Minski zavod vinaŭ adkazaŭ Rasii na «šmurdziak» — pastaŭki vina ŭ RF spyniajucca
Minski zavod vinahradnych vin zajaviŭ ab namiery spynić pastaŭki vina ŭ Rasiju i prakamientavaŭ zajavu pradstaŭnikoŭ rasijskaha vinarobnaha rynku adnosna jakaści svajoj pradukcyi, piša RBK.
«Asnoŭny abjom vinarobnaj pradukcyi realizujecca na ŭnutranym rynku Respubliki Biełaruś. Pastaŭka vinaŭ u adras rasijskich dystrybutaraŭ ažyćciaŭlajecca ŭ testavym režymie i ŭ małavažnych abjomach, bo vytvorčyja mahutnaści pradpryjemstva abmiežavanyja. Akramia taho, uličvajučy mytnyja pošliny pry ŭvozie jeŭrapiejskich vinamateryjałaŭ u Respubliku Biełaruś i rost koštaŭ na ich, MZVV płanuje spynić vytvorčaść vinaŭ na ekspart u Rasijskuju Fiederacyju», — zajavili ŭ MZVV.
Taksama ŭ kampanii prakamientavali zajavy pradstaŭnikoŭ rasijskaj vinarobnaj haliny ab tym, što pradukcyja MZVV nie maje prava nazyvacca vinom.
U kampanii adznačyli, što zakup vinahradnych vinamateryjałaŭ, bałkavaha vina ź vinarobnych rehijonaŭ i krain, a taksama ich transparciroŭka i raźliŭ vina zjaŭlajucca zvyčajnaj suśvietnaj praktykaj vytvorčaści vinahradnych vin. Anałahičnuju praktyku z takoj syraviny ŭžyvajuć na MZVV.
«MZVV stroha vykonvaje patrabavańni zakanadaŭstva ab intelektualnaj ułasnaści ŭ tych vypadkach, kali dla markiroŭki pastaŭlenaj pradukcyi vykarystoŭvajucca zarehistravanyja tavarnyja znaki. Prava na ich vykarystańnie, źniešni vyhlad i orhanaleptyčnyja charaktarystyki ŭzhadniajucca z pravaŭładalnikami. Usia pradukcyja MZVV vyrablajecca zhodna ź dziejučym narmatyŭnym aktam i adpaviadaje techničnym rehłamientam», — padkreślivajecca ŭ paviedamleńni.
Jak paviedamlaŭ «Kommiersant», rasijskija ałkaholnyja dystrybutary atrymali prava ŭvozić u krainu vina ad MZVV. Pry hetym nazvy pradukcyi, jakaja zavozicca ŭ Rasiju, padobnyja da najmieńniaŭ vinaŭ, jakija vyrablajucca na Zachadzie.
Ekśpierty vykazali zdahadku, što Minski zavod moža vystupać łahistyčnym plačom pamiž jeŭrapiejskimi vytvorcami i rasijskimi spažyŭcami vin. Heta źviazana z tym, što zavod, raźmieščany ŭ Biełarusi, «nikoli nie słaviŭsia» svajoj pradukcyjaj.
Raniej kiraŭnik Asacyjacyi vinahradaraŭ i vinarobaŭ Rasii Alaksiej Płotnikaŭ zaklikaŭ adznačać vino, impartavanaje praź Biełaruś, znakam «nie zjaŭlajecca vinom». Pavodle słoŭ Płotnikava, kali na MZVV raźlivajuć vino, jakoje impartujecca z krain, jakija nie ŭvachodziać u JEAES, to takija pastaŭki padryvajuć dziaržaŭnuju palityku Rasii ŭ halinie vinahradarstva i vinarobstva.
Kiraŭnik vinnaha doma «Abrau-Dziursa» Barys Citoŭ zajaŭlaŭ, što pastaŭki ŭ Rasiju pradukcyi MZVV — heta adnaŭleńnie kanała zbytu na ajčynnym rynku pradukcyi ź impartnaha bałka. «Taho samaha vinamateryjału, jaki va ŭžytku atrymaŭ mianušku «šmurdziak», — skazaŭ Citoŭ.
Vy nie pavierycie, kim akazaŭsia «vypadkovy» bajanist na vakzale, jaki śpiavaŭ pra Łukašenku19
Kamientary