Hihancki ŭčastak u Sočy, jaki naležaŭ Respublicy Biełaruś, pradali za biascenak firmam, źviazanym asabista z Łukašenkam — Biełpoł
Havorka pra 1000 sotak ziamli ŭ Krasnaj Palanie. Bolš darahoha miesca ŭ Rasii prosta niama. I voś hetyja 10 hiektaraŭ ziamli, rynkavy košt jakich moža dasiahać 100 miljonaŭ dalaraŭ, z ułasnaści biełaruskaj dziaržavy pierajšli ŭ vałodańnie kampanii, za jakoj staić «Vector Energy Innovation FZCO», zarehistravanaja ŭ Abjadnanych Arabskich Emiratach — raskapała arhanizacyja byłych siłavikoŭ «Biełpoł».
Rasśledavańnie pra heta vypuścili «Biełpoł» i «Biełsat».
Nievierahodna ščodry prodaž biełaruskaj ziamli
Učastak płoščaj 97 248 m2 u elitnym kurortnym pasiołku Krasnaja Palana ŭ miežach Sočy naležaŭ Respublicy Biełaruś na pravie ŭłasnaści z 2013 hoda — jaho atrymali paśla ratyfikacyi pahadnieńnia pamiž Respublikaj Biełaruś i Rasijskaj Fiederacyjaj ab uzajemnaj pieradačy va ŭłasnaść ziamielnych učastkaŭ. Heta značyć, abmianiali na biełaruskuju terytoryju. I pieradali ŭ apieratyŭnaje kiravańnie dziaržaŭnaj ustanovy «Sanatoryj Biełaruś», što ŭvachodzić u strukturu pradpryjemstvaŭ Kiraŭnictva spravami Alaksandra Łukašenki.
18 lutaha 2022 hoda nataryusam Sočynskaj nataryjalnaj akruhi Łaryjonavaj była paśviedčana damova kupli-prodažu hetaha ŭčastka. Ad imia pradaŭca damovu padpisaŭ dyrektar sanatoryja «Biełaruś» Hienadź Kaleśnik — vychadziec z MUS, były kiraŭnik Mahiloŭskaha kaledža Ministerstva ŭnutranych spraŭ i spartyŭnaha tavarystva «Dynama».
«Biełpoł» źviarnuŭ uvahu na punkt 1.3, u adpaviednaści ź jakim učastak adčužajecca na karyść rasijskaj firmy na padstavie rasparadžeńniaŭ Łukašenki z hryfam «Dla słužbovaha karystańnia». Na padstavie takich ža sakretnych rasparadžeńniaŭ adčužałasia nieruchomaść dziaržaŭnaj ustanovy BFST «Dynama» ŭ Minsku na karyść pryvatnaj achoŭnaj firmy byłoha kiraŭnika Kiraŭnictva spravami Łukašenki (u 2013—2021 hadach) Viktara Šejmana «HardServis».
Kupiła ŭčastak TAA «Kompleks-Inviest», zarehistravanaje 8 červienia 2021 hoda ŭ Maskvie. U damovie zhadvałasia sakretnaje rasparadžeńnie №157rp-dsp, datavanaje 20 lipienia 2021 hoda — nieŭzabavie paśla rehistracyi «Kompleks-Inviest».
Aŭtary rasśledavańnia znajšli toje rasparadžeńnie — ź jaho viadoma, što Łukašenka zahadaŭ pradać toj samy ŭčastak rasijskamu «Kompleks-Inviestu» za 970 młn rasijskich rubloŭ (10,5 młn dalaraŭ), heta značyć kadastravym koštam. Taksama ŭ damovie zhadvałasia sakretnaje rasparadžeńnie Łukašenki № 12rp-dsp ad 18 studzienia 2022 hoda. Hetym rasparadžeńniem Łukašenka źniziŭ košt udvaja, da 485 młn rasijskich rubloŭ (5,3 młn dalaraŭ). Za stolki i pradali.
