Ajcišniki z prablemami sa zdaroŭjem atrymlivajuć pozvy ŭ vajenkamat

25-hadovamu Vasilu (usie imiony ŭ materyjale źmienienyja. — Zaŭv.) pozva pryjšła jašče pry kancy lipienia. Prosta na pracu ŭ IT-kampaniju. Dahetul telefanavali na mabilny, ale jon nie padymaŭ trubki (małady čałaviek tłumačyć, što ŭ pryncypie nie razmaŭlaje z tymi, chto telefanuje ź nieznajomych numaroŭ, vyklučeńnie robić, tolki kali čakaje kurjera).

— Paklikali prajści miedycynski pieraahlad. Chacia jašče 2 hady tamu mnie dali «vajenny»: u hrafie, dzie zvyčajna staviać datu nastupnaj paŭtornaj miedkamisii (u zaležnaści ad dyjahnazu), było napisana «bieź pieraahladu». Ja byŭ pryznany nieprydatnym da słužby ŭ mirny praz vysokuju mijapiju (blizarukaść) -6,5 na abodva voki.

Ja spakojna pajšoŭ, bo dumaŭ, što budu nieprydatny praz zdaroŭje. Ale bam — vyjaviłasia, što ciapier ja prydatny pry -7. Nieŭzabavie zabiaruć słužyć.

U lutym 2023 u Biełarusi pierahledzieli patrabavańni da prydatnaści pryzyŭnikoŭ.

Zhodna z pastanovaj Minabarony i Ministerstva achovy zdaroŭja, źmieny zakranuli 22 pazicyi z 89 u śpisach chvarob pry vyznačeńni katehoryi prydatnasc. Siarod ich:

• branchijalnaja astma;
• płoskastupniovaść i inšyja defarmacyi stupni;
• chvaroby piečani, žoŭcievyvodnych šlachoŭ, padstraŭnikavaj załozy;
• chvaroby paražniny nosa, kalanosavych pazuch, hłotki, alerhičnyja rynity;
• hiemaroj;
• defarmacyi, chvaroby pazvanočnika i ich nastupstvy;
• chvaroby mužčynskich pałavych orhanaŭ;
• arteryjalnaja hipiertenzija i h. d.

Naprykład, kali raniej pry blizarukaści luboha voka, bolšaj za 6,0 i da 8,0 dyjoptryj, paznačaŭsia status «nieprydatny ŭ mirny čas», to ciapier «prydatny z abmiežavańniami».

Słužyć (status «prydatny ź niaznačnymi abmiežavańniami») možna budzie ź niekatorymi prykmietami płoskastupniovaści, z dyjahnazam «branchijalnaja astma» pry adsutnaści prystupaŭ na praciahu piaci hadoŭ, a taksama z hiemarojem biez vypadzieńnia vuzłoŭ.

Źmianilisia patrabavańni i ŭ płanie vahi. Raniej hramadzianie z masaj cieła bolšaj za 90 kh byli nieprydatnyja da vajskovaj słužby ŭ siłach śpiecyjalnych apieracyj. Ciapier płanku padniali da 100 kh.

Słužyć «ź niaznačnymi abmiežavańniami» zmohuć i ludzi z atłuścieńniem II stupieni ź indeksam masy cieła bolšym za 37 kh/m2.

Poŭny pieralik možna znajści tut.

Vajskovaje i miedycynskaje viedamstva stali pracavać nad źmianieńniem patrabavańniaŭ da stanu zdaroŭja pryzyŭnikoŭ nibyta praz «vialikuju kolkaść zvarotaŭ ad hramadzian, jakija ličać, što patrabavańni da stanu zdaroŭja značna zavyšanyja i nie dazvalajuć maładym ludziam realizoŭvać maru stać vajskoŭcami».

Na pytańnie, ci pojdzie surazmoŭca słužyć u vojska, jon adkazvaje śćviardžalna.

— Jość šerah rečaŭ, vyšejšych za mianie, i kab realizavać svaje płany ŭ budučyni, na žal, ja nie stanu ŭciakać. 

Pry hetym małady čałaviek upeŭnieny: na jaho zdaroŭje słužba ŭ vojsku naŭrad ci adabjecca stanoŭča (prablemy, praź jakija raniej jon nie byŭ prydatny, nie źnikli), na jaho pracy — taksama. Chacia ciapier jon na benčy, naš surazmoŭca baicca, što praz hod jamu składana budzie pracaŭładkavacca.

27-hadovy (na momant atrymańnia pozvy jamu było 26) Źmicier paviedamlaje, što pozva pryjšła pa miescy prapiski. Kala 5 hadoŭ tamu małady čałaviek prajšoŭ miedkamisiju — zafiksavali skalijoz i kifoz treciaj stupieni.

— Minułaha razu doktar kazaŭ, što sa skalijozam, jak u mianie, słužyć možna, ale z kifozam — nie. Ja vyrašyŭ źvierycca ź instrukcyjaj, raptam niešta źmianiłasia. I voś ža — ja prydatny. A śpina čamuści balić, voś niaŭdača.

Taksama napisali dva čytačy, jakija nie padpadajuć pad pryzyŭ na terminovuju słužbu. Ich paklikali na źvierku danych i «nie zbory, a zaniatki».

25-hadovy Viačasłaŭ (u čynie jafrejtara paśla terminovaj słužby) raspavioŭ, što jamu na pracu patelefanavali z vajenkamata jašče ŭ dvaccatych čysłach vieraśnia.

— Jak mnie potym patłumačyli, mianie paprasili pryjechać u kankretny dzień, a 9:00 z vajskovym biletam — ale heta, typu, nie zbory, a «niejkija zaniatki».

Tak supała, što hety naš surazmoŭca taksama byŭ u adpačynku, tamu mierapryjemstva prapuściŭ. Jon kaža, što praciahu historyja pakul nie atrymała — jamu nie telefanavali, pozvaŭ bolš nie dasyłali. 

47-hadovy Leŭ (aficer zapasu paśla vajskovaj kafiedry, u vojsku nikoli nie słužyŭ) paviedamiŭ, što jamu taksama pryjšła dniami pozva z patrabavańniem źjavicca «dla źvierki źviestak». Takaja ž papierka prychodziła i paŭhoda, i hod tamu, ale ŭ hetaj, u adroźnieńnie ad papiarednich, «byli pieraličanyja dakumienty, jakija treba prynieści». Na žal, daviedacca, ci chadziŭ čytač na źvierku, nie ŭdałosia — jon bolš nie adkazvaje.

• 0
• 0
• 1
• 1
• 1
• 4
• 8
• 0