Fatalny abied. Zahadkavaja śmierć siamji ŭskałychnuła cełuju krainu
Dva tydni tamu ŭ maleńkim aŭstralijskim miastečku piać siamiejnikaŭ vyrašyli paabiedać. Praz tydzień troje ź ich pamierli, čaćviorty ŭ balnicy zmahajecca za žyćcio, a piataja znachodzicca pad śledstvam pa padazreńni ŭ atručvańni lasnymi hrybami, piša Bi-bi-si.
Adnak 48-hadovaja žančyna, jakaja hatavała abied, kaža, što nie razumieje, jak takoje mahło adbycca, i nastojvaje, što lubić svaju siamju i nikoli nie pryčyniła b joj škody.
Niezvyčajny incydent pryciahnuŭ uvahu krainy, źbiŭ z pantałyku palicyju i ŭskałychnuŭ hramadskaść.
Niaščasny vypadak ci naŭmysnaje zabojstva?
Hetaja historyja pačałasia z taho, što Hiejł i Don Patersany pryjechali naviedać svaich unukaŭ i zastalisia na abied u domie svajoj niaviestki Eryn Patersan u miastečku Leanhata — za dźvie hadziny jazdy na paŭdniovy ŭschod ad Mielburna.
Ź imi była siamja Uiłkinsanaŭ-Chizer (siastra Hiejł) i jaje muž Jen.
Usie čaćviora — pavažanyja čalcy hramady susiedniaha miastečka Karumbura, dzie Jen słužyć pastaram u miascovaj baptysckaj carkvie.
Ale abied vydaŭsia niezvyčajny. Praź niekalki hadzin paśla ježy ŭsie čaćviora haściej źviarnulisia ŭ miascovuju balnicu z-za rasstrojstva straŭnikava-kišačnaha traktu.
Nieŭzabavie stała jasna, što spravy dreń, i, kab akazać lepšuju miedycynskuju dapamohu, ich pieraviali ŭ balnicu ŭ Mielburnie.
Adnak miedycyna była biaśsilnaja, i 66-hadovaja Chizer i 70-hadovaja Hiejł pamierli ŭ piatnicu, 70-hadovy Don — u subotu. A 68-hadovy Jen znachodzicca ŭ krytyčnym stanie ŭ balnicy ŭ čakańni transpłantacyi piečani.
Na dumku palicyi, čaćviora paciarpiełych atrucilisia blednaj pahankaj. Intaksikacyja atrutaj hetaha hryba niaredka pryvodzić da śmierci.
Ale, jak ni dziŭna, Eryn i dvoje jaje dziaciej nie paciarpieli.
Pavodle źviestak palicyi, dzieci, jakich paśla incydentu časova pieradali pad apieku dziaržavy, jeli inšyja stravy.
Śledčyja kažuć, što nie ŭpeŭnienyja ŭ tym, što Eryn jeła tuju ž ježu, što i jaje hości, jak i ŭ tym, ci byli hryby ŭ stravie, jakoj jana ich častavała.
Viadoma, što Eryn raźviałasia sa svaim mužam, jaki źjaŭlajecca synam Patersanaŭ, ale razvod muža i žonki byŭ spakojnym, kažuć pravaachoŭniki. Pry hetym «naŭmysnaje atručvańnie» jany pakul nie vyklučajuć.
«Zaraz my nie možam rastłumačyć śmierć paciarpiełych», — zajaviŭ žurnalistam u paniadziełak Dzin Tomas z adździeła pa rasśledavańni zabojstvaŭ.
«Usio moža być zusim niavinnym, ale my prosta jašče nie viedajem».
Sama Eryn Patersan kaža, što «nie razumieje, što adbyłosia».
Płačučy jana parazmaŭlała z žurnalistami, ale admoviłasia adkazvać na pytańni pra toje, jakija stravy padavała haściam i adkul uziała hryby.
Pry hetym jana adchilaje ŭsie abvinavačvańni i nastojvaje na svajoj nievinavataści.
«Ja ničoha nie rabiła, ja ich lubiła», — śćviardžaje žančyna.
Publika šakavanaja
Pa miery raspaŭsiudžvańnia navin pra incydent raspaŭsiudžvaŭsia i žach siarod miascovych žycharoŭ.
«Nichto nikoli nie čakaŭ, što tut takoje moža adbycca», — skazaŭ Bi-bi-si kiraŭnik rehijonu Natan Chiersa.
«Chto ŭ zdarovym sensie moh padumać, što my takim čynam stracim… ludziej, jakija tak šmat robiać i addajuć supolnaści? Heta vielmi sumna».
Eryn taksama rasstrojenaja. «Hiejł była mamaj, jakoj u mianie nie było… maje dzieci stracili babulu», — zajaviła jana.
«Jany byli adnymi z najlepšych ludziej, jakich ja kali-niebudź viedała… Ja zasmučanaja ich śmierciu».
Heta nie pieršaje atručeńnie hrybami ŭ aŭstralijskim štacie Viktoryja.
Miascovy Departamient achovy zdaroŭja paviedamlaŭ ab častych vypadkach atručvańnia blednymi pahankami. Z-za spryjalnych umoŭ nadvorja hetych atrutnych hryboŭ vyrasła jašče bolš.
Jany sustrakajucca ŭ prachałodnym vilhotnym klimacie pa ŭsim śviecie i vyhladajuć niavinna ŭ paraŭnańni ź inšymi śmiarotnymi raznavidnaściami.
Źjeŭšy navat malusieńki kavałačak — 1,5 h hrybočka — možna trapić na balničny łožak, a ceły hryb amal napeŭna pryviadzie da śmierci.
Pry hetym akazać dapamohu naŭrad ci paśpiejuć: blednaja pahanka — hryb «adkładzienaha dziejańnia».
Simptomy atručvańnia vyjaŭlajucca nie adrazu. Za 6-12 hadzin pačynajucca boli ŭ žyvacie, vanity, kryvavaja dyjareja, mocnaje abiazvodžvańnie i praktyčna adrazu paškodžvajucca nyrki, piečań, centralnaja niervovaja sistema.
U 2020 hodzie z-za ŭsplosku atručvańniaŭ u Viktoryi vosiem čałaviek trapili ŭ balnicu, adzin ź jakich pamior.
Ułady štata čarhovy raz zaklikali ludziej nie jeści dzikarosłyja hryby.
«Kali vy nie kuplali ich u supiermarkiecie, trymajciesia ad ich jak maha dalej», — zaklikaŭ Dzin Tomas z adździeła pa rasśledavańni zabojstvaŭ.
Kamientary