Rasstreł. U Słucku vyniesieny prysud baćkam, jakija zakatavali trochhadovaha syna

Sudździa zadavoliła zapros prakurora i prysudziła mužčynu vyklučnuju mieru pakarańnia, a žančynie — 25 hadoŭ kałonii strohaha režymu. Heta maksimalna mahčymaje pakarańnie dla žančyny ŭ Biełarusi.

Razhlad kryminalnaj spravy pačaŭsia 3 kastryčnika. Alaksandra i Anastasiju Taratutaŭ abvinavačvali ŭ katavańni i zabojstvie z asablivaj žorstkaściu trochhadovaha syna Siamiona. Kryminalnuju spravu razhladaŭ Minski abłasny sud na vyjaznym pasiadžeńni ŭ Słucku.

Muža i žonku sudzili pavodle dvuch artykułaŭ Kryminalnaha kodeksa:

— č. 2 art. 154 (naŭmysnaje pryčynieńnie praciahłaha bolu, pakut sposabami, jakija vyklikajuć asablivyja fizičnyja i psichičnyja pakuty, sistematyčnaje naniasieńnie pabojaŭ (katavańnie), ździejśnienaje ŭ dačynieńni da zaviedama niepaŭnaletniaha, asoby, jakaja znachodzicca ŭ biezdapamožnym stanie i ŭ zaležnym stanoviščy);

— p. 2, 6, 15 č. 2 art. 139 (naŭmysnaje supraćpraŭnaje pazbaŭleńnie žyćcia inšaha čałavieka (zabojstva), zaviedama małaletniaha, asoby, jakaja znachodzicca ŭ biezdapamožnym stanie, ździejśnienaje z asablivaj žorstkaściu, hrupaj asob).

Psichołaha-psichijatryčnaja ekśpiertyza pryznała abaich adekvatnymi.

U paniadziełak u sudzie razhladali apieratyŭnyja materyjały śledstva, kali abvinavačany davaŭ pakazańni na miescy złačynstva — u kvatery, dzie adbyłosia zabojstva chłopčyka. Abvinavačany, jakoha dla dačy pakazańniaŭ na miescy pryvieźli ŭ kajdankach i pad kanvojem, pakazaŭ śledčym na maniekienie i raspavioŭ, jak biŭ dzicia tapkam, rukami, ale čaściej — nahoj.

Jak vynikaje ź videa, jakoje pakazali ŭ sudzie, abvinavačany kaža, što maleńki Siamion razdražniaŭ i jaho, i jahonuju žonku, bo «kraŭ sa stała i raźbivaŭ talerki». Alaksandr paviedamiŭ śledčym, što «pačaŭ bić Siamiona, kali tamu spoŭniłasia dva hady».

Niekatorym śviedkam, jakija byli ŭ zale suda, stanaviłasia błaha ad ubačanaha.

Prakuror zapytaŭ dla 48-hadovaha Alaksandra Taratuty rasstreł, a dla jaho 37-hadovaj žonki 25 hadoŭ źniavoleńnia ŭ kałonii strohaha režymu i lačeńnie ad ałkahalizmu.

U sieradu abvinavačanyja vystupili z apošnim słovam. 

Alaksandr Taratuta škadavaŭ, što jaho žyćcio tak skłałasia. Jon uspomniŭ svoj pieršy šlub, u jakim nie było skandałaŭ.

— Nijakich namieraŭ, zmoŭ nie było, — padkreśliŭ jon nakont situacyi sa śmierciu 3-hadovaha Siamiona. — Nie chacieŭ ja zabivać, nijakich takich dumak nie było.

Anastasija Taratuta vykłała svajo apošniaje słova piśmova. Sud, udakładniŭšy mierkavańni prakurora i advakata, admoviŭsia dałučać hety dakumient da materyjałaŭ spravy.

Žančynie jašče raz było prapanavana ahučyć usłych svaju pazicyju, pračytać jaje z papiery. Adnak jana naadrez admoviłasia začytvać napisanaje.

• 9
• 0
• 2
• 8
• 7