U Ekvadory zabili viadomaha prakurora, jaki rasśledavaŭ napad na miascovy telekanał
Siezar Suares paśpieŭ dapytać usich zatrymanych, i jaho zastrelili, kali jon jechaŭ u svaim aŭtamabili na sudovaje pasiedžańnie.
Za prakuroram z momantu jaho vychadu z budynka sudovaj palicyi, dzie znachodzicca jahony ofis, išli nieviadomyja. Napiaredadni jon pryznaŭsia ŭ intervju, što ŭ jaho niama ciełaachoŭnika ad palicyi, piša «Radyjo Svaboda».
Suares paśpieŭ dapytać usich 13 zatrymanych pa spravie ab napadzie na telekanał i vyśviatlaŭ, chto zamoviŭ napad. 9 studzienia ŭzbrojenyja ludzi ŭ maskach uvarvalisia ŭ studyju telekanała TC u Huajakili padčas pramoha efiru. Jany zahadali ŭsim lehčy na padłohu. Za kadram byli čutnyja streły, tranślacyja pierarvałasia. Pa zajavie palicyi, u zatrymanych kanfiskavali ahniastrelnuju zbroju, dźvie hranaty i ŭzryŭčatku. Usie supracoŭniki telekanała žyvyja.
Raniej Suares zajmaŭsia rasśledavańniem inšych spraŭ, źviazanych ź niezakonnym abarotam narkotykaŭ i karupcyjaj. Hienieralny prakuror Ekvadora Dyjana Sałazar, vykazvajučy spačuvańni siamji Suaresa, zaklikała palicyju harantavać biaśpieku «tych, chto vykonvaje svaje abaviazki».
U Ekvadory z pačatku studzienia dziejničaje nadzvyčajnaje stanovišča, jakoje ŭklučaje kamiendanckuju hadzinu ŭ načny čas. Jaho ŭvioŭ prezident krainy ŭ adkaz na napad na telekanał, zachop bolš za 200 supracoŭnikaŭ turmaŭ, vykradańnie palicyjantaŭ i vybuchi ŭ niekalkich haradach. Usplosk hvałtu ŭ Ekvadory adbyŭsia paśla ŭciokaŭ źniavolenych z turmaŭ.
«Usie ekstremisty ci ŭžo asudžanyja, ci źjaŭlajucca fihurantami spraŭ, jakija buduć razhledžany sudami». Švied padvodzić rysu pad represijami?9
Kamientary