У Эквадоры забілі вядомага пракурора, які расследаваў напад на мясцовы тэлеканал
Сезар Суарэс паспеў дапытаць усіх затрыманых, і яго застрэлілі, калі ён ехаў у сваім аўтамабілі на судовае паседжанне.
За пракурорам з моманту яго выхаду з будынка судовай паліцыі, дзе знаходзіцца ягоны офіс, ішлі невядомыя. Напярэдадні ён прызнаўся ў інтэрв'ю, што ў яго няма целаахоўніка ад паліцыі, піша «Радыё Свабода».
Суарэс паспеў дапытаць усіх 13 затрыманых па справе аб нападзе на тэлеканал і высвятляў, хто замовіў напад. 9 студзеня ўзброеныя людзі ў масках уварваліся ў студыю тэлеканала TC у Гуаякілі падчас прамога эфіру. Яны загадалі ўсім легчы на падлогу. За кадрам былі чутныя стрэлы, трансляцыя перарвалася. Па заяве паліцыі, у затрыманых канфіскавалі агнястрэльную зброю, дзве гранаты і ўзрыўчатку. Усе супрацоўнікі тэлеканала жывыя.
Раней Суарэс займаўся расследаваннем іншых спраў, звязаных з незаконным абаротам наркотыкаў і карупцыяй. Генеральны пракурор Эквадора Дыяна Салазар, выказваючы спачуванні сям'і Суарэса, заклікала паліцыю гарантаваць бяспеку «тых, хто выконвае свае абавязкі».
У Эквадоры з пачатку студзеня дзейнічае надзвычайнае становішча, якое ўключае каменданцкую гадзіну ў начны час. Яго ўвёў прэзідэнт краіны ў адказ на напад на тэлеканал, захоп больш за 200 супрацоўнікаў турмаў, выкраданне паліцыянтаў і выбухі ў некалькіх гарадах. Усплёск гвалту ў Эквадоры адбыўся пасля ўцёкаў зняволеных з турмаў.
Цяпер чытаюць
Маладую беларуску пратрымалі ў расійскім СІЗА амаль 4 гады і апраўдалі. А кампенсацыю далі такую, нібыта ў твар плюнулі9
Каментары