Čym siońnia zajmajucca niekali viadomyja hieroi ŽŽ? Spojler: mnohija tak i nie zakinuli błohierstva
Siońnia jakich tolki błohieraŭ niama: i jutub, i tyktok, i instahram-aŭtary. A ŭ nulavyja supierpapularnaj płatformaj siarod biełarusaŭ (i nie tolki) byŭ LiveJournal, u narodzie — «ŽŽ». Anłajn-placoŭka dla viadzieńnia dziońnikaŭ, pieršapačatkova stvoranaja ŭ ZŠA, vielmi zajšła ŭ ruskamoŭnaj prastory. Miljony karystalnikaŭ dzialilisia na joj receptami, svaimi mierkavańniami na palityčnyja i sacyjalnyja temy, pieražyvańniami i plotkami.
«Naša Niva» vyrašyła zhadać niekatorych viadomych ŽŽ-piersanažaŭ nulavych i daviedacca, čym jany zajmajucca siońnia.
U 2015 hodzie piśmieńnicu Volhu Hramyku ŭ niekatorych apytankach stavili na druhoje miesca pa paznavalnaści siarod sučasnych biełaruskich aŭtaraŭ (paśla Uładzimira Niaklajeva).
Hramyka piša ŭ žanry fentezi. Jaje ŽŽ, dzie jana vykładvała častki tvoraŭ i jaki vykarystoŭvała dla pijaru svajoj litaraturnaj dziejnaści, u 2013 hodzie trapiŭ na pieršaje miesca pa papularnaści siarod biełaruskich błohaŭ.
U pačatku hetaha hoda Hramyka prezientavała ŭ Minsku svaju novuju knihu — «Kibierkanikuły». Na sustreču z aŭtarkaj u stalicu niekatoryja prychilniki jechali ažno z Sachalina i Maskvy. Jana praciahvaje žyć u Minsku i publikavacca ŭ rasijskich vydaviectvach.
Žyćciovy błoh Natalli lililoveme niekali ŭpeŭniena trymaŭsia ŭ top-10 u biełaruskaj prastory. Byłaja supracoŭnica IT zasnavała i raźvivała škołu kandytarskaha majsterstva. U ŽŽ publikavała recepty, uražańni z vandrovak — hetki łajfstajł.
Siamja pierajechała ź Minska ŭ Varšavu ŭ 2016-m. Tam Natalla razam z mužam Dźmitryjem praciahnuła raźvivać kandytarskuju anłajn-škołu. Napisanaje Natallaj raniej vypuścili ŭ farmacie knižak i na hetym z knihavydaviectvam nie zaviazali. Siońnia heta adzin z nakirunkaŭ dziejnaści muža Natalli. Tak, Źmicier vypuściŭ azbuku «ABC for multilinguals».
Sama Natalla aktyŭna raźvivaje instahram, publikuje humarnyja ryłsy. Siarod hałoŭnych hierojaŭ videa — jaje kot i dačka Jeva. Na siońnia tam amal 60 tysiač padpisantaŭ.
«Ja pijar-śpiecyjalistka, vandroŭnica i moraholik», — prezientavała siabie ŭ ŽŽ Alena Stohava. Ahlady restaranaŭ, modnych rečaŭ, zamaloŭki z pajezdak i tranślavańnie śvieckaha žyćcia byli dosyć papularnymi i pryviali da taho, što jaje ŽŽ adnojčy pierajechaŭ na ŭłasny sajt. Praŭda, z 2021 hoda jon nie abnaŭlajecca.
Ciapier Stohava žyvie ŭ Manaka — spačatku jana aktyŭna tranślavała svajo žyćcio ŭ instahramie, ale z 2023-ha hoda cicha i tam.
A voś instahram pijar-śpiecyjalistki Taćciany Kurbat žyvie. Jana taksama pierajechała na hetuju placoŭku paśla pieryjadu ŽŽ i ŭłasnaha sajta.
Livejournal «Ničoha lišniaha» byŭ pra zdarovaje, aktyŭnaje žyćcio, pryhažość i ščaście. Siońnia Taćciana žyvie ŭ Vilni, praciahvaje zajmacca pijaram i dzielicca svaimi dumkami na samyja roznyja temy.
