Hardyjan: Zatrymany ŭ Banhkoku samalot moh lacieć ź Biełarusi

Zamiežnaja presa publikuje roznyja viersii pachodžańnia zbroi, partyja jakoj znachodziłasia na borcie zatrymanaha 12 śniežnia ŭ Tajłandzie samalota Ił‑76.

Tak, brytanskaja hazieta «Hardyjan» sa spasyłkaj na svaje ŭkrainskija krynicy śćviardžaje, što adpraŭnym punktam palotu Ił‑76 była Biełaruś, a ŭ Kijevie jon usiaho tolki sadziŭsia na dazapraŭku na šlachu ŭ Paŭnočnuju Kareju. Pry hetym, zaznačaje vydańnie, zahruzka 40 ton zbroi i bojeprypasaŭ była ažyćcioŭlena ŭ Pchieńjanie.

Razam z tym vyśvietliłasia, kamu naležaŭ zatrymany samalot. Jak paviedamlaje interniet‑vydańnie Times Online sa spasyłkaj na ekśpierta pa zbroi Stakholmskaha instytuta daśledavańnia prablem miru Chju Hryfitsa, da viasny 2009 hoda Ił‑76 z bartavym numaram 4L‑AWA naležaŭ kazachstanskaj pryvatnaj avijakampanii East Wind. Zatym jaho nabyła inšaja kazachstanskaja avijakampanija Beirbas, źviazanaja ź sierbskim handlarom zbrojaj Tamisłavam Damnianavičam. U kastryčniku hetaha hoda samalot byŭ pradadzieny hruzinskaj avijakampanii Air West Georgia, jakaja addała jaho ŭ lizinh kampanii SP Traiding Ltd., zarehistravanaj u Novaj Ziełandyi. Pry hetym Hryfits śćviardžaje, što raniej samalotam vałodała adna z kampanij Viktara Buta, rasijskaha handlara zbrojaj, jaki znachodzicca zaraz u tajskaj turmie.

Jak zaznačyŭ Hryfits, prodaž samalota hruzinskaj avijakampanii byŭ tolki prykryćciom, i sudna praciahvajuć vykarystoŭvać kryminalnyja struktury dla pastavak zbroi.

Livanskaje vydańnie The Daily Star sa spasyłkaj na krynicy ŭ raźviedcy śćviardžaje, što zbroja mahła pryznačacca dla terarystyčnaj arhanizacyi «Chizbała».

Krynica haziety taksama nie vyklučyła vierahodnaści taho, što častka hruzu mahła być dastaŭlena ŭ siektar Haza.

***

Nahadajem, samalot Ił‑76 (bartavy numar 4L‑AWA), zarehistravany ŭ Hruzii, amal z 40 tonami zbroi, u tym liku ručnymi hranatamiotami i pieranosnymi zienitna‑rakietnymi kompleksami, byŭ zatrymany 12 śniežnia ŭ Banhkoku, dzie pryziamliŭsia dla dazapraŭki. Zatrymany piać členaŭ ekipaža — čaćviora hramadzian Kazachstana i hramadzianin Biełarusi. Biełarus Michaił Pietuchoŭ 1955 hoda naradžeńnia pracavaŭ bortinžynieram.

14 śniežnia kryminalny sud Banhkoka pastanaviŭ uziać pad vartu ekipaž samalota i pradoŭžyŭ termin jaho zatrymańnia na 12 dzion.

Ekipažu vystaŭlena abvinavačańnie ŭ nielehalnaj transparciroŭcy zbroi i davańni padmannaj infarmacyi ŭładam Tajłanda ab charaktary hruzu.

Zhodna z tajskimi zakonami, lotčykam pahražaje pažyćciovy turemny termin.

Členy ekipaža śćviardžajuć, što nie viedali pra charaktar hruzu. Pavodle ich słoŭ, jany pieravozili abstalavańnie dla bureńnia naftavych śvidravin.

Tajłand rychtuje dakład dla AAN pa fakcie zatrymańnia samalota sa zbrojaj na borcie, jaki lacieŭ z Paŭnočnaj Karei. Kali ŭdasca dakładna ŭstanavić, što zbroja była zahružana ŭ samalot u Paŭnočnaj Karei, palot vajenna‑transpartnaha samalota Ił‑76 budzie razhladacca jak parušeńnie sankcyj AAN suprać KNDR.

Tajłandskija ŭłady majuć namier taksama zapytać u AAN srodki dla źniščeńnia zbroi.

• 0
• 0
• 0
• 0
• 0
• 0
• 0
• 0