Baza danych DNK budzie vykarystoŭvacca dla baraćby z sabačymi fiekalijami ŭ francuzskim horadzie
Uładalniki sabak u paŭdniovafrancuzskim horadzie Bieźje (Béziers) buduć abaviazanyja mieć pry sabie «hienietyčny pašpart» svajho hadavanca ŭ ramkach vyprabavalnaj schiemy, kab pamienšyć kolkaść sabačych ekskremientaŭ na vulicach.
Miascovy mer Robiert Mienar (Robert Ménard), były žurnalist i suzasnavalnik «Reparcioraŭ bieź miežaŭ», kaža, što žycharam i haściam nadakučyli fiekalii na tratuarach horada. Jon płanuje pravieści dvuchhadovy ekśpierymient, kab adsočvać i štrafavać tych, chto nie prybiraje za svaimi hadavancami.
Zhodna z płanam, uładalniki sabak pavinny buduć advieźci svaich hadavancaŭ da vieterynara dla biaspłatnaj proby śliny i analizu DNK, pra što ŭładalniku budzie vydadzieny dakumient. Asoby, jakich paśla spynili biez hienietyčnaha pašparta sabaki, buduć aštrafavanyja na 38 jeŭra.
U budučyni sabačyja ekskremienty, nie prybranyja i znojdzienyja na tratuary, buduć pravieranyja, a padrabiaznaja infarmacyja adpraŭlenaja ŭ palicyju, jakaja ŭ svaju čarhu praz nacyjanalny rejestr svojskich žyvioł supastavić ich z kankretnym uładalnikam. U takim vypadku parušalnik čyścini sutykniecca z rachunkam za pryborku vulic u pamiery da 122 jeŭra.
Upieršyniu Mienar prapanavaŭ sabrać DNK kala 1500 sabak u centry Bieźje ŭ 2016 hodzie, ale jaho prośba była adchilenaja miascovym administracyjnym sudom jak zamach na asabistuju svabodu. Tady schiema kaštavała b biudžetu 50 000 jeŭra ŭ hod.
Novy prajekt hienietyčnaha pašparta byŭ pradstaŭleny miascovaj prefiektury ŭ pačatku hetaha hoda — i hetym razam nie było vykazana nijakich piarečańniaŭ suprać jaho realizacyi. Pavodle słoŭ mera, ekśpierymient pradoŭžycca da lipienia 2025 hoda.
«Budzie peŭnaja pabłažlivaść dla tych, chto nie ź Bieźje. Kali jany źbirajuć brud svajho sabaki, my nie budziem ich turbavać. My nie ksienafoby. Prablema nie ŭ zamiežnikach, a ŭ miascovych, jakija nie prybirajuć», — pieradaje słovy Mienara The Guardian.
Darečy, ideja heta nie novaja. U 2015 hodzie ŭ Vialikabrytanii paviedamlałasia, što rada akruhi Flintšyr na poŭnačy Uelsa razhladaje mahčymaść vykarystańnia bazy DNK dla baraćby z sabačym biesparadkam, hetak ža jak i na vyśpie Uajt i ŭ Łankašyry, dzie taksama abmiarkoŭvali vykarystańnie hienietyčnaha testavańnia.
Ciapier čytajuć
Muž hałoŭnaj hieraini prapahandysckaha filma BT skončyŭ žyćcio samahubstvam5
Kamientary