Amatary śpievaka Viktara Coja dabilisia taho, kab staličnyja ŭłady adnavili «ścianu Coja» ŭ Minsku. Pra heta paviedamiŭ Andrej Kim.
Nahadajem, 4 śniežnia ŭ Minharvykankam byli nakiravanyja 1.990 podpisaŭ minčan z patrabavańniem adnavić «ścianu Coja». U vieraśni 2008 hoda dva frahmienty «ściany Coja», jaki raźmiaščalisia za budynkam Pałaca Respubliki ŭ Minsku, byli demantavanyja «ŭ suviazi z budaŭnictvam na jaje miescy novaha budynka».
Pavodle słoŭ Kima, akramia podpisaŭ u Minharvykankam było nakiravana taksama niekalki socień listoŭ z patrabavańniem adnavić «ścianu Coja». «U paniadziełak, 21 śniežnia, na zvarot byŭ atrymany adkaz ź Minharvykankama. U im havorycca, što miesca dla raźmiaščeńnia «ściany Coja» ŭzhodniena, i ŭžo dadziena ŭkazańnie administracyi Leninskaha rajona Minska na kankretnym miescy adnavić hetuju ścianu», — skazaŭ aktyvist.
Pavodle jaho słoŭ, ściana budzie raźmieščana ŭ centry horada ŭ skviery na skryžavańni vulic Biełaruskaj i Uljanaŭskaj, niepadalok ad stadyjona «Dynama».
«My sami prapanavali hetaje miesca, i jano nam vielmi padychodzić. Hetaje miesca lepšaje za raniejšaje», — adznačyŭ Kim.
Jon spadziajecca, što da nastupleńnia novaha hoda «ściana Coja» budzie stajać na novym miescy.
***
«Ściana Coja» — spantanny pomnik, jaki źjaviŭsia ŭ Minsku ŭ 1990 hodzie paśla śmierci lidera hurtu «Kino» Viktara Coja. Jana ŭjaŭlała saboj bietonnyja plity, na jakich pakłońniki muzykanta pakidali hrafici i pisali vieršy. Padobnyja ścieny isnujuć u mnohich haradach byłoha SSSR i źjaŭlajucca tradycyjnym miescam sustreč moładzi. U Minsku taki pomnik‑kłub pieršapačatkova raźmiaščaŭsia na Kastryčnickaj płoščy pobač z Pałacam Respubliki, jaki budavaŭsia. U suviazi z zaviaršeńniem budaŭnictva ŭ 1997 hodzie bolšaść plit vyrašana było ŭbrać z płoščy. Dźvie ź ich byli pieraniesienyja za muziej Vialikaj Ajčynnaj vajny, na vulicu Internacyjanalnaja, dzie ściana stajała da vieraśnia 2008 hoda.
Kamientary