Kandydat, što pravodziŭ prarasijskija naratyvy, pieramoh u rajonach Litvy, jakija miažujuć ź Biełaruśsiu
Eduardas Vajtkus nabraŭ pa ŭsioj Litvie 7,3% hałasoŭ. Ale ŭ Visahinasie i Salečnickim rajonie za jaho prahałasavali kala 40% vybarcaŭ.
Krytyka Jeŭrasajuza, finansavych i palityčnych elit i zaklik siabravać z Rasijaj, Biełaruśsiu i Kitajem — voś asnoŭnyja pasłańni, ź jakimi išoŭ na vybary ŭ Litvie 67-hadovy prafiesar-hiematołah Eduardas Vajtkus.
Jon byŭ adziny z vaśmi kandydataŭ z takimi pohladami. «Kramloŭskija kuranty» — skazaŭ pra takuju płatformu prezident Naŭsieda.
Vynik Vajtkusa nielha ličyć pośpiecham: jon nabraŭ 7,3% hałasoŭ i zaniaŭ piataje miesca.
Ale ŭ miascovaściach Vilenščyny, nasielenych biełaruskamoŭnymi palakami, Vajtkus pieramoh. U Salečnickim (Šalčyninkajskim) rajonie za Vajtkusa prahałasavała bolš za 39% vybarščykaŭ. Anałahična i ŭ Visahinasie — rasiejskamoŭnym horadzie, nasielenym u značnaj doli byłymi rabotnikami Ihnalinskaj AES.
U hetych miascovaściach jon zaniaŭ pieršaje miesca, abahnaŭšy i Naŭsiedu, i Šymanicie.
Mahčyma, vynik Vajtkusa byŭ by mienšym, kali b na vybary, jak heta byvała raniej, išoŭ kiraŭnik Vybarčaj akcyi palakaŭ Litvy Valdemar Tamašeŭski, adznačyła ŭ kamientary dla Litoŭskaha telebačańnia palitołah z Kłajpiedskaha ŭniviersiteta Habryjele Burbulicie-Cyskaryšvili.
Vybary ŭ Litvie prajšli vyklučna spakojna, bieź nivodnaha incydentu. Jaŭka vybarcaŭ była nie rekordnaj, ale najbolšaj ad 1997 hoda.
U druhi tur prajšli dziejny prezident Hitanas Naŭsieda i dziejnaja premjer-ministarka Inhryda Šymanicie. Za Naŭsiedu prahałasavali 45% vybarcaŭ, za Šymanicie — 20%.
U Litvie isnuje kansensus pa asnoŭnych kirunkach zamiežnaj palityki, temami vybaraŭ byli ŭ asnoŭnym unutrypalityčnyja pytańni — siarod jakich, da prykładu, ci pavinna matematyka być abaviazkovym vypusknym ekzamienam.
Adnak jość i palityčnyja pytańni, jakija dzialili kandydataŭ i jakija datyčać biełarusaŭ.
Tak, Hitanas Naŭsieda vystupaŭ za toje, kab abmiežavańni dla hramadzian Biełarusi byli ŭraŭnavanyja z abmiežavańniami dla hramadzian Rasii. A parłamienckaja bolšaść, jakuju ŭznačalvajuć kansiervatary Šymanicie, hetyja prapanovy błakavała. Akramia taho, Naŭsieda vystupaje za pieravod siarednich škoł, jakija pracujuć na movach «niesiabroŭskich krain», na litoŭskuju movu, što pryviało b taksama da zakryćcia vilenskaj biełaruskaj himnazii imia Franciška Skaryny. Šymanicie suprać takoj prapanovy.
Naŭsieda išoŭ na vybary jak niezaležny kandydat. Jaho padtrymali ŭ tym liku levacentrysckija sacyjał-demakraty.
Šymanicie była vyłučanaja partyjaj Chryścijanskich demakrataŭ — Sajuzam Ajčyny. Jaje baza padtrymki — Vilnia, jana tut pieramahła.
Treciaje miesca na vybarach zaniaŭ advakat Ihnas Viehiele z 12% hałasoŭ, jaho padtrymlivali pravyja partyi.
Na čaćviortym miescy — papulist Remihijus Žamajtajcis z 9% hałasoŭ.
Naŭsieda pieramoh Šymanicie ŭ druhim kruhu i na minułych vybarach. Čakajecca, što jon paŭtoryć svoj pośpiech i zaraz.
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova5
Kamientary