Parłamient Hruzii pryniaŭ zakonaprajekt ab «zamiežnych ahientach» u druhim čytańni, pratesty praciahvajucca
Sa 150 deputataŭ hruzinskaha parłamienta za pryniaćcie zakona, jaki apazicyja nazyvaje «rasijskim», prahałasavali 83: usie deputaty kiroŭnaj partyi «Hruzinskaja mara» i ich sajuźnicy, partyi «Ułada naroda». Apazicyja ŭdziełu ŭ hałasavańni nie brała. Treciaje čytańnie papiarednie pryznačanaje na 17 traŭnia.
U noč na 1 traŭnia palicyja ŭpieršyniu ŭžyła suprać pratestoŭcaŭ vadamioty i hranaty sa ślozatačyvym hazam. Pratestoŭcy źviartalisia ŭ mašyny chutkaj dapamohi z traŭmami paśla žorstkich zatrymańniaŭ i sutyknieńniaŭ z palicyjaj, 63 čałavieki zatrymanyja.
Siońnia adzin z parłamientaryjaŭ, staršynia apazicyjnaj partyi «Adziny nacyjanalny ruch» Levan Chabieišvili, pryjšoŭ na abmierkavańnie zakona z paviazkami na tvary — jaho źbiła palicyja na ŭčarašnim mitynhu. Lekary zafiksavali ŭ jaho pierałom kostak nosa i vybityja piarednija zuby. Palicyja śćviardžaje, što jon namahaŭsia pieraškadžać siłavikam.
Siońnia ŭ Tbilisi vystrojvalisia čerhi pa reśpiratary. Ludzi kuplali srodki abarony ad hazu pierad majučaj adbycca akcyjaj suprać pryniaćcia zakona. U fejsbuku aktyvisty stvaryli supołku, dzie ludzi mohuć dapamahčy z pryjezdam i žyllom pratestoŭcam z rehijonaŭ.
Rehularnyja akcyi suprać zakona ab «zamiežnych ahientach» praciahvajucca ź siaredziny krasavika. Ułady Hruzii sprabujuć jaho pryniać druhi hod zapar, hety zakon paraŭnoŭvajecca z anałahičnym rasijskim. Razam z apazicyjaj suprać pryniaćcia zakona rašuča vystupaje prezidentka Hruzii Sałamie Zurabišvili.
U Jeŭraparłamiencie prapanavali pazbavić Hruziju statusu kandydata na ŭstupleńnie ŭ ES, kali parłamient krainy ŭchvalić hetuju normu. Pry hetym premjer-ministr Hruzii zajaviŭ, što kiroŭnaja partyja maje namier pryniać zakon ab «zamiežnych ahientach» niahledziačy ni na što.
U Hruzii palicyja ŭžyła ślozatačyvy haz i vadamioty na mitynhu suprać zakona ab zamiežnych ahientach
Prezidentka Hruzii paabiacała nakłaści vieta na zakon «ab zamiežnych ahientach»
U hruzinskim parłamiencie padčas razhladu zakonaprajekta ab zamiežnych ahientach zdaryłasia žyvaja bojka VIDEA
U parłamient Hruzii paŭtorna ŭnieśli zakonaprajekt ab zamiežnych ahientach
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary