Rasija namahajecca sarvać Samit miru, a Kitaj vystupaje instrumientam u rukach Pucina — Zialenski
Bolš za sto krain paćvierdzili ŭdzieł u Samicie miru ŭ Šviejcaryi 15 červienia, zajaviŭ prezident Ukrainy Uładzimir Zialenski, jaki znachodzicca na kanfierencyi «Dyjałoh — Šanhry Ła» ŭ Sinhapury.
«U nas jość siońnia paćviardžeńnie 106 krain śvietu. I heta na vysokim uzroŭni: na ŭzroŭni lidaraŭ, na vysokim uzroŭni pradstaŭnikoŭ svaich krain», — cytuje Zialenskaha BBC.
Pavodle jaho słoŭ, Rasija sprabuje sarvać mierapryjemstva.
«Rasija siońnia jeździć pa mnohich krainach śvietu, pahražajučy błakadaj charčovaj pradukcyi, ahrapradukcyi abo chimii, koštami na enierhietyku abo prosta ciśnie na inšyja dziaržavy śvietu, kab jany nie byli na samicie», — adznačyŭ Zialenski.
«I tamu, kali vy pytajeciesia, što moža zrabić siońnia śviet, śviet pavinien być mocnym, cisnuć palityčna na Rasiju. Pa-inšamu spynić Pucina niemahčyma, tolki dypłamatyčnaja izalacyja, mocnaje ŭkrainskaje vojska, nu i razabracca ŭsim krainam śvietu da kanca: nie bałansavać pamiž Ukrainaj i Rasijaj, a abaraniać spraviadlivaść i mižnarodnaje prava», — dadaŭ prezident Ukrainy.
Zialenski taksama vykazaŭ rasčaravańnie tym, što niekatoryja suśvietnyja lidary, uklučajučy kiraŭnikoŭ ZŠA i Kitaja, dahetul nie paćvierdzili svoj udzieł u samicie.
«Złučanyja Štaty paćvierdzili svoj udzieł na vysokim uzroŭni. U nas jość šaniec, što prezident budzie. Što tyčycca Kitaja, jany nie paćvierdzili svaju prysutnaść na lubym uzroŭni. Złučanyja Štaty majuć kantakty ź niekatorymi dziaržavami i zaachvočvajuć ich udzielničać u Samicie miru. Kitaj, na žal, naadvarot — pracuje nad tym, kab krainy nie pryjazdžali na Samit miru. Vialikaja roźnica pamiž dvuma hetymi pazicyjami», — raźviŭ svaju dumku prezident Ukrainy.
Adkazvajučy na pytańnie, ci pahodzicca jon uziać udzieł u asobnaj kanfierencyi, jakuju płanujuć pravieści Kitaj i Brazilija z udziełam Rasii, ukrainski prezident zajaviŭ: «Ukraina, jak achviara hetaj vajny, mieła prava inicyjavać šlach da zaviaršeńnia vajny, a mienavita Samit miru».
«Nichto nie maje prava kazać nam, jak pavinna skončycca hetaja vajna. Jana pavinna skončycca pa zakonie, u adpaviednaści ź mižnarodnym pravam. Pa spraviadlivaści. I heta abaviazkova. My zaprasili i Kitaj, i Braziliju, i ŭsie krainy my zaprašajem», — skazaŭ prezident Ukrainy.
Zialenski adznačyŭ, što na pieršym Samicie miru buduć abmiarkoŭvacca try z 10 punktaŭ prapanavanaj im formuły miru: jadziernaja biaśpieka, charčovaja biaśpieka i vyzvaleńnie vajennapałonnych i vyviezienych u Rasiju ŭkrainskich dziaciej.
Rasiju na samit nie zaprasili.
Kamientary