Pasoł pa asobych daručeńniach Ihar Kizim patłumačyŭ, z kim ź biełaruskaj apazicyi Kijeŭ budzie razmaŭlać
Pasoł pa asobych daručeńniach pa Biełarusi Ihar Kizim u intervju «Jeŭraradyjo» raspavioŭ pra pryčyny svajho pryznačeńnia na novuju pasadu, uzrovień adnosin z aficyjnym Minskam i kantakty z demakratyčnymi siłami Biełarusi.
Čamu zjaviłasia pasada pasła pa asobych daručeńniach pa Biełarusi
Jak patłumačyŭ Ihar Kizim, heta źviazana z tym, što ŭłady Ukrainy pryznali isnavańnie ŭ biełaruskaj apazicyi demakratyčnaj siły, jakaja znachodzicca za miažoju. «Ukraina pavinna naładzić niejki miechanizm supracoŭnictva ź biełaruskaj supolnaściu, jakaja budzie dapamahać zabiaśpiečyć našu miažu, i takim čynam vyrašyć pytańnie biaśpieki».
Ukrainski bok, adznačaje Kizim, razumieje, što demakratyčnyja siły Biełarusi — heta nie tolki centry ŭ Varšavie i Vilni. Jość jašče i Połk Kastusia Kalinoŭskaha. «Jany taksama namahajucca zrabić peŭny palityčny trek, — ličyć palityk. —
Chočam my taho ci nie, ja liču, što situacyja źmienicca. My pavinny dumać napierad i pavinny dakładna viedać i razumieć, što budzie ź Biełaruśsiu nie ŭ bližejšy čas, a paśla demakratyčnych pieraŭtvareńniaŭ, jakija, jak ja ŭpeŭnieny, adbuducca ŭ Biełarusi».
Na jakim uzroŭni znachodziacca dypłamatyčnyja adnosiny pamiž Kijevam i Minskam?
Paśla adjezdu Kizima funkcyi časovaha pradstaŭnika aŭtamatyčna staŭ vykonvać staršy dypłamat, jaki znachodzicca ŭ Minsku.
«Jon farmalna aficyjna pradstaŭlaje Ukrainu. Praź jaho moža adbyvacca lubaja kamunikacyja, kali niešta adbyvajecca pamiž ukrainskimi ŭładami i ciapierašniaj aficyjnaj uładaju Biełarusi. Tut šmat jakich pytańniaŭ. Naprykład, niadaŭna adbyvałasia kamunikacyja pa pytańni miažy. Było niejkaje techničnaje pytańnie adnosna taho, što miaža nie tak stajała, ci niešta takoha kštałtu».
Kizim taksama raspavioŭ, što kantakty mohuć tyčycca roznych konsulskich pytańniaŭ. Siarod ich — akazańnie dapamohi pa viartańni va Ukrainu.
«Vidavočna, što siońnia my nie havorym pra niejkija palityčnyja adnosiny. I ja mahu skazać, što i pra ekanamičnyja taksama. Jany ŭsie ciapier znachodziacca na paŭzie. Asabliva paśla taho, jak z terytoryi Biełarusi pačałosia ŭvarvańnie. Faktyčna jany źviedzieny da nula. Tamu treba havaryć pra vyrašeńnie pytańniaŭ konsulskaha charaktaru, jakija tyčacca kankretnych ludziej», — patłumačyŭ Kizim.
Ci moža Kizim pryjechać u Minsk?
Kizim patłumačyŭ, što jaho ciapierašni status pasła pa asobych daručeńniach pa Biełarusi adroźnivajecca ad statusu pasła Ukrainy ŭ Biełarusi.
«Pasoł Ukrany ŭ Biełarusi pryznačajecca ŭkazam prezidenta i maje paŭnamoctvy ad prezidenta kantaktavać z vyšejšymi asobami toj dziaržavy, kudy jon pryznačany. Dla hetaha pišucca davierčyja hramaty i inšaje. A pasoł pa asobych daručeńniach — heta pasada, jakaja znachodzicca ŭ Ministerstvie zamiežnych spraŭ.
