Balničnyja chutka buduć ličyć pa-novamu. Kamu zapłaciać bolš?

Zamiest 6 miesiacaŭ buduć uličvać 18

Novyja praviły źmiaščajucca ŭ pastanovie ŭrada ad 30 śniežnia 2022 hoda №945.

Ciapier pry raźliku balničnaha ŭličvajucca vypłaty za apošnija paŭhoda pierad miesiacam, u jakim rabotnik zachvareŭ.

Z nastupnaha hoda raźlikovy pieryjad prykmietna vyraście — jon budzie składać 18 miesiacaŭ pierad kvartałam, u jakim rabotnik pajšoŭ na balničny. U raźlikovy pieryjad nie buduć uklučać čas, kali ŭ rabotnika byŭ prastoj abo vodpusk za svoj košt pa inicyjatyvie najmalnika, kali supracoŭnik byŭ na balničnym abo atrymlivaŭ inšyja sacyjalnyja vypłaty.

U Minpracy tłumačyli heta tym, što zaraz atrymajecca paźbiehnuć vypadkaŭ, kali siaredniadzionny zarobak štučna zavyšaŭsia. 

Vyraście minimalnaja vypłata

Adna z hałoŭnych navin zakranie tych, chto moža pretendavać tolki na minimalnuju vypłatu pa balničnym.

Ciapier supracoŭniki, jakija prapracavali mienš za 6 miesiacaŭ z vypłataj uznosaŭ u FSAN, atrymlivajuć 50% biudžetu pražytačnaha minimumu ŭ siarednim na dušu nasielnictva (183,9 rubla). 

Z nastupnaha hoda minimalny balničny pryviažuć da minimalnaj zarpłaty pa krainie. Nižej za minimałku pry pracy na poŭnuju staŭku płacić nie mohuć. Hety pakazčyk ustanaŭlivajecca ŭradam z 1 studzienia kožnaha hoda, potym na praciahu hoda sumu mohuć praindeksavać z ulikam rostu cen.

Minimalny zarobak u krainie zaraz składaje 554 rubli. Z 1 studzienia 2024 hoda va ŭradzie abiacali pavysić jaho da 626 rubloŭ. 

Pavialičycca siaredniadzionny zarobak

Pry raźliku balničnaha buduć uličvać razavyja vypłaty. Naprykład, kali vam dali matdapamohu abo hrošy na azdaraŭleńnie (navat kali heta byŭ vaš były pracadaŭca; hałoŭnaje, kab vypłaty byli ŭ raźlikovym pieryjadzie — za papiarednija 18 miesiacaŭ).

Z 1 studzienia hetyja sumy dapamohuć pavialičyć siaredniadzionny zarobak, a značyć, i sumu balničnaha.

Raźlikami zaraz buduć zajmacca terytaryjalnyja orhany FSAN, a nie najmalnik. 

Rabotnikam sa stažam zapłaciać bolš

Dobraja navina dla tych, chto pracuje 10 hadoŭ i bolš. Im ź pieršaha dnia chvaroby buduć naličvać 100 pracentaŭ siaredniadzionnaha zarobku. 

Ciapier staž rabotnika nijak nie ŭličvajecca i ni na što nie ŭpłyvaje ŭ płanie balničnych, umovy va ŭsich adnolkavyja. Pieršyja 12 dzion davodzicca chvareć z 80% siaredniadzionnaha zarobku, i tolki potym pačynajuć viartać 100%.

A tym, chto zachvareŭ, ale pracuje mienš za 10 hadoŭ, daviadziecca raźličvać tolki na 80% zarobku. Niavažna, kolki dzion taki rabotnik budzie na balničnym, vypłaty buduć raźličvacca niaźmienna. 

Ničoha nie źmienicca dla tych, chto ź pieršaha dnia maje prava na dapamohu ŭ pamiery 100% siaredniadzionnaha zarobku (dapamoha pa dohladzie za dziciem, pa ciažarnaści i rodach i h. d.). Dla donaraŭ i čarnobylcaŭ taksama ničoha nie mianiajecca. U niekatorych vypadkach (naprykład, pry parušeńni balničnaha režymu) mohuć pryznačyć tolki 50% ad dapamohi — hetaje praviła zachoŭvajecca. 

Šmat u kaho budzie adzin balničny

Pa novych praviłach, dapamoha pa časovaj niepracazdolnaści budzie pryznačacca pa asnoŭnym miescy pracy. Ale ŭ raźlikach buduć uličvać zarobak va ŭsich najmalnikaŭ. Hetyja danyja najmalnik atrymaje ad FSAN. 

Ciapier kožny najmalnik vypłočvaje dapamohu asobna. 

Ale dla niekatorych padpracovak ničoha nie źmienicca. Kali na asnoŭnaj pracy vy zaklučyli pracoŭny dahavor, a ŭ inšych miescach padzarablajecie pa dahavorach padradu, to dapamoha budzie pryznačacca asobna. 

Što, kali na adnu pracu pryjści, a na inšuju nie

Tady rabotnik uvohule pazbavicca vypłat. Kali na adnym miescy vy prynieśli listok niepracazdolnaści, a na druhim praciahvali pracavać, to balničny nie apłaciać. Hetaje praviła nie budzie raspaŭsiudžvacca na balničny, jaki vydadzieny ŭ suviazi ź ciažarnaściu i rodami. 

Pakul što dapamoha vypłočvajecca, navat kali na druhuju pracu vy praciahvali spraŭna chadzić.

• 2
• 0
• 1
• 5
• 5
• 2
• 9
• 0