U Varšavie adkryŭsia toj samy bar «Banki-butyłki». Što atrymałasia?
U Varšavie adkryŭsia bar Buns&Bottles. Heta adnaŭleńnie lehiendarnaha minskaha prajekta «Banki-butyłki», jaki siamiejnaja para ź Biełarusi — Andrej i Maryja Žuki — pieraviezła z saboj u vymušanuju emihracyju. Nazvu pieraviali na anhlijskuju, farmat staŭ bližejšy jeŭrapiejskamu naviedvalniku, ale atmaśfiera i lubimyja biełarusami kaktejli zastalisia. Žurnalist MOST schadziŭ na adkryćcio i parazmaŭlaŭ z uładalnikami ŭstanovy.
Što heta za bar i čamu pra jaho ŭsio havorać
Bar «Banki-butyłki» raźmiaščaŭsia ŭ centry Minska, na samaj «tusovačnaj» vulicy biełaruskaj stalicy — Zybickaj. 3 žniŭnia 2022 hoda śpiavačka Meryjem Hierasimienka vykanała na vuličnaj placoŭcy bara pieśniu «Obijmi» ŭkrainskaha hurta «Okiean Jelzi». Paśla napadak prapahandystaŭ jana była zatrymanaja i dvojčy adsiadzieła pa 15 sutak, a paźniej była asudžana da troch hadoŭ «chatniaj chimii». Byli zatrymanyja i ŭładalniki bara — Andrej i Maryja Žuki. Ich prysudzili da dvuch z pałovaj hadoŭ «chimii».
Usim im udałosia paśla pakinuć krainu i pierabracca ŭ Polšču — tut Žuki i Hierasimienka, jakaja stała suzasnavalnikam, dali prajektu druhoje žyćcio.
Jakim atrymaŭsia varšaŭski bar
Varšaŭski bar — dvuchpaviarchovy. Unizie jość nievialiki pakoj dla pryvatnych mierapryjemstvaŭ — jaho možna arandavać, kab pasiadzieć kampanijaj, izalavaŭšysia ad astatnich naviedvalnikaŭ.
Na vierchnim paviersie raźmiaščajecca vialikaja zała, u jakoj ustalavana doŭhaja barnaja stojka i stoliki z kresłami i kanapami. Interjer ustanovy źmianiŭsia — pa słovach Andreja i Maryi, zaraz u im bolš elehantnych i dalikatnych elemientaŭ. Uładalniki pastaralisia źmiakčyć łoft ź jaho nieapracavanymi cahlanymi ścienami, adkrytymi belkami i trubami.
— Kali pieršy prajekt stvaraŭsia, kali łoft byŭ na piku papularnaści, to ciapier u nas inšyja materyjały, inšy posud — chočam nadać našamu baru krychu hlancu, skažam tak. Heta adlustroŭvajecca jak u napojach, tak i ŭ dyzajnie. Naprykład, raniej my vykarystoŭvali dub dla barnaj stojki, a zaraz u nas kamień, — raskazvaje Andrej Žuk.
Kaktejlnaja karta zachavała tradycyi minskaj ustanovy, ale zjavilisia i novyja kaktejli i šoty.
— Z našych bestseleraŭ u pieršuju čarhu prapanujem pasprabavać «Pabła Eskabar», — kaža Andrej. — Jašče my robim svoj limančeła (italjanski cytrynavy likior. — Zaŭv. MOST), ź jakoha — ź ihrystym vinom — rychtujecca kaktejl Last chance to dance. Try nastojki pryjechali z nami [ź Biełarusi], a dźvie — novyja. Emihravaŭ ź Minska šot «Ščaŭje Pabła», ale jość i navinki — takija jak «Marakuja». Kožnyja try miesiacy kaktejlnaja karta budzie abnaŭlacca. Nam jość čym dzivić. Tamu budziem radavać haściej ekstremalnymi i ekzatyčnymi spałučeńniami.
Muž i žonka kažuć, što imknucca prytrymlivacca trendaŭ barnaj industryi. Adzin ź ich — pamier barnaj stojki. Jana ciapier stała značna nižejšaj, i heta mianiaje nie tolki interjer ustanovy, ale i atmaśfieru.
