Daśledavańni pakazali, što ŭ pažyłych ludziej, jakija nočču ŭdychali peŭnyja vodary, nazirałasia palapšeńnie pamiaci na 226%. Vučonyja spadziajucca, što heta dapamoža ŭ lačeńni demiencyi.
Navukoŭcy daŭno viedajuć, što strata zdolnaści adčuvać pachi moža pradkazać raźvićcio amal 70 nieŭrałahičnych i psichijatryčnych zachvorvańniaŭ. Da ich adnosiacca chvaroba Alchiejmiera i inšyja formy demiencyi, chvaroba Parkinsana, šyzafrenija i ałkahalizm. Jość śviedčańni ab suviazi pamiž strataj niuchu z-za COVID i nastupnym paharšeńniem kahnityŭnych funkcyj.
Raniej było vyjaŭlena, što ŭździejańnie na ludziej ź siaredniaj stupieńniu demiencyi da 40 roznych pachaŭ dvojčy ŭ dzień na praciahu vyznačanaha pieryjadu času palapšała ich pamiać i moŭnyja navyki, źmianšała depresiju i pavyšała zdolnaści niuchu.
Kamanda niejrabijołahaŭ z Kalifarnijskaha ŭniviersiteta vyrašyła pasprabavać pieratvaryć hetyja viedy ŭ prosty i nieinvaziŭny instrumient baraćby z demiencyjaj.
Vučonyja praviali daśledavańnie, udzielnikami jakoha stali mužčyny i žančyny va ŭzroście ad 60 da 85 hadoŭ biez parušeńnia pamiaci. Ich padzialili na dźvie hrupy. Usim dali dyfuzar i siem kartrydžaŭ, u kožnym ź jakich znachodziŭsia peŭny vid aramatyčnaha aleju.
Udzielniki pieršaj hrupy atrymali kartrydžy z poŭnaj dozaj aleju. A ŭ kartrydžach, što atrymała kantrolnaja hrupa, alej byŭ u nievialikaj kolkaści. Udzielniki kožny viečar pierad snom stavili novy kartrydž u dyfuzar, i jon raspylaŭ źmieściva na praciahu dźviuch hadzin, pakul jany spali. Ekśpierymient doŭžyŭsia šeść miesiacaŭ.
Kahnityŭnyja zdolnaści praviaralisia z dapamohaj testu na zapaminańnie słovaŭ u pačatku ekśpierymienta i ŭ kancy. Udzielniki pieršaj hrupy pakazali rost kolkaści słovaŭ, jakija jany zapomnili, na 226 %. Jany taksama paviedamili, što ich son staŭ bolš mocnym.
Zdymak hałaŭnoha mozhu ŭdzielnikaŭ pieršaj hrupy taksama pakazaŭ lepšuju strukturu levaha kručkapadobnaha pučka — pučka vałoknaŭ niervaŭ, jakija złučajuć siaredniuju skronievuju dolu, jakaja adkazvaje za pamiać, ź pieradfrantalnaj karoju, jakaja adkazvaje za pryniaćcie rašeńniaŭ. Z uzrostam jon asłablajecca i stanovicca ŭstojlivym da paškodžańniaŭ.
Jak adznačajuć vučonyja, u adroźnieńnie ad inšych pačućciaŭ, impuls niuchu dachodzić da mozhu imhnienna, bo nierv, adkazny za pieradaču sihnałaŭ niuchu, źviazany z mozham napramuju. U toj čas, jak infarmacyja ad inšych orhanaŭ pačućciaŭ pierad tym, jak patrapić da peŭnych adździełaŭ kary mozhu, spačatku prachodzić praz tałamus.
Adnak, u adroźnieńnie ad zroku, jaki my karektujem akularami, ci słychu, jaki my palapšajem słychavymi aparatami, niama nijakaha sposabu adnavić stratu niuchu, što moža niehatyŭna adbicca na pamiaci i kahnityŭnych zdolnaściach.
Kamanda daśledčykaŭ choča praciahnuć vyvučać upłyŭ hetaj techniki na ludziej z dyjahnastavanym źnižeńniem kahnityŭnych zdolnaściaŭ. Jany spadziajucca, što ich adkryćcio pryviadzie da aktyvizacyi daśledavańniaŭ niuchalnaj (alfaktarnaj) terapii parušeńniaŭ pamiaci.
Čakajecca, što pradukt, zasnavany na daśledavańni i pryznačany dla vykarystańnia ŭ domie, źjavicca na rynku ZŠA hetaj vosieńniu.
Čytajcie jašče:
Narkotyki dazvalajuć adkryć užo zakrytyja vokny mahčymaściaŭ dla navučańnia
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki25
Kamientary