Adna sotka ŭ Sočy, jak zaŭvažyli ŭ «Biełpole», pradajecca na sajtach pryvatnych abjavaŭ nie tańniej za 10 młn rasijskich rubloŭ. Heta značyć rynkavy košt pradadzienaha ŭčastka ŭ amal tysiaču sotak u 20 razoŭ vyšejšy.
Praz Rasiju i Emiraty — u kišeniu Łukašenki
«Kompleks-Inviest» zarehistravali 8 červienia 2021 hoda na imia hramadzianki RF Aleny Borcievaj — piensijanierki, jakaja pražyvaje ŭ akupavanym Rasijaj Sievastopali. Farmalna budaŭničaja kampanija ničoha nie budavała i naohuł nie viała dziejnaści. A kupiŭšy elitny ŭčastak za biescań, pačakała paru miesiacaŭ — i stała biełaruskaj. 12 maja 2022 hoda 99,9% doli firmy «Kompleks-Inviest» pierajšli va ŭłasnaść biełaruskaha TAA «Rehijanalny paradak».
Pra «Rehijanalny paradak» rasśledavalniki nie znajšli ŭ adkrytych krynicach ničoha cikavaha akramia numaru telefonu, jaki zarehistravany na hramadzianina Biełarusi Viačasłava Vasiljeva. Hety ž Vasiljeŭ, jak vyśvietliłasia, źjaŭlajecca dyrektaram i zasnavalnikam firmy. Pavodle źviestak «Biełpoł», heta toj samy Vasiljeŭ, što zajmaje pasadu starejšaha inśpiektara vajenizavanaj achovy śpiecyjalnaha adździełu achovy fizičnych asobaŭ TAA «HardServis» — «łukašenkaŭskich vahnieraŭcaŭ».
Druhim zasnavalnikam «Paradku» vyjaviłasia firma «Vector Energy Innovation FZCO», zarehistravanaja ŭ Abjadnanych Arabskich Emiratach. Hetaja firma fihuravała ŭ skandale va Ukrainie, što razhareŭsia ŭvosień 2021 hoda: jana ŭkłała damovu z ukrainskim enierhatrejdaram na pastaŭku elektraenierhii ź Biełarusi, kuplała 1 MVt⋅č za 59 dalaraŭ i pradavała za 100. Enierhija išła z Ukrainy ŭ Biełaruś, roźnica ŭ canie išła ŭ Emiraty, čysty prybytak firmy moh dasiahać 400 młn dalaraŭ.
Ukrainskija rasśledavalniki ličyli, što hałoŭnym vyhadaatrymalnikam toj skandalnaj uhody stali ŭkrainskija palityki i biznesoŭcy. Ale «Biełpoł» upeŭnieny, što asnoŭnuju vyhadu atrymali Łukašenka, Šejman i padkantrolnyja im biznesy. Tak, u žniŭni 2021 hoda ŭ «arabskuju» firmu byŭ pracaŭładkavany vykanaŭčym dyrektaram z zarobkam amal 11 tysiač dalaraŭ u miesiac niechta Siarhiej Anoška.
Toj Anoška, pierakanany «Biełpoł», heta były pieršy namieśnik dyrektara RUP «Biełaruśhandal» u struktury Kiraŭnictva spravami Łukašenki. 11 sakavika 2021 hoda Anoška razam sa zvolnienym napiaredadni namieśnikam Šejmana Andrejem Śvirydavym zasnavaŭ u Minsku ZAT «Viektar Kapitał Hrup». Druhi kiraŭnik — były pieršy namieśnik kiraŭnika kiraŭnictva spravami Łukašenki Mikałaj Sielivanaŭ. Hetuju firmu «Biełpoł» ličyć «pamienšanaj kopijaj» Kiraŭnictva spraŭ Łukašenki, jakaja vykonvaje tyja ž funkcyi, ale pad maskaj pryvatnaj struktury, kab abyści sankcyi Jeŭraźviazu.
