Kiraŭnictva rasijskaha pradpryjemstva danosiła na ekaaktyvistaŭ Mahilova, kab vyrašyć ułasnyja prablemy

Z bazy danosaŭ u KDB, źlitaj Kibierpartyzanami, stała viadoma, što pradpryjemstva «Omsk Karbon Mahiloŭ» nieadnarazova źviartałasia da hetaha orhana. Najbolš adznačyŭsia hienieralny dyrektar Marat Ihizbajeŭ.

Rasijskaje pradpryjemstva zajmajecca vytvorčaściu techničnaha vuhlarodu, jaki nieabchodny dla vytvorčaści šyn, humatechničnych vyrabaŭ i płastykaŭ.

Zavod u SEZ «Mahiloŭ» zapuściŭsia ŭ kastryčniku 2018 hoda. Užo paśla pieršaha puskanaładačnaha zapusku žychary susiedniaha pasiołka Viejna pabačyli słoj sažy na svaich padvakońniach.

Pavialičyć

U toj dzień na trubie pradpryjemstva było zafiksavanaje pieravyšeńnie normy škodnych vykidaŭ u pavietra bolš jak u 40 razoŭ. Adnak čynoŭniki admaŭlali pieravyšeńnie normy ŭtrymańnia ćviordych čaścic u nasielenych punktach.

Mahiloŭski aktyvist Andrej Bodzileŭ raspačaŭ kampaniju «Za zdarovy Mahiloŭ», patrabujučy pravieści novuju ekałahičnuju ekśpiertyzu zavoda i vypravić parušeńni ŭ filtracyjnych i ačyščalnych zbudavańniach vytvorčaści.

Bodzileŭ pisaŭ zvaroty ŭ dziaržaŭnyja orhany i składaŭ pietycyi, źviartajučy ŭvahu na nieadpaviednaść technałahičnym normam, hrubyja parušeńni pryrodaachoŭnaha zakanadaŭstva i pahrozu zdaroŭju žycharoŭ. 

U lipieni 2019 hoda stała viadoma, što Respublikanski centr ekałahičnaj ekśpiertyzy admoviŭsia vydavać zaklučeńnie pa pavieličeńni mahutnaści pradpryjemstvu pa vytvorčaści techničnaha vuhlarodu «Omsk Karbon Mahiloŭ».

Pavialičyć

Pradpryjemstva z rasijskim kapitałam płanavali ŭvieści ŭ ekspłuatacyju ŭ čaćviortym kvartale 2019 hoda. Da hetaj daty kiraŭnictva pradpryjemstva pačało isteryčna šukać upravy na miascovych aktyvistaŭ, vykarystoŭvajučy roznyja srodki. 

24 lipienia kampanija arhanizavała sustreču z pradstaŭnikami ŚMI, Nacyjanalnaj akademii navuk, pryrodaachoŭnych i sanitarna-epidemijałahičnych słužbaŭ, miascovymi žycharami, kab vykryć sproby «absalutna biespadstaŭna dyskredytavać prajekt u cełym u vačach nie tolki hramadskaści, ale i dziaržaŭnych orhanaŭ».

U kancy žniŭnia 2019 hoda ŭ VK źjaviłasia supołka «Stabilny Mahiloŭ», jakaja spačatku pazicyjanavałasia jak pablik z navinami horada, ale davoli chutka vyjaviłasia, što adzinaja jaje meta — zmahacca suprać ekaaktyvistaŭ i abialać zavod «Omsk Karbon Mahiloŭ».

Pavialičyć

Prapahandysckija roliki suprać ekaaktyvistaŭ, jakija publikavalisia ŭ supołcy, byli dobra zmantavanyja, to-bok jaŭna zroblenyja za hrošy, a nie na kalency. Prahlady rolikaŭ nakručvalisia da dziasiatkaŭ i socień tysiač, choć u supołcy nie było i pary tysiač padpisčykaŭ. 

Jak udałasia vyśvietlić samim aktyvistam, dopisy ad imia «nieabyjakavych mahiloŭcaŭ» rabiŭ čałaviek, jaki žyŭ u rasijskim Omsku i nikoli ŭ Mahilovie nie byvaŭ. Z takimi infarmacyjnymi kampanijami, jakija, vidać, źjaŭlajucca normaj u Rasii, biełarusam raniej nie davodziłasia sutykacca.

Ź lista Ihizbajeva ciapier viadoma, mienavita jon prykłaŭ ruku da taho, kab pasadzić načalnika Mahiloŭskaha abłasnoha ŭpraŭleńnia Departamienta Dziaržpramnahladu Ivanickaha. Ivanicki, jaki vydavaŭ zaklučeńnie ab adpaviednaści abjekta budaŭnictva dziejučym normam i praviłam pramysłovaj biaśpieki, byccam by prapanavaŭ «vyrašeńnie pytańnia» pa prajekcie zavoda za peŭnaje ŭznaharodžańnie.

U pačatku 2017-ha pry ŭdziele Ihizbajeva čynoŭnik byŭ zatrymany za atrymańnie 2000 dalaraŭ chabaru. Paśla hetaha pytańni pradpryjemstva pačali vyrašacca chutčej.

Pavialičyć

Supraca z KDB, vidać, dadała ŭpeŭnienaści va ŭłasnych siłach Maratu Ihizbajevu.

U liście ad 13 žniŭnia 2019 hoda Ihizbajeŭ patrabavaŭ ad KDB pryciahnuć mahiloŭskaha aktyvista Andreja Bodzileva za paklop. Bodzileŭ, pa mierkavańni rasijskaha biznesmiena, nieadnarazova praz ułasnuju supołku «Inicyjatyva za zdarovy Mahiloŭ» raspaŭsiudžvaŭ iłžyvuju infarmacyju suprać zavoda «Omsk Karbon Mahiloŭ», słužbovych asob i dziaržaŭnych słužboŭcaŭ.

Nie spadabałasia toje, što Bodzileŭ pisaŭ zvaroty ŭ dziaržaŭnyja orhany i stvaraŭ pietycyi, kab «nakalić hramadskuju i sacyjalnuju abstanoŭku ŭ rehijonie», a taksama što jon zajaŭlaŭ pra vyrašeńnie prablem pradpryjemstva praz chabary.

Anałahičnaje patrabavańnie vykryć złačynnuju zmovu Bodzileva i čynoŭnikaŭ z metaj atrymańnia «kryminalnaj renty» patrabavaŭ Siarhiej Ivaškoŭ, hałoŭny inžynier prajekta, u svaim zvarocie ad 6 vieraśnia 2019. 

Kab prybrać z darohi adnaho aktyvista byŭ padklučany ŭvieś administracyjny resurs pradpryjemstva.

U toj ža dzień, 6 vieraśnia, svaje zvaroty ŭ KDB dasłali namieśnica hiendyrektara Maryna Kaŭryha i namieśnik hałoŭnaha enierhietyka pa ciepłatechnicy Dźmitryj Vołkaŭ, 9 vieraśnia — hałoŭny miechanik Juryj Cialatnikaŭ, 13 vieraśnia — načalnik jurydyčnaha adździeła Andrej Burakoŭ, supracoŭniki Andrej Sielivanaŭ, Aleh Halibin, 17 vieraśnia — načalnik słužby achovy pracy i pramysłovaj biaśpieki Uładzimir Dudkin.

Sam Ihizbajeŭ nie lenavaŭsia stračyć u KDB. U źlitaj bazie jość jahonyja danosy za 16 žniŭnia, 10 vieraśnia, 11 vieraśnia, 10 kastryčnika, 1 listapada 2019, 31 lipienia 2020 i 21 lutaha 2022, ale ichni źmiest nieviadomy, bo jany byli ŭ prykładzienych fajłach. Jon asabista vinšavaŭ kadebešnikaŭ z Dniom supracoŭnika orhanaŭ dziaržaŭnaj biaśpieki 20 śniežnia 2021.

Pavialičyć

Taksama kiraŭnictva zavoda «Omsk Karbon Mahiloŭ» napisała na Bodzileva zajavu ŭ milicyju, abvinavačvajučy ŭ raspalvańni mižnacyjanalnaj varožaści, abrazie pradstaŭnikoŭ ułady, a jašče niezakonnym praviadzieńni videa-apytańnia siarod žycharoŭ ahraharadkoŭ Viejna i Navasiołki nakont zapusku zavoda.

6 vieraśnia aktyvista vyklikali ŭ Mahiloŭski RAUS dla dačy pakazańniaŭ, ale ŭžo 9 vieraśnia było pryniata rašeńnie ab admovie ŭ zaviadzieńni kryminalnaj spravy praz adsutnaść składu supraćpraŭnych dziejańniaŭ.

U 2022 hodzie, miarkujučy pa zvarotach Ihizbajeva, pradpryjemstva bližej paznajomiłasia ź biełaruskimi realijami, jakija tak nachvalvała raniej u svaich prapahandysckich rolikach.

Pieravoziačy svaju pradukcyju pa čyhuncy da marskoha porta ŭ litoŭskaj Kłajpiedzie (vidać, sankcyi na heta pradpryjemstva nie raspaŭsiudzilisia), kiraŭnictva pradpryjemstva daviedałasia, što ichnim kantejnieram skarystalisia, kab niezakonna pieravieźci praź miažu cyharety «FEST» Hrodzienskaj tytuniovaj fabryki.

Ihizbajeŭ patrabavaŭ ad KDB razabracca, chto ŭciahvaje pradpryjemstva ŭ złačynnuju dziejnaść, ale nieviadoma, ci ŭdałosia jamu niečaha damahčysia ad orhanaŭ dziaržavy, jakaja hetaj kantrabandzie i spryjaje.

• 3
• 0
• 0
• 5
• 1
• 1
• 29
• 0