Jeści mieniej miasa i admovicca ad ałkaholu. Minzdaroŭja raskazała, jak pieražyć śpioku
I nie sapsavać sabie ŭražańnie ad piknika.
Ministerstva achovy zdaroŭja apublikavała rekamiendacyi, jakija dapamohuć pieražyć śpioku i adpačyć na pryrodzie biez pryčynieńnia škody zdaroŭju.
Tak, Ministerstva achovy zdaroŭja zaklikaje źviartać uvahu na terminy prydatnaści praduktaŭ i vykidvać ich pry najmienšym padazreńni, što jany sapsavalisia abo što chaładzilnik pracuje drenna. Viedamstva prosić kuplać pradukty, asabliva miasa, u kramach i na stacyjanarnych rynkach, a nie ŭ miescach niesankcyjanavanaha handlu.
Taksama Minzdaroŭja kateharyčna nie rekamienduje zajmacca hatavańniem dla siamji i siabroŭ, kali vy drenna siabie adčuvajecie — naprykład, balić žyvot, adčuvajecie młosnaść, jość dyjareja. U takim vypadku varta nieadkładna źviarnucca da doktara.
Kali vy sabralisia na piknik, usie pradukty, što chutka psujucca, varta pieravozić u sumcy-chaładzilniku. Pradukty pavinny być abaronieny ad nasiakomych, hryzunoŭ i inšych žyvioł. Pierad užyvańniem važna pamyć abo pradezinfikavać ruki. Pradukty varta myć tolki butylavanaj abo kipiačonaj vadoj.
Vykarystoŭvać dla bytavych patreb vadu dla vadajomaŭ nielha.
Padčas śpioki Minzdaroŭja rekamienduje nie znachodzicca na vulicy pad pramymi soniečnymi pramianiami. Abaviazkova nadziavać svabodnuju vopratku z naturalnych tkanin, hałaŭnyja ŭbory i soniečnyja akulary. Užyvać varta najmienš kałaryjnuju ježu, miasa varta skaracić da minimumu, a ad tłustaj ježy lepš naohuł admovicca.
Pryjomy ježy varta pieranieści na mienš haračy čas dnia. Važna pić dastatkova vadkaści vady, harbaty, minieralnaj vady, morsu, kisłamałočnych napojaŭ ź nizkim utrymańniem tłušču, advaraŭ z suchafruktaŭ, vitaminizavanych napojaŭ.
A voś ałkaholnych, sałodkich hazavanych i enierhietyčnych napojaŭ rajać paźbiahać. Ludziam z zachvorvańniami nyrak i sardečna-sasudzistaj sistemy rezka pavialičvać spažyvańnie vadkaści nielha.
Kamientary