Čarnamorski fłot Rasii vymušany pieradysłacyravać amal usie bajazdolnyja karabli z Kryma ŭ inšyja miescy, a jaho hałoŭny vajenna-marski vuzieł stanovicca nieefiektyŭnym z-za atak Kijeva.
U intervju vydańniu Reuters hałoŭnakamandujučy VMS Ukrainy vice-admirał Alaksiej Nieižpapa adznačyŭ, što Čarnamorski fłot Rasii byŭ vymušany pierabaziravać amal usie svaje bajazdolnyja vajennyja karabli z akupavanaha Kryma ŭ inšyja miescy.
Pa jaho słovach, udary ŭkrainskich rakiet i bieśpiłotnikaŭ nanieśli surjozny ŭron bazie ŭ Sievastopali, jakaja źjaŭlajecca łahistyčnym centram dla ramontu, absłuhoŭvańnia, navučańnia i zachoŭvańnia bojeprypasaŭ, a taksama vykonvaje inšyja važnyja dla Rasii funkcyi.
«Heta stvarałasia na praciahu mnohich dziesiacihodździaŭ, mahčyma, stahodździaŭ. I vidavočna, što ciapier jany hublajuć hety chab. (…) Praktyčna ŭsie asnoŭnyja bajazdolnyja karabli vyviedzieny praciŭnikam z hałoŭnaj bazy Čarnamorskaha fłotu i znachodziacca ŭ Navarasijsku, a častka ź ich — u Azoŭskim mory», — cytuje vydańnie słovy Nieižpapy.
Jak adznačaje vice-admirał, Sievastopal słužyŭ miescam zachoŭvańnia i pahruzki kryłatych rakiet, jakija vykarystoŭvalisia vajennymi karablami dla naniasieńnia ŭdaraŭ pa Ukrainie. Ciapier hetuju zadaču sprabujuć vyrašać u Navarasijsku. Adnak rasijskaja vajenna-marskaja baza ŭ hetym horadzie nie vałodaje takimi šyrokimi mahčymaściami, jak Sievastopal.
Nieižpapa raskazaŭ, što Ukraina likvidavała ci paškodziła 27 vajenna-marskich sudoŭ. Ź ich piać byli likvidavany z dapamohaj marskich min, jakija ŭstanavili ŭkrainskija vajenna-marskija bieśpiłotniki kala Sievastopalskaha zalivu.
Ciapier, pa słovach hałoŭnakamandujučaha VMS Ukrainy, niekatoryja rasijskija vajennyja karabli, jakija redka zachodzili ŭ Azoŭskaje mora, rehularna tam dysłacyrujucca.
Danyja manitorynhu, sabranyja ŭkrainskimi VMS i pradstaŭlenyja Reuters, pakazali, što pa stanie na 27 červienia ŭ Azoŭskim mory znachodziłasia 10 rasijskich vajennych karabloŭ, tady jak u 2023 hodzie — nivodnaha.
Ciapier Rasija, pa słovach Nieižpapy, vykarystoŭvaje svoj Čarnamorski fłot u asnoŭnym dla łahistyki, častkovaha kantrolu prybiarežnych terytoryj i dla abstrełu Ukrainy kryłatymi rakietami «Kalibr».
Hałoŭnakamandujučy VMS Ukrainy adznačyŭ, što stymułam dla taho, kab kinuć vyklik «poŭnamu daminavańniu» Rasii ŭ niebie nad Čornym moram, stanie pastaŭka Ukrainie ŭ chutkim časie źniščalnikaŭ F-16.
«F-16 z adpaviednym uzbrajeńniem zmohuć adciaśnić rasijskija vajskovyja samaloty. Paŭnočna-zachodniaja častka Čornaha mora, asabliva kalidor dla hramadzianskich sudoŭ, budzie amal na 100% biaśpiečnaj», — skazaŭ jon.
Pakul Ukraina ździajśniaje marskija znosiny tolki z troch partoŭ Adesy. Z-za kantrolu Rasii nad Kinburnskaj kasoju pakul nie atrymlivajecca ŭklučać u znosiny party Mikałajeva i Chiersona.
Pravaabaroncy: Niekatoryja palitviaźni admovilisia vychodzić na volu 3 lipienia, nie pahadziŭšysia z umovami vyzvaleńnia1
Kamientary