Pryčynaj zvalnieńnia Śvirydava, Šejmana i Sielivanava ŭ kožnym vypadku značycca pierachod na inšuju pracu. Paralelna ź imi pasady pakidajuć šerah inšych, niepubličnych supracoŭnikaŭ Kiraŭnictva spravami Łukašenki. Usie jany stanoviacca supracoŭnikami «Viektar Kapitał Hrup».
«Biełpoł» robić vysnovu: «Koła zamknułasia». Firma «Viektar Kapitał Hrup» padspravazdačnaja niepasredna Łukašenku, praz «Vector Energy Innovation FZCO» i «HardServis» źviazanaja z «Rehijanalnym paradkam», jaki atrymaŭ kampaniju «Kompleks-Inviest», jakoj pradali ŭčastak u Sočy na zahad Łukašenki.
Akramia taho, namieśnik dyrektara «Kompleks-Inviest» — hramadzianin Biełarusi Viktar Žuraŭkoŭ. Rasśledavalniki ŭpeŭnienyja, što heta syn Haliny Žuraŭkovaj, jakaja ačolvała Kiraŭnictva spravami Łukašenki ŭ 2001—2004 hadach, była asudžanaja za kradziažy i pamiłavanaja Łukašenkam u 2005 hodzie.
Jašče adna rezidencyja Łukašenki i jašče paŭmiljarda ŭ kišeniu?
Pa źviestkach rasśledavańnia, «Kompleks-Inviest» źbirajecca budavać u Sočy žyły kompleks «Krasnaja palana» na try elitnyja katedžy płoščaj bolš za 300 m2 kožny, hatel, restaranny kompleks i vielizarnaje haspadarskaje šale płoščaj 1002 m2.
U haspadarskim katedžy pa prajekcie aproč inšaha jość pakoj dla łyžaŭ, łaźnia, kuchni dla chałodnych i haračych stravaŭ, pracoŭny kabiniet, niekalki spalniaŭ. Na padziemnym paviersie basiejn, łaźni, słužbovy pakoj achovy.
«Jon jašče ŭ aktyŭnaj budoŭli, u ekspłuatacyju jašče nie ŭviedzieny», — adkazali «Biełsatu» nakont komplesa ŭ techničnym adździele kampanii «Krasnadarhramadzianprajekt».
«Biełpoł» śćviardžaje, što budaŭnictva kantraluje Šejman, jaki asabista inśpiektavaŭ abjekt navat tady, kali na ŭčastku jašče nie pačałosia budaŭnictva.
Pa vynikach inśpiekcyi Šejmana pryjšłosia pierarabić prajektnuju dakumientacyju. U vyniku miery biaśpieki stali nahadvać tyja, što płanavali dla novaha pałaca Łukašenki: sistema padaŭleńnia bieśpiłotnikaŭ, mietaładetektary, ciepłavizary, radyjomietryčny kantrol… «Biełpoł» nie vyklučaje, što faktyčnym haspadarom kompleksu budzie asabista Łukašenka.
«Biełpoł» śćviardžaje, što viedaje i pra nastupny krok u Sočy. Parkavy kompleks «Fruktovy sad» płoščaj bolš za 8500 hiektaraŭ (u 850 razoŭ bolšy za ŭčastak, pra jaki išła havorka vyšej) taksama źbirajucca pradać pa canie nižejšaj za rynkavuju. Sanatoryj «Biełaruś», jak śćviardžajecca, pradaść jaho toj ža firmie «Kompleks-Inviest».
Zamiest parku płanujuć pabudavać dziesiać šmatpaviarchovych budynkaŭ z adna– i dvuchpakajovymi apartamientami. Prybytak, pavodle źviestak rasśledavalnikaŭ, płanujuć atrymać na sumu 526 młn dalaraŭ.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1111
Kamientary