Biełarus ukłaŭ svabodnyja 5000 dalaraŭ u akcyi. Što stała z hrašyma praz 1,5 hoda
Najaŭnaść volnych hrošaj padšturchoŭvaje ludziej da pošuku varyjantaŭ dla inviestavańnia. «Naša Niva» pahutaryła ź biełarusam, jaki paŭtara hoda tamu vyrašyŭ nabyć akcyi na 5000 dalaraŭ. Mužčyna raskazaŭ, ci ŭdałosia na hetym zarabić.
Kab źmienšyć ryzyku, nabyŭ akcyi kampanij z roznych halin ekanomiki
Kirył (imia źmieniena na prośbu hieroja) paŭtara hoda tamu vyłučyŭ volnyja 5 tysiač dalaraŭ na kuplu akcyj zamiežnych kampanij praz prahramu Revolut. Rachunak biełarus adkryvaŭ na padstavie polskaha PMŽ.
Mužčyna kaža, što pajści na taki krok jaho padšturchnuła žadańnie pasprabavać niešta novaje i intelektualna cikavaje.
Kirył vyłučyŭ na kuplu akcyj 5000 dalaraŭ, bo, pa jahonych słovach, heta maksimalnaja suma, straciŭšy jakuju, jon nie naniasie fatalnaj škody svaim źbieražeńniam. Tamu ŭsim, chto choča pasprabavać siabie ŭ trejdzinhu, jon raić vyłučać na heta takija sumy, kab ich strata nie stała dla vas fatalnaj.
A kab pamienšyć ryzyku zhubić hrošy — nabyvać akcyi kampanij z roznych halin ekanomiki, a nie ŭkładać usie hrošy ŭ akcyi dźviuch-troch kampanij.
Trejdar-pačatkoviec pryvodzić roznyja prykłady taho, jak źmianialisia ceny na akcyi, ź jakimi jon mieŭ spravy.
Kab pastajanna nie sačyć za koštam akcyi i pamienšyć ryzyku zhubić hrošy, čytač pastaviŭ u mabilnaj prahramie limity, kab akcyi aŭtamatyčna pradavalisia ŭ vypadku dasiahnieńnia minimalna vyznačanaha koštu.
«Heta dapamahaje pazbavicca akcyj, kali ich košt pačynaje imkliva źnižacca. Toje samaje i pry roście, kali cana dasiahaje zahadzia vyznačanaha vysokaha ŭzroŭniu, to akcyja aŭtamatyčna pradajecca», — tłumačyć Kirył.
Pa słovach surazmoŭcy, kab zajmacca inviestavańniem u akcyi, treba pastajanna vučycca, sačyć za navinami i spravazdačami kampanij. Bo ad hetaha zaležyć, jakimi buduć ceny.
«Voś, naprykład, dachody ŭ Netflix vyraśli, ale rynak čakaŭ bolšaha plusa, tamu akcyi paśla spravazdačy abvalilisia z 481 dalara da 432 za akcyju. Tak ich akcyi za dzień patańnieli adrazu na $50, ci na bolš za 10%. Ale prybytkovaść ad ich nabyćcia mocna zaležyć ad taho, kali vy ich kuplali. Bo roŭna hod tamu adna akcyja Netflix kaštavała kala 240 dalaraŭ».
Pa słovach Kiryła, u jaho dobra atrymałasia zarabić na akcyjach JERAM. Mužčyna nabyvaŭ ich amal na samym dnie, kali pačałasia vajna, ale pakolki jon razumieŭ, što heta bujnaja kampanija, jakaja z časam adnović svaje pazicyi, to nie prahadaŭ.
Byvajuć pamyłki
Čytač pryznajecca, što zdarałasia, kali kuplaŭ nie toje, što treba, i stračvaŭ hrošy.
Ale ahułam hulni z akcyjami jon ličyć nie vielmi ryzykoŭnymi inviestycyjami.
«Kali ty raźmiarkoŭvaješ svaje hrošy ŭ akcyi roznych kampanij, to ryzyka taho, što z 5 tysiač praz hod zastaniecca adna, — minimalnaja. Bo ŭ zvyčajnych umovach nie budzie takoha, što akcyi adrazu 20 kampanij z roznych halin biznesu rezka straciać u canie.
Ja nabyvaju akcyi, kali baču, što jany ŭžo dasiahnuli dna. Ale časam pamylajusia, bo byvaje, što jany praciahvajuć tańnieć, tamu potym davodzicca doŭha čakać, kab jany dasiahnuli taho ŭzroŭniu i stali pradavacca daražej.
Prafiesijnyja trejdary hulajuć nie tolki ŭ doŭhuju, ale i ŭ karotkuju. Ale heta ŭžo bolš składanyja miechanizmy. Dla takich hulcoŭ trejdzinh — užo praca, jany zajmajucca hetym kožny dzień. Dla mianie heta, chutčej, cikavaje chobi, ja zachodžu ŭ prahramu prykładna raz na tydzień».
Prafiesijnyja trejdary, pa słovach surazmoŭcy, pastajanna zajmajucca vialikaj intelektualnaj pracaj — sočać za spravazdačami, navinami, analizujuć ich.
«Tyja, chto zajmajecca trejdzinham prafiesijna i ŭkładaje ŭ akcyi dziasiatki tysiač dalaraŭ, za dzień mohuć zarabić ad niekalkich sotniaŭ da niekalkich tysiač dalaraŭ. Ale i ryzyka atrymać straty ŭ takich hulcoŭ taksama davoli vialikaja. Moj varyjant bolš biaśpiečny», — kaža čytač.
Kirył adnojčy vyrašyŭ ryzyknuć, ukłaŭšy 240 dalaraŭ u akcyi kampanii Cloving Oncology.
«Zarabiŭ 150 dalaraŭ, ale było vielmi ryzykoŭna, bo kampanija adrazu paśla zbankrutavała, jaje akcyi stali kaštavać 1 cent i jaje źniali ź biržy».
Što ŭ vyniku?
Kirył kaža, što kali jon zaraz zachoča pradać usie akcyi i vyvieści hrošy, to ŭ jaho atrymajecca krychu bolš za 6000 dalaraŭ. To-bok «brudnymi» jahony zarobak składzie kala 1000 dalaraŭ, ale paśla apłaty padatkaŭ u Polščy (19%) čystymi zastaniecca krychu bolš za $800. Pry hetym Kirył adznačaje, što na piku jahony nabor akcyj kaštavaŭ 6600 dalaraŭ.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary