Dačka palitźniavolenaj Aleny Hnaŭk vyjechała ź Biełarusi z tryma dziećmi
Dla Alaksandry Siemianiuk, dački palitźniavolenaj piensijanierki Aleny Hnaŭk na płatformie Bysol abjaŭleny zbor. Jana vymušanaja była niadaŭna pakinuć Biełaruś razam z tryma dziećmi.
Historyja žančyny apisanaja na sajcie Bysol.
«Kožnaje zatrymańnie mamy, šmatlikija sudy, pieratrusy i turemny termin, byli stresam i vielizarnym pieražyvańniem dla mianie i maich dziaciej. Ale toje, jak trymałasia i trymajecca maja mama ŭ 67 hadoŭ, niahledziačy na ŭsie katavańni i pieraśledy ŭ turmie — dla mianie prykład vielizarnaj stojkaści, siły niazłomnaha charaktaru i žyćcialubstva», — piša Alaksandra Siemianiuk.
Žančyna rabiła ŭsio mahčymaje, kab dapamahać maci za kratami i infarmavać hramadstva pra toje, što ź joj tam adbyvajecca. Źjazdžać ź Biełarusi jana nie źbirałasia, ale ranicaj 23 studzienia da jaje pryjšli siłaviki. U domie adbyŭsia pieratrus, toje-sioje kanfiskavali, a samu Alaksandru advieźli na šaścihadzinny dopyt u KDB.
Paśla dopytu dachaty jaje nie adpuścili, a zamiest hetaha advieźli ŭ Śledčy kamitet i vystavili abvinavačvańnie pa art. 361 KK RB (zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś).
Faktyčna žančynu pieraśledavali za dapamohu, atrymanuju joj ad arhanizacyi DissidentBy. Jaje pasadzili na troje sutak u IČU ŭ žachlivyja ŭmovy, a paśla vychadu z turmy jana navažyłasia na emihracyju, kab nie zastalisia biez apieki maci troje dziaciej, jakich Alaksandra haduje adna.
Ź minimalnaj kolkaściu hrošaj i rečaŭ u krasaviku 2024 hoda siamja vyjechała ź Biełarusi i ciapier pačynaje novaje žyćcio ŭ Polščy. Alaksandra Siemianiuk ź dziećmi znachodzicca ŭ šełtary dla biełarusaŭ i maje mocnuju patrebu ŭ finansavaj padtrymcy.
«Nam treba źniać žyllo, z mahčymaściu apłaty na niekalki miesiacaŭ napierad. Nabyć rečy i pradmiety pieršaj nieabchodnaści, bo niama navat elemientarnych rečaŭ — nie tak šmat my zmahli pryvieźci ŭ zaplečnikach. Pakul my tut adaptujemsia, lehalizujemsia — bieź siabroŭ i pracy ja nie razumieju, čym i jak ja budu karmić svaich dziaciej. Tamu ja šukaju dapamohu ŭ kožnaha, chto moža zrazumieć i padzialić majo stanovišča i stan», — piša žančyna.
Padtrymać Alaksandru Siemianiuk i jaje dziaciej možna pa spasyłcy.
Maci Alaksandry Alenu Hnaŭk, 67-hadovuju piensijanierku z Pružanščyny, z 2020 hoda asudzili ŭžo čatyry razy pa palityčnych kryminalnych spravach. Ciapier da jaje vyzvaleńnia zastałosia prykładna dva hady. Adbyvaje termin žančyna ŭ kałonii № 24 u Zareččy Rečyckaha rajonie.
Pa infarmacyi pravaabaroncaŭ, Alenie Hnaŭk pavinny byli zrabić apieracyju na kišečniku, bo tam źjavilisia novaŭtvareńni, ale ci zrabili — nieviadoma. Uvohule ź joj niama suviazi ŭžo amal paŭhoda.
Bolš za piać miesiacaŭ niama suviazi z 67-hadovaj palitźniavolenaj Alenaj Hnaŭk
«Sama jurystka, i dzielicca viedami z novymi siabroŭkami». Alena Hnaŭk u kałonii starajecca nie sumavać
Palitźniavolenuju Alenu Hnaŭk pieraviali ŭ žanočuju kałoniju ŭ Zareččy
«Jana ŭ pastajannaj malitvie». Pryjšła viestačka ad Aleny Hnaŭk
66-hadovaj palitźniavolenaj Alenie Hnaŭk dadali hod kałonii
Litoŭski viaskovy padvorak na miažy ź Biełaruśsiu vyhladaje, jak aŭtasałon pa prodažy premijalnych aŭto VIDEA1
Kamientary