— Standartnaja barnaja stojka — u rajonie 1, 2 mietra ŭ vyšyniu, a ŭ nas jana ciapier — 1 mietr. Dziakujučy hetamu hości zmohuć mieć znosiny z barmenam i bačyć kožny jaho ruch. Kali pry standartnaj vyšyni naviedvalniki zvyčajna nie razumiejuć, što adbyvajecca pry hatavańni kaktejlu, to zaraz usio hatujecca prama ŭ ich na vačach. Takim čynam mianiajecca i aŭra ŭ bary.
Pa viečarach u Buns&Bottles hetak ža, jak i ŭ Minsku, budzie hučać žyvaja muzyka. Meryjem Hierasimienka vystupiła na adkryćci ŭstanovy i płanuje rehularna śpiavać u bary. Žyvoje vykanańnie možna budzie pačuć u čaćvier, piatnicu i subotu, ale nie vyklučana, što artysty buduć śpiavać i ŭ inšyja dni. Płanujucca taksama kałabaracyi biełaruskich i polskich vykanaŭcaŭ.
Jak adkryvali bar u Varšavie
Andreju i Maryi ŭdałosia znajści inviestaraŭ, jakija vydzielili srodki, nieabchodnyja dla adkryćcia bara, ad muža i žonki patrabavaŭsia tolki brend i kiravańnie ŭstanovaj. Kamanda pierajechała ź Biełarusi — heta ludzi, ź jakimi vosiem hadoŭ tamu Andrej i Maryja adkryvali bar. Muž i žonka padkreślivajuć, što ŭpeŭnienaści im nadało toje, što ŭ Varšavie šmat biełaruskich i ŭkrainskich ustanoŭ.
— Za apošnija hady biełarusy i ŭkraincy adkryli ŭ polskaj stalicy šmat čaho. Ź niekatorymi stvaralnikami ŭstanoŭ my stelefanoŭvalisia i sustrakalisia. Jany nas kansultavali, dzialilisia dośviedam. Tamu nam było praściej, bo my viedali mnohija pamyłki, jakija dapuścili našyja kalehi. A jašče ŭ Varšavie vielmi šmat padradčykaŭ-biełarusaŭ: plitačniki, santechniki, elektryki. Tamu [pry padrychtoŭcy da adkryćcia] moŭny barjer nie byŭ pieraškodaj. Palaki nam tolki zalili ściažku i ŭstalavali lusterki, usio astatniaje rabili biełarusy, — kaža Andrej.
Muž i žonka adznačajuć, što im spadabalisia i polskija zakony. Biurakratyčnych pracedur akazałasia ŭ razy mienš, a kantrol z boku dziaržavy ŭ Polščy nie taki surovy, jak na radzimie.
— Niama nijakaj milicyi, pažarnikaŭ, administracyi, a jašče historyi z kamierami. Sprava ŭ tym, što ŭ Minsku jość śpiecyjalny ałharytm videanazirańnia: u ciabie pavinien być žorstki dysk, jaki zachoŭvaje ŭsie zapisy 30 dzion. A tut my prosta kajfanuli ad polskaha zakanadaŭstva! Usio maksimalna prosta: sanstancyja, licenzija, SKPO (srodak kantrolu padatkovych orhanaŭ. — Zaŭvaha. MOST) — i pajšoŭ pracavać!
Byłyja palitviaźni pieraadkryvajuć bar — tyja samyja «Banki-Butyłki», jakija zakryli paśla vykanańnia tam pieśni «Okiean Jelzi»
Śpiavačku Meryjem zatrymlivali hubazikaŭcy. «Paśla maimi kartkami raspłačvalisia dva miesiacy — amal 900 jeŭra»
Śpiavačka i byłaja palitźniavolenaja Meryjem Hierasimienka vyjšła zamuž
«Pavinien vyjści Pačobut». Polski ministr Sikorski znoŭ zahavaryŭ pra mahčymaje zakryćcio miažy dla hruzaŭ7
Kamientary