Uładzisłaŭ Kavaloŭ žyŭ jašče dva miesiacy paśla aficyjnaj daty jaho rasstrełu?

Pa-pieršaje, «Kibierpartyzany» vystavili elektronnuju kopiju tekstu śmiarotnaha prysudu, vyniesienaha 30 listapada 2011 hoda abvinavačanym u vykanańni terakta Dźmitryju Kanavałavu i Uładzisłavu Kavalovu.

Ale kudy bolšuju cikavaść vyklikaje toje, što, jak śćviardžajuć «Kibierpartyzany», daty śmierci abodvuch asudžanych, jakija fihurujuć u AIS «Pašpart», razychodziacca z aficyjna abvieščanymi ŭładami.

Tak, pavodle sistemy AIS «Pašpart» Kanavałaŭ pamior 14 sakavika 2012 hoda, a Kavaloŭ — 15 maja 2012 hoda. U toj ža čas aficyjnaja data śmierci abodvuch — 16 sakavika 2012 hoda.

Asabliva intryhuje heta ŭ vypadku Uładzisłava Kavalova, bo data razychodzicca nie na dva dni, jak u Kanavałava, a až na dva miesiacy. Da taho ž zafiksavanaja ŭ AIS «Pašpart» data — nie raniejšaja, a paźniejšaja za aficyjnuju.

Kali sprava tut nie ŭ banalnaj pamyłcy, kali sakavik pierabłytali z majem — heta taksama, vidać, moža być, — to možna tolki rabić zdahadki, dziela čaho takija manipulacyi mahli spatrebicca ŭładam. Adrazu ž prychodzić da hałavy asacyjacyja, što padobnyja padychody praktykavalisia stalinskimi enkavedzistami padčas «Vialikaha teroru» 1930-ch hadoŭ. Tady, naprykład, niekatorych viaźniaŭ minskaj «Amierykanki», aficyjna rasstralanych, jašče peŭny čas trymali žyvymi, vybivajučy ź ich novyja pakazańni i stvarajučy śpiecyjalnyja «asobyja karpusy».

Asudžanyja ŭ «asobym korpusie» viedali pra śmiarotny prysud sabie, ale im kazali, što jany mohuć zasłužyć jaho pierahlad, mohuć zachavać žyćcio, kali dapamohuć NKVD u vykryćci inšych «vorahaŭ naroda». Ad ich dabivalisia pakazańniaŭ na maksimalnuju kolkaść ludziej. Im padsadžvali viaźniaŭ, kab jany ich «raskručvali» na «pryznańni». Źniavolenych bili kanviejeram pa 24 hadziny.

Nibyta adnym z takich viaźniaŭ byŭ Branisłaŭ Taraškievič.

Viedajučy, što siłaviki łukašenkaŭskaha režymu adčuvajuć siabie duchoŭnymi naščadkami kolišnich stalinskich kataŭ, a ich kiraŭnictva pazbaŭlenaje ŭsialakich maralnych aryjenciraŭ, całkam možna było b dapuścić, što praktyka papiarednikaŭ mahła b imi być pryniataja na ŭzbrajeńnie i ŭ novych umovach.

Praŭda, uźnikaje pytańnie, dziela jakich praktyčnych metaŭ takoje treba było b rabić z Uładzisłavam Kavalovym? Jakuju infarmacyju ad jaho mahli ŭ pryncypie atrymać, i navošta dla hetaha byli b patrebnyja takija padychody? Uličvajučy toje, što nijakimi farmalnymi terminami, na praciahu jakich musiła być vykananaje pakarańnie śmierciu, siłaviki źviazanyja nie byli, a nijakaha hramadskaha kantrolu za ich dziejańniami ŭ Biełarusi nie było i tady — mahli rabić usio što chacieli. Dy i raskručvać tuju spravu dalej, uciahvajučy ŭ varonku inšych ludziej, paśla nie stali.

Pakul što na hetyja pytańni atrymać adkaz naŭrad ci mahčyma. Možna kanstatavać tolki, što źjaŭlajecca jašče adna zahadka biez harantyi, što niekali jana budzie razhadanaja.

• 14
• 4
• 8
• 21
• 33
• 118