Padobnaj tematyki byŭ i papularny niekali ŽŽ Julii Novik, ale jon jašče ŭklučaŭ raspoviedy pra maciarynstva.
Razam z mužam dziaŭčyna zasnavała optyku LOOK — siońnia heta cełaja sietka mulcibrendavych sałonaŭ.
Paśla spadu papularnaści ŽŽ Julija taksama pieramiaściłasia ŭ instahram — na jaje padpisanyja bolš 120 tysiač čałaviek, jakim jana raskazvaje pra «dom, interjer, siamju, ježu».
Zdajecca, kali b Asia Papłaŭskaja praciahvała aktyŭna vieści błoh apošnija hady svajho žyćcia, to jon by mieŭ šalonuju papularnaść, bo jaje ładna pamatała. Ale dziela navicyjatu (pieryjad pasłušnictva i vyprabavańnia pierad ustupleńniem u manaski orden) Asia amal na piać hadoŭ admoviłasia ad sacsietak i sdavała spravazdaču tolki Bohu.
Ciapier jana pacichu vychodzić u anłajn i raskazvaje pra pieražytaje ŭ instahramie.
Asia sama dzivicca: jak eks-žurnalistka i błohierka navažyłasia na takoje? I sapraŭdy jaje siońniašniaje raźmieranaje žyćcio ŭ polskim klaštary mocna adroźnivajecca ad raniejšych pajezdak pa Jeŭropie, pachodaŭ pa kafe i vystavach, pra jakija jana pisała ŭ ŽŽ.
Adzin z pačynalnikaŭ mienavita biełaruskamoŭnaha ŽŽ Ivan Marozaŭ pravioŭ za kratami amal paŭtara hoda za ŭdzieł u pratestach. Na placoŭcy jon byŭ viadomy pad nikam hondurazian. Pisaŭ pra kulturu, vandroŭki, litaraturu.
Padobny los napatkaŭ niekali aktyŭnaha ŭ ŽŽ palitołaha Alaksandra Fiadutu — jon byŭ asudžany na 10 hadoŭ źniavoleńnia pa artykule 357 Kryminalnaha kodeksa — zmova z metaj zachopu ŭłady niekanstytucyjnym šlacham.
A takija eks-ŽŽšniki, jak, naprykład Anton Matolka, što dzialiŭsia tam svaimi fotazdymkami i repartažami, pačynajučy z 2006 hoda, ci ekanamist Siarhiej Čały ciapier u vymušanaj emihracyi. Apošni dopis u ŽŽ Siarhieja datujecca 2014 hodam i pryśviečany Krymu.
Hałoŭnym plusam ŽŽ była navatarskaja dla svajho času raznastajnaść žanraŭ. Možna było znajści błoh dla dušy amal luboj tematyki. Naprykład, błoh lekara-patołahaanatama Andreja Padolskaha karystaŭsia šalonaj papularnaściu.
Na placoŭcy chapała cikavych histaryčnych prajektaŭ. Adzin ź viadomych — ad Maksima Miroviča, praciahvaje žyć dahetul, tolki ŭžo pa novych adrasach.
Naprykład, u telehramie na kanał MirovichMedia padpisana amal 100 tysiač čałaviek. Hałoŭnaja tema tam — SSSR i jaho nastupstvy, historyja i palityka. A paśla vajny va Ukrainie — padrabiaznaja chranałohija i analityka rasijskaj ahresii.
ŽŽ-skandały
Asobna varta spynicca na skandalnych hierojach, jakich aktyŭna abmiarkoŭvali ŭsim ŽŽ. Ilvinuju dolu ŭvahi tut u svoj čas adchapiła Iryna Kabasakał. U minułym — redaktarka hlancavaha časopisa «Pinhvin».
Adzin z samych našumiełych artykułaŭ jaje aŭtarstva — pra bažestviennaha Zuraba. U zakaznym materyjale Kabasakał tak raśpisała jakaści mužčyny, što toj paśla vychadu časopisa pračnuŭsia znakamitym.