Ja, kaniešnie, mahu kamunikavać z kim zaŭhodna. I mnie nie treba abaviazkova jechać u Minsk, kab pazvanić niejkamu čynoŭniku ŭ Ministerstva zamiežnych spraŭ Biełarusi, telefon jakoha ja viedaju. Ci možna mnie tudy ŭjazdžać? Heta vyrašaje ciapierašniaja ŭłada Biełarusi. Ale, kali budzie takaja nieabchodnaść, tady budziem havaryć».
Pa słovach Kizima, nakolki jon viedaje, jaho nie ŭklučali ŭ śpis nieŭjaznych asobaŭ. «Kali treba budzie kamunikavać z pradstaŭnikami niejkich viedamstvaŭ Biełarusi, to farmalna ja maju na heta paŭnamoctvy i budu kamunikavać. Zrazumieła, pa ŭzhadnieńni z našym ministram abo inšymi adpaviednymi strukturami Ukrainy», — adznačyŭ pasoł.
Jak budzie vieścisia dyjałoh z Abjadnanym pierachodnym Kabinietam i Śviatłanaj Cichanoŭskaj
Takija sustrečy ŭvachodziać u płany Kizima.
«Dla taho, kab dakładna sfarmulavać stratehiju (ja mahu skazać, što znachodžusia na peŭnym pačatkovym etapie) i razumieć, što ciapier robicca ŭ łahiery demakratyčnych siłaŭ Biełarusi, jakija nastroi i jakija jość da nas pytańni, treba kamunikavać».
Kizim raskazaŭ, što ŭ jaho ŭ bližejšy čas zapłanavana sustreča z Hienadziem Mańko (kiraŭnikom misii demakratyčnaj Biełarusi ŭ Kijevie). Jon nie vyklučaje sustreču z pradstaŭnikami Pałka Kalinoŭskaha, pajezdku ŭ Varšavu ci Vilniu dla sustrečy z pradstaŭnikami demakratyčnych siłaŭ Biełarusi.
Ci zrazumieła Kijevu, z kim ź biełaruskaj apazicyi razmaŭlać?
Nie zusim.
«U svoj čas pa daručeńni ministra ja pryniaŭ udzieł u kanfierencyi, jakuju arhanizoŭvaŭ Połk Kastusia Kalinoŭskaha ŭ listapadzie minułaha hoda. I ja ŭbačyŭ, skažam tak, roznyja padychody, roznych ludziej, što pryjechali. Niekatorych ź ich ja viedaŭ asabista.
I ja skažu, što heta sapraŭdy zjaŭlajecca prablemaj. Jość takija struktury, jak Ofis Śviatłany Cichanoŭskaj, Pierachodny kabiniet. Ale jość Kaardynacyjnaja rada. Vy nazvali Zianona Paźniaka, jaki prytrymlivajecca inšaj dumki. Jość Połk Kalinoŭskaha.
I heta sapraŭdy raznastajnaść, jakuju treba ŭličvać. Kali my havorym pra niejkuju supolnuju pazicyju, to vielmi ciažka heta zrabić. I tyja, i tyja robiać svaju spravu, i tyja, i tyja niedzie majuć racyju. I tut nie naša pytańnie, nie pytańnie Ukrainy zrabić tak, kab vy tam abjadnalisia.
Vam luby va Ukrainie skaža: kali b byŭ adzin centr pryniaćcia rašeńniaŭ, adzinaja kamanda z boku demakratyčnych sił, to tady kamunikacyja była b zusim na inšym uzroŭni i zusim pa-inšamu.
A tak navat dla taho, kab mnie zaraz vypracavać niejkaje bačańnie i vynieści prapanovy pa dalejšym supracoŭnictvie ci kantaktach ź lidarami demakratyčnaj apazicyi, ja pavinien uličvać prynamsi try, kali nie bolš, pazicyi roznych siłaŭ, jakija ŭłasna zajmajucca adnym i tym ža. I ja budu pačynać sustrakacca z usimi, chto zachoča sa mnoju kantaktavać, dla taho, kab vypracavać niejkaje ahulnaje bačańnie, kudy ruchacca demakratyčnamu ruchu Biełarusi».
Čytajcie jašče:
Kijeŭ pryznačyŭ Ihara Kizima pasłom pa asobych daručeńniach pa spravach Biełarusi
Pamiatajecie «paśpiachovuju miljanierku» Zareckuju? Vyhladaje, što jaje kampanija — usio19
Kamientary