadžeńni prachodzili ŭ zakrytym režymie. Śviedkami z boku Navalnaha vystupali asudžanyja palityki Uładzimir Kara-Murza, Ilja Jašyn, Lilija Čanyšava i Alaksiej Horynaŭ, a taksama, pa słovach byłoha hałoŭnaha redaktara «Echo Moskvy» Alaksieja Vieniedyktava, eks-mer Jekaciarynburha Jaŭhienij Rojzman i hałoŭny redaktar «Novoj haziety» Dźmitryj Murataŭ.
Paplečniki Navalnaha paviedamlali, što paśla zabojstva vajenkara Uładlena Tatarskaha ŭ spravie taksama źjaviŭsia epizod ab apraŭdańni teraryzmu, adnak u ciapierašnim abvinavačańni jaho nie było.
***
Nahadajem, čto Alaksieja Navalnaha zatrymali 17 studzienia 2021 hoda, kali jon viarnuŭsia samalotam u Maskvu ź Niamieččyny, dzie prachodziŭ lačeńnie paśla atručvańnia. Pieršapačatkova jamu dali 15 sutak aryštu, ale 2 lutaha Simanaŭski sud Maskvy zamianiŭ Navalnamu ŭmoŭny termin 3 hady 6 miesiacaŭ pa spravie «Iŭ Raše» na realny z adbyvańniem u kałonii ahulnaha režymu na praciahu 2 hadoŭ i 8 miesiacaŭ.
22 sakavika 2022 hoda Lafortaŭski rajonny sud Maskvy asudziŭ Alaksieja Navalnaha da dzieviaci hadoŭ pazbaŭleńnia voli ŭ kałonii strohaha režymu nibyta za machlarstva ŭ asabliva bujnym pamiery i niepavahu da suda.
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?11
Kamientary