Viarchoŭny sud vyzvaliŭ palitźniavolenuju Taćcianu Pyćko, a jaje mužu źmienšyŭ termin pakarańnia
Apielacyjnyja skarhi na prysud Viciebskaha abłasnoha suda ŭ dačynieńni da žurnalistaŭ-sužencaŭ Taćciany Pyćko i Viačasłava Łazarava ŭ zakrytym režymie razhladaŭ sudździa Viarchoŭnaha suda Juryj Rutkoŭski. Zdaryłasia niezvyčajnaja dla ciapierašniaj sudovaj sistemy Biełarusi reč: Rutkoŭski pierakvalifikavaŭ skład złačynstva, pavodle jakoha asudzili sužencaŭ. Novy vyrak im vyniesieny pavodle č. 3 art. 361-1 Kryminalnaha kodeksa, piša Biełaruskaja asacyjacyja žurnalistaŭ.
Pra vyniki siońniašniaha sudovaha razhladu słužbie manitorynhu BAŽ paviedamiŭ pravaabaronca Pavieł Levinaŭ.
Pavodle aznačeńnia kalehii pa kryminalnych spravach Viarchoŭnaha suda, Viačasłaŭ Łazaraŭ maje adbyć 5 hadoŭ pazbaŭleńnia voli ŭ kałonii va ŭmovach ahulnaha režymu. Raniej sud pieršaj instancyi pryhavaryŭ jaho da piaci z pałovaj hadoŭ pazbaŭleńnia voli ŭ kałonii va ŭmovach uzmocnienaha režymu, pryznaŭšy vinavatym pavodle č. 2 i č.1 art. 361-4 KK — spryjańnie ekstremisckaj dziejnaści.
Taćcianu Pyćko sudździa abłasnoha suda Jaŭhien Burunoŭ raniej źvinavaciŭ pavodle č. 1 art. 361-4 KK (stvareńnie ekstremisckaha farmavańnia albo ŭdzieł u im), a vynikam zvarotu z apielacyjnaj skarhaj stała vyzvaleńnie z-pad varty.
Viarchoŭny sud prysudziŭ joj toje samaje pakarańnie — try hady pazbaŭleńnia voli ŭ kałonii ahulnaha režymu, ale z adterminoŭkaj vykanańnia pakarańnia na try hady.
Taćciana budzie vyzvalena z pad varty, jak tolki ŭ Viciebski SIZA dašluć adpaviednyja dakumienty ź Viarchoŭnaha suda.
Viciebskaha videaapieratara-fryłansiera Viačasłava Łazarava i jaho žonku Taćcianu Pyćko asudzili pa abvinavačańni ŭ supracy z telekanałam «Biełsat», pryznanym biełaruskimi ŭładami ekstremisckim farmavańniem: Viačasłava za videamateryjały, pakazanyja na telekanale, Taćcianu za toje, što dapamahała mužu padčas zdymak.
Praces u abłasnym sudzie taksama byŭ zakryty, tamu składana mierkavać, na jakich faktach bazujecca abvinavačańnie. Prysud Viciebskaha abłasnoha suda prahučaŭ 25 vieraśnia hetaha hoda. Biełaruskaja pravaabarončaja supolnaść pryznała sužencaŭ palityčnymi viaźniami.
Viačasłava Łazarava zatrymali 9 lutaha 2023 hoda ŭ Viciebsku paśla pieratrusu pa miescy rehistracyi. U jaho zabrali mabilnyja telefony i videakamieru. Taksama siłaviki praviali pieratrusy ŭ kvatery, jakuju zdymaŭ Łazaraŭ, i pa miescy rehistracyi jahonaj žonki Taćciany Pyćko, adkul zabrali noŭtbuk i dva telefony.
Žonku videaapieratara-fryłansiera zatrymali 6 červienia 2023 hoda — paśla čarhovaha pieratrusu ŭ jaje žylli. Na momant zatrymańnia Taćciana Pyćko była ŭ dekretnym adpačynku — hadavała ahulnuju ź Viačasłavam dačku, jakoj tady było 1 hod i 1 miesiac. Sacyjalnaja słužba zabrała dziaŭčynku, jaje spačatku źmiaścili ŭ dziciačuju abłasnuju lakarniu, potym dzicia zmahli zabrać pad apieku svajaki Taćciany. Dvaich starejšych dziaciej Taćciany ad pieršaha šlubu dahladaje ich rodny baćka.
Taćcianu Pyćko i Viačasłava Łazarava ŭtrymlivajuć u viciebskim SIZA. Im abodvum daviałosia pabyvać za kratami i raniej — paśla zatrymańniaŭ padčas pratestaŭ u 2020-m hodzie. Taćciana była asudžana da štrafu ŭ miežach administracyjnych spravaŭ za ŭdzieł u niesankcyjanavanych masavych mierapryjemstvach, Viačasłaŭ byŭ zatrymany ŭ dzień prezidenckich vybaraŭ 9 žniŭnia, ale jaho adpuścili biez składańnia pratakoła. Uvosień taho ž hoda ŭ Łazarava pryviali pieratrus i zatrymlivali jašče trojčy, ale da sudu sprava nie dachodziła taksama.
Da taho, u 2018-2019 hadach videaapieratara niekalki razoŭ štrafavali za supracoŭnictva z zamiežnym ŚMI biez akredytacyi ŭ MZS pavodle art. 22.9 KaAP.
Paśla vystupleńnia Łuhanskaha teatra ŭ Minsku adna z hladačak vyhuknuła «Słava Ukrainie!»3
Kamientary