«Bažestvienny Zurab. Bažestvienny — mienavita tak achryścili jaho tata-azierbajdžaniec i mama-biełaruska. I choć imia jaho pa pachodžańni hruzinskaje, tamu što babula jaho była hruzinkaj, heta tolki dadaje razynačku jaho źniešnaści i charaktaru. Zurab… Niezvyčajny, ščyry, jarki, epatažny, mocny, vysakarodny — možna da biaskoncaści pieraličvać usie jaho mužčynskija jakaści. Jon prosta lubić dobryja aŭtamabili, i jany jamu pasujuć! Jon małady i ambicyjny. Jon lubić usio samaje lepšaje — najlepšyja kurorty, najlepšyja kłuby i restarany, adpačyvaje zaŭsiody tolki ŭ najlepšych hatelach, jon pje tolki najlepšaje šampanskaje…»
Paźniej Zurab Arudžaŭ vybraŭ žyć bolš ścipłym i cichim žyćciom, zajmaŭsia biznesam i nibyta sa škadavańniem zhadvaŭ tuju pijar-kampaniju.
Jašče adzin znakamity opus majstrycy pijaru Kabasakał byŭ pryśviečany «śviatoj hrešnicy Irynie Rak».
Voś tolki adna cytata z taho artykuła: «Adnojčy jana zajmałasia seksam u adnym ź jeŭrapiejskich kłubaŭ prosta na tancplacoŭcy. Heta štučka pamiašanaja na seksie, a jon na joj…. Jana hetym i biare mužčynu za tyja patajemnyja šaryki, jakija jon tak aściarožna achoŭvaje ŭ svaich nahavicach. Dačka lekara i ŭ minułym baleryna Vialikaha teatra opiery i baleta atrymała vychavańnie, adukacyju i, samaje hałoŭnaje, raściažku — usio, što patrebna dla spakušeńnia razumnaj pałovy čałaviectva».
Siońnia taja samaja Iryna Rak žyvie ŭ Dubai i pracuje fitnes-trenierkaj.
Iryna Kabasakał, jakaja ŭziała proźvišča muža i stała Jabłonskaj, taksama pieraklučyłasia na zdaroŭje: ciapier jana — dyjetołah, jaki dapamahaje ludziam chudzieć i zdaravieć.
Dadavaŭ ŽŽ-supolnaści temaŭ na abmierkavańnie Žan Sodziel — žurnalist-kamunist i danosčyk, pra jakoha my niadaŭna padrabiazna pisali. Jak pakazvajuć archivy, z tych časoŭ amal ničoha nie źmianiłasia. Tolki kali raniej u biedach Biełarusi Sodziel vinavaciŭ Rasiju i Zachad, to ciapier tolki apošni.
Ale samym abmierkavanym tady byŭ praces z žadańniem Sodziela zasudzić taho, chto nazvaŭ jaho ŭ internecie «hałubym». «Čałaviek ja adkryty, čysty naturał i heta nikoli ni ad kaho nie chavaŭ. U mianie było 16 dziaŭčat. Kožnaja ź ich upeŭnienaja ŭ majoj aryjentacyi na 100%», — staraŭsia danieści praŭdu da internet-supolnaści błohier.
Jašče adzin hieroj ŽŽ — Alaksiej Akimaŭ praciahvaje žyć nasyčana pa siońnia.
Raniej jon ździŭlaŭ hramadskaść tym, što to rekłamu svaich pasłuh nadrukuje na tahačasnych 50 miljonach rubloŭ, to pakliča ŭsich achvotnych da siabie na katedž.
Alaksiej, jaki pazicyjanuje siabie jak apieratar i pradziusar, i siońnia praciahvaje pravakavać — jon časty hość dziŭnych skandalnych šou. U adnym ź ich jon paśpieŭ raskazać, što nosić adnu kašulu voś užo 10 hadoŭ — u joj jon śpić, jeść i zajmajecca seksam.
Jašče ŭ adnym roliku mužčyna dzialiŭsia dośviedam vałodańnia haremam — raskazvaŭ, jak jamu žyviecca adrazu ź niekalkimi žančynami.
A vy kaho čytali ŭ ŽŽ?
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka48
Kamientary
Vydalicie heta i nie hańbiciesia. Vy nie razumiejecie pra što pišacie.