U amierykanskim štacie Ałabama asudžanaha ŭpieršyniu pakarali śmierciu pry dapamozie čystaha azotu.
Kienet Judžyn Śmit, jakoha pryznali vinavatym u zabojstvie žančyny ŭ 1988 hodzie, sprabavaŭ asprečyć prysud, adnak usie try apielacyi byli adchilenyja, piša Bi-bi-si.
U 2022 hodzie Śmita ŭžo sprabavali pakarać śmierciu z dapamohaj śmiarotnaj injekcyi, adnak zrabić hetaha nie ŭdałosia — śpiecyjalisty, jakija pravodzili praceduru, nie zmahli trapić ihołkaj u vienu, a Śmit supraciŭlaŭsia, i zatym ordar na vykanańnie prysudu skončyŭsia (dajecca da 24 hadzin).
«Paśla sprobaŭ padmanuć sistemu, jakija tryvali bolš za 30 hadoŭ, Śmit adkazaŭ za svaje žudasnyja złačynstvy», — zajaviła hubiernatar Ałabamy Kej Ajvi.
Hienprakuror štata Styŭ Maršał zajaviŭ, što sposab pakarańnia byŭ «efiektyŭnym i humannym», adkinuŭšy abvinavačvańni ŭ žorstkim abychodžańni. «Pravasudździe pieramahło»,— zajaviŭ jon.
Ułady štata zajaŭlali, što Śmit pavinien byŭ stracić prytomnaść na praciahu niekalkich siekund i pamierci praź niekalki chvilin.
Pracedura pačałasia ŭ 19:56 pa miascovym časie, praz 29 chvilin daktary kanstatavali śmierć Śmita.
Na źniavolenaha nadzieli masku, praź jakuju ŭ arhanizm pačaŭ pastupać čysty azot — pry traplańni ŭ lohkija jon vyciaśniaje kisłarod, u vyniku čaho nastupaje hipaksija i śmierć.
«Siońnia Ałabama prymusiła čałaviectva zrabić krok nazad, — skazaŭ Śmit pierad vykanańniem prysudu. — Dziakuj, što padtrymali mianie. Lublu vas».
Śviedkami pakarańnia stali piać pradstaŭnikoŭ ŚMI. Pierad pakarańniem śmierciu Śmita naviedvali členy siamji, dvoje siabroŭ, duchoŭny nastaŭnik i advakat.
Mietad pakarańnia asudzili niekatoryja miedycynskija śpiecyjalisty — jany papiaredzili ab niebiaśpiecy katastrafičnych nastupstvaŭ dla arhanizmu asudžanaha.
Na minułym tydni Viarchoŭny kamisar AAN pa pravach čałavieka zaklikaŭ spynić vykanańnie prysudu, zajaviŭšy, što pakarańnie šlacham udychańnia azotu možna pryraŭniać da katavańniaŭ i žorstkaha abychodžańnia ŭ adpaviednaści ź mižnarodnym pravam.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary