U Polščy skandał z-za daŭžyni sukienki kandydatki ŭ Jeŭraparłamient. Deputat abraziŭ kandydatku – i paniesłasia
U Polščy na fonie nastupnych vybaraŭ u Jeŭrapiejski parłamient zdaryŭsia skandał z-za pieradvybarčaha płakata.
Na vulicach Varšavy źjaviŭsia płakat pres-sakratara pravapapulisckaj partyi «Kanfiederacyja» Evy Zajančkoŭskaj-Chiernik — jana bałatujecca ŭ Jeŭraparłamient pa śpisie ŭ polskaj stalicy. Banier niekatoryja paličyli niekarektnym: na im palityk — u sukiency vyšej kalena. Nadpis na płakacie abviaščaje «Chočam žyć narmalna!»
Adzin ź lideraŭ «Kanfiederacyi» Słavamir Miencen apublikavaŭ płakat u sietcy X z zaklikam hałasavać za kandydata. I spravakavaŭ abmierkavańnie płakata: mnohija kamientatary nazyvali banier pravakatyŭnym, a prafsajuzny aktyvist Piotr Šumlevič zajaviŭ, što palityk «pierabłytała vybarčuju kampaniju z sajtam znajomstvaŭ», piša polskieradio24.pl.
Dastałasia «Kanfiederacyi» i ad kansiervataraŭ: tyja zapuścili ŭ sietcy chešteh «Spynicie seksualizacyju» i zaklikali «nie hałasavać za pravaje porna».
Ale sapraŭdny skandał vyliŭsia paśla taho, jak płakat prakamientavaŭ deputat Siejma ad partyi «Polšča 2050», jakaja ŭvachodzić va ŭradavuju kaalicyju, Słavamir Ćvik.
Parłamientaryj apublikavaŭ post, dzie zajaviŭ:
«Bolšaść kandydataŭ pakazvajuć hałovy, tamu što žadajuć pracavać hałavoj, čaho čakajuć vybarščyki. Ale nie ŭsie z kandydataŭ…»
Post Ćvika vyklikaŭ abureńnie ŭ kamientarach i ŭ polskim palitykumie, zdajecca, na imhnieńnie abjadnaŭšy ŭrad i apazicyju. Post Ćvika asudzili jak deputaty ad apazicyjnych «PiS» i «Kanfiederacyi», tak i ad kirujučaj Hramadzianskaj kaalicyi. Parłamientaryju nieŭzabavie pryjšłosia vydalić post.
Adnak na hetym usio nie skončyłasia.
Zajančkoŭska-Chiernik prymacavała skrynšot vydalenaha paviedamleńnia ŭ siabie ŭ X z podpisam «Internet pamiataje ŭsio». Akramia taho, jana adznačyła śpikiera Siejma Šymona Chałaŭniu — lidara partyi «Polšča 2050» – i zajaviła, što «pavinna być soramna mieć takich ludziej, jak Ćvik, u siabie ŭ arhanizacyi».
Nieŭzabavie Ćvik vyrašyŭ jašče raz prakamientavać skandał. Deputat adznačyŭ, što nie jon vybiraŭ fota dla płakata Evy: «Vy vyrašyli pastavić taki zdymak i dasiahnuli svajoj mety – idzie dyskusija, i ludzi kamientujuć toje, što kamientujuć. Ja vykazaŭ tolki svajo mierkavańnie, ale, miarkujučy pa kamientarach, ja ŭ mienšaści».
Zajančkoŭska-Chiernik adkazała na heta koratka:
«Fota pryhožaje, elehantnaje i stylovaje. U adroźnieńnie ad vas».
U vyniku Ćviku pryjšłosia napisać jašče adzin post — užo z kankretnymi vybačeńniam. Jon zajaviŭ, što dapuściŭ pamyłku, kali prakamientavaŭ fota Zajančkoŭskaj-Chiernik: «Nie źbirajusia prykryvacca «ŭzłomam» akaŭnta. Prašu prabačeńnia ŭ Evy i abiacaju bolš nie kamientavać pieradvybarnyja płakaty».
«Kanfiederacyja svabody i niezaležnaści» abjadnoŭvaje ceły šerah pravych i ŭltrapravych arhanizacyj. Partyja adpracoŭvaje antymihrancki i jeŭraskieptyčny paradak dnia, vystupaje za demantaž palityčnych orhanaŭ Jeŭrasajuza. «Kanfiederacyja» ahituje suprać dapamohi Ukrainie i ŭkrainskim uciekačam.
Na parłamienckich vybarach u 2023 hodzie partyja atrymała 18 miescaŭ u Siejmie, nabraŭšy 7,61% hałasoŭ.
Vybary ŭ Jeŭraparłamient projduć z 6 da 9 červienia.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu7
Kamientary