Suprać aktyvista, jaki 7 studzienia vyviesiŭ ściah na hałoŭnaj haradskoj jalincy ŭ Viciebsku, raspačali kryminalnuju spravu.
Suprać aktyvista, jaki 7 studzienia vyviesiŭ ściah na hałoŭnaj haradskoj jalincy ŭ Viciebsku, raspačali kryminalnuju spravu.
Pra heta pravaabaronca Pavał Levinaŭ daviedaŭsia ad dziažurnaha Kastryčnickaha RAUSa, dzie ŭ piatnicu ad 10-j ranku da 8-j viečara dapytvali zatrymanaha siabra KCHP BNF Siarhieja Kavalenku.
Sprava suprać Kavalenki raspačataja pavodle 2-j častki 339 artykuła Kryminalnaha kodeksa, jakaja praduhledžvaje pakarańnie za «chulihanstva, ździejśnienaje paŭtorna ci hrupaj asobaŭ, abo źviazanaje z supracivam asobam, jakija sprabujuć praduchilić chulihanskija dziejańni».
Spadar Levinaŭ udakładniŭ, što ŭ takim vypadku Siarhieju Kavalenku pahražaje
albo aryšt ad 3 da 6 miesiacaŭ, albo da 5 hadoŭ abmiežavańnia voli — tak zvanaj «chimii», albo turemnaje źniavoleńnie na termin da 6 hadoŭ.
Vierahodnuju datu sudu nad Siarhiejem Kavalenkam pravaabaroncu vyśvietlić nie ŭdałosia: u milicyi skazali, što pakul što viadziecca śledstva.
Viciebskija adnadumcy prapanavali spadaru Kavalenku skarystacca pasłuhami znojdzienaha imi advakata — pra heta zatrymanamu pieradali praź jahonuju maci, jakaja pryjaždžała ŭ Kastryčnicki RAUS, kab sustrecca z synam u pierapynku pamiž dopytami.
Paźniej maci aktyvista, spadarynia Lidzija, raspaviała, što a 6-j viečara ŭ kvatery, dzie žyvie jana, Siarhiej Kavalenka ź siamjoj i małodšy brat Vital, byŭ praviedzieny pieratrus.
Milicyjanty znajšli i kanfiskavali 26 ulotak apazicycyjnaha źmiestu. Pytalisia i pra najaŭnaść bieł-čyrvona-biełych ściahoŭ, ale ŭ kvatery ich nie było.
Nahadajem, što Siarhiej Kavalenka byŭ zatrymany ŭ čaćvier kala hadziny dnia na płoščy Pieramohi ŭ Viciebsku, paśla taho jak na vačach u socień minakoŭ vyviesiŭ na 40-mietrovaj vyšyni bieł-čyrvona-bieły ściah, zdoleŭšy zaleźci pa zbornaj metaličnaj kanstrukcyi na samuju vieršalinu navahodniaj jołki.
Kamientary