Viarchoŭny sud likvidavaŭ učora partyju «Spraviadlivy śviet», paviedamlaje «Pozirk».
Na dumku siabraŭ likvidavanaj arhanizacyi, z hetaha momantu ŭ Biełarusi «bolš niama partyj» z «adroznym ad dziejnaj ułady pohladam na stan rečaŭ u krainie».
Najbližejšym časam siabry «Spraviadlivaha śvietu» zojmucca «stvareńniem novaj palityčnaj partyi», jakaja budzie vystupać za «demakratyčny i sacyjalistyčny šlach raźvićcia dziaržavy i hramadstva».
2 červienia partyja padała dakumienty na pierarehistracyju bieź śpisu siabraŭ — ź mierkavańniaŭ biaśpieki. 30 červienia Miniust joj u hetym admoviŭ. 26 vieraśnia Viarchoŭny sud adchiliŭ skarhu na admovu viedamstva pierarehistravać «Spraviadlivy śviet».
Na pačatku 2023 hoda ŭ Biełarusi byli 15 partyj.
Sioleta ŭletku i ŭvosień byli likvidavanyja jašče dziesiać palityčnych strukturaŭ (pad razdaču trapili i praŭładnyja partyi): Partyja BNF, Kansiervatyŭna-chryścijanskaja partyja — BNF, Biełaruskaja partyja «Zialonyja», Biełaruskaja sacyjał-demakratyčnaja Hramada, Biełaruskaja sacyjał-demakratyčnaja partyja «Hramada», Abjadnanaja hramadzianskaja partyja, Biełaruskaja patryjatyčnaja partyja, Respublikanskaja partyja, Sacyjał-demakratyčnaja partyja narodnaj zhody, Biełaruskaja sacyjalna-spartyŭnaja partyja.
U pracesie samalikvidacyi znachodzicca Biełaruskaja ahrarnaja partyja.
Takim čynam, u Biełarusi dziejničajuć čatyry partyi.
Byli pierarehistravanyja Kamunistyčnaja partyja Biełarusi, Libieralna-demakratyčnaja partyja, Respublikanskaja partyja pracy i spraviadlivaści. Była zarehistravanaja partyja «Biełaja Ruś».
