Na ŭvachodzie ŭ «Vieradoŭski bor» pastavili niezvyčajny pamiatny znak, jaki budzie «