Kolki kaštuje luboŭ?

Na navinnaj stužcy zaŭvažyŭ: Rasija vydaść 50 miljonaŭ dalaraŭ dapamohi vyspavaj dziaržavie Nauru za pryznańnie — kaho b vy dumali? — Abchazii i Paŭdniovaj Asiecii. Voś ličba, jakaja pavinna być u natatniku kožnaha biełaruskaha pieramoŭščyka z Maskvoj.

Patłumaču, čamu. Ab tym, što Rasija subsiduje biełaruski ekanamičny cud, u Maskvie nie razvažaŭ apošnimi hadami tolki lanivy. Razvažaŭ i pytaŭsia: a ci treba? A ci nie pryjšoŭ čas adździalić much ad katlet?

Aŭtarytetny rasijski analityk Siarhiej Łukjanaŭ ličyć: kali Rasija choča być mocnaj fihuraj na šachmatnoj došcy suśvietnaj palityki, musić finansava padtrymlivać sajuźnikaŭ. Maŭlaŭ, vuń jak ZŠA subsidujuć Izrail! Ci prysłuchoŭvajucca da mierkavańniaŭ Łukjanava ŭ Kramli — nieviadoma. Ale samo za siabie kaža toje, što navat praz try hady paśla pieršaha źviadzieńnia rachunkaŭ Minsk praciahvaje (chacia i nie bieź ciažkaściaŭ) atrymlivać ad Kramla roznaha kštałtu finansavyja bonusy. Papularny rasijski błohier i publicyst mister Parkier (Maksim Kananienka) pabłažliva piša (Vładimir Vładimirovič TM): usio roŭna my ich kupim.

U pryncypie, heta tak. Pytańni tut tolki dva: što «kupim» i za jaki košt. Viadoma, što ŭ lubovi za hrošy dziejničaje ŭniviersalny pryncyp: impatent płacić za pasłuhi bolš, čym pryvabny mača (źnižki apošniamu mohuć dasiahać 100 adsotkaŭ).

U intervjui «Jeŭrańjuz» prezident Ekvadora nie zbajaŭsia vystupić u padtrymku Irana ŭ suviazi ź jadziernaj prahramaj apošniaha. Jon taksama paćvierdziŭ, što Ekvador čakaje ad Tehierana 100-miljonny kredyt. Voś tak bieź piać chvilinaŭ suśvietny izhoj Iran nabyvaje ŭ krytyčny dla siabie momant łajalnaść krainy, prezident jakoj chacia i viadomy svoim antyamierykanizmam, ale ž dobra razumieje, jakim bokam možie vyleźci hetaje kazytańnie niervach supierdziaržavy.

Ministru zamiežnych spravaŭ Rasii Łaŭrovu i jahonym padnačalenym treba pavučycca ŭ svaich iranskich kalehaŭ. MZS krainy «Vialikaj vaśmiorki» zdoleŭ vytarhavać łajalnaść va ŭsich sensach karlikavaj krainy (płošča — 21,3 kvadratnyja kiłamietry, nasielnictva — 14000 čałaviek, niama navat stalicy; heta prykładna adpaviadaje našamu bujnomu sielsavietu) i mižnarodnaja vaha jakoj nabližajecca da absalutnaha nula, za šalonyja hrošy — 3571 dalar na kožnaha jaje žychara! Vučycieś, Kisa! Łajalnaść Nikarahua pa tym samym pytańni kaštavała Rasii značna bolš — kredyt u adzin miljard dalaraŭ. Ale ž i kraina bolšaja: 5,9 młn žycharoŭ (heta značyć usiaho pa 169 dalaraŭ kožnamu).

Voś u hetych ramkach i pavinny iści pieramovy z Maskvoj.

Nasielnictva Biełarusi pa dadzienych Biełstata składaje 9 miljonaŭ 663 tysiačy 400 čałaviek (na 1 vieraśnia 2009 hoda). Kali prymianiać nikarahuanskuju taksu, to kredyt za paskareńnie pracy nacyjanalnaha schodu pa pryznańni Abchazii i Paŭdniovaj Asiecii pavinien składać krychu bolš za 1 miljard 628 miljonaŭ dalaraŭ (darečy, amal stolki ž i prasili!). Nu, a kali zdolejem dacisnuć Kreml pa «schiemie Nauru», to rasijskija finansy schudniejuć na tryccać čatyry z pałovaj miljardy.

U lubym vypadku, kolišniaja zajava rasijskaha ministra enierhietyki Siarhieja Šmatko nakont taho, što ilhotnyja ceny na naftu zachavajucca tolki ŭ vypadku ŭvachodžańnia rasijskaj kampanii ŭ naftavuju infrastrukturu na terytoryi Biełarusi, — śmiechu vartaja.

P. S. : I jašče adna karysnaja parada łukašenkaŭskim piermoŭščykam (ź Viktara Šałkieviča): «Nie davajsia nikoli za tak!»

• 0
• 0
• 0
• 0
• 0
• 0
• 0
• 0