Były supracoŭnik štab-kvatery jadziernych sił ZŠA pieradavaŭ vajskovyja sakrety «žančynie z Ukrainy» na sajcie znajomstvaŭ
Adstaŭnomu padpałkoŭniku i supracoŭniku štab-kvatery jadziernych sił ZŠA pradjaŭlena abvinavačańnie ŭ tym, što jon vydavaŭ sakretnuju infarmacyju niejkaj «žančynie z Ukrainy», ź jakoj pierapisvaŭsia praz sajt znajomstvaŭ.
U pres-relizie Ministerstva justycyi ZŠA havorycca, što 63-hadovy Devid Franklin Słejter paśla adstaŭki słužyŭ u jakaści hramadzianskaj asoby, ale z dopuskam da sakretnaj infarmacyi, u štab-kvatery Stratehičnaha kamandavańnia (Stratkam, USSTRATCOM) ZŠA na avijabazie Ofat. Stratkamu padparadkoŭvajucca jadziernyja siły Złučanych Štataŭ.
Słejter byŭ aryštavany ŭ subotu.
U paniadziełak, 4 sakavika, prakuratura apublikavała abvinavaŭčyja dakumienty pa spravie Słejtera, ź jakich vynikaje, što ź lutaha pa krasavik 2022 hoda jon praz sajt znajomstvaŭ pieradavaŭ niejkaj piersonie, jakaja nazvałasia žančynaj z Ukrainy, sakretnuju infarmacyju sa zvodak Stratehičnaha kamandavańnia adnosna napadu Rasii na Ukrainu.
«Słejter naviedvaŭ bryfinhi USSTRATCOM na temu vajny Rasii suprać Ukrainy, jakija byli paznačanyja jak «całkam sakretnyja« […]. Słejter zatym pieradavaŭ sakretnuju infarmacyju […] praz płatformu zamiežnaha sajta znajomstvaŭ svajmu saŭdzielniku, jaki pradstaŭlaŭsia žančynaj, što žyvie va Ukrainie», — pierakazvaje ministerstva abvinavaŭčaje zaklučeńnie.
Prakurory paviedamlajuć, što hetaja «žančyna z Ukrainy» časta i adkryta raspytvała adstaŭnoha padpałkoŭnika pra roznyja sakrety i nazyvała jaho «moj tajemny paluboŭnik-infarmatar» i «moj tajemny ahient».
«Darahi, što tam na ekranach u asobym pakoi? Vielmi cikava», — pryvodziać prakurory Niebraski prykład ź ich pierapiski.
«Dejv, sałodki moj, dziakuj za kaštoŭnuju infarmacyju», — havaryłasia ŭ inšym paviedamleńni.
«Ty moj tajemny ahient! Lublu», — napisała «žančyna z Ukrainy» paśla taho, jak vyviedała sakretnyja źviestki pra adnu krainu. Nazvu krainy prakurory ŭstaŭlać u abnarodavanyja dakumienty nie stali.
Z kim nasamreč pierapisvaŭsia Słejter i na jakim sajcie znajomstvaŭ heta adbyvałasia, u dakumientach nie skazana.
Sprava Słejtera rasśledavali FBR i adździeł śpiecyjalnych rasśledavańniaŭ VPS ZŠA.
Kali sud pryznaje adstaŭnoha padpałkoŭnika vinavatym, jon moža atrymać da 10 hod turmy.
Amal adnačasova z navinoj ab spravie Słejtera z ZŠA ŭ paniadziełak pryjšli paviedamleńni ab raźvićci inšaj padobnaj historyi: były supracoŭnik padraździaleńnia avijacyi Nacyjanalnaj hvardyi ZŠA ŭ štacie Masačusets Džek Tejšejra pajšoŭ na ździełku sa śledstvam, pryznaŭ vinu va ŭciečcy sakretnych dakumientaŭ Pientahona i pahadziŭsia na 16-hadovy turemny termin u abmien na toje, što prakurory źnimuć ź jaho bolš surjoznyja abvinavačvańni ŭ špijanažy, piša VVS.
Byłaja deputatka Maryja Vasilevič sabrałasia zamuž FOTA14
Kamientary