Prezidentka Małdovy Maja Sandu žyvie ŭ dvušcy. A kolki jana zarablaje?

Maja Sandu raskazała, što prezidenckaja rezidencyja Kondryca, jakaja była pabudavana jašče ŭ 1960-ja hady, ciapier pustuje. Prezidentka žyvie ŭ svajoj dvuchpakajovaj kvatery, jakuju kupiła ŭ 2003 hodzie.

Jak jana tłumačyć, pražyvańnie ŭ rezidencyja aznačaje dadatkovyja vydatki dla dziaržavy. «Mnie niama patreby sialicca tut. Ja narmalna žyvu ŭ svajoj kvatery, jak žyła da taho, jak stała prezidentam».

Da taho ž, zaŭvažaje Sandu, pražyvańnie ŭ Kišyniovie skaračaje čas na darohu da pracy.

Niekatory čas rezidencyja ŭ Kondrycy vykarystoŭvałasia dla pražyvańnia biežancaŭ z Ukrainy. Paśla płanavali ŭ joj stvaryć kulturny centr. Ale heta patrabavała vialikich inviestycyj. Tamu było vyrašana adkłaści heta, bo «jość inšyja nieabchodnaści».

Kvatera Sandu znachodzicca ŭ šmatpaviarchovym domie. Na pieršym paviersie doma jość čałaviek, jaki achoŭvaje padjezd. Pa słovach Sandu, «heta lepš dla ŭsich, bo jany taksama adčuvajuć siabie ŭ biaśpiecy».

Jana zhadvaje, što adnojčy, užo paśla taho, jak jana stała prezidentkaj, jaje kvateru zatapili susiedzi źvierchu.

Maja pryznajecca, što śniadanak hatuje sabie sama, a voś abied joj na pracu prynosić maci. Časam Sandu sama chodzić u mahazin pa pradukty.

Navošta Sandu rumynski pašpart

Maja Sandu maje rumynski pašpart. Jana atrymała hramadzianstva susiedniaj krainy 13-15 hadoŭ tamu. «U maich babuli i dziaduli byli pašparty Rumynii. Jak i dla inšych ludziej, dla mianie było važna mieć rumynski pašpart».

Ciapier, pa słovach prezidentki Małdovy, u krainie miljon čałaviek maje rumynski pašpart. Jana ŭdakładniaje, što pašpart hramadzianina Rumynii — heta jeŭrapiejski pašpart, tamu «ŭ Jeŭrapiejskaha sajuza ŭžo ŭ Małdovie jość miljon svaich hramadzian, heta pavinna zrabić naš šlach u Jeŭrapiejski Sajuz jašče karaciejšym».

Kolki zarablaje prezidentka Małdovy

Da taho, jak stać prezidentkaj, Sandu pracavała ŭ Suśvietnym banku. Tam jaje zarobak składaŭ 10 tysiač jeŭra ŭ miesiac. Ciapier jaje aficyjny zarobak prezidenta krainy kala 850 jeŭra.

Adpaviedna dekłaracyi, jakuju jana padała, źbieražeńni ŭ Sandu «amal skončylisia», ciapier jana žyvie na adzin zarobak.

Sandu tłumačyć, što źbieražeńni joj dapamahli ŭ palityčnaj dziejnaści: «Kali my stvarali partyju, u mianie niekalki hadoŭ uvohule nie było zarobku. U partyi na heta nie było hrošaj. U nas byŭ tolki adzin čałaviek, jakomu my płacili zarobak. Usie astatni vykonvali pracu jak vałanciory. Tamu toje, što ŭ mianie byli źbieražeńni, mnie vielmi dapamahło».

• 68
• 0
• 12
• 2
• 4
• 1
• 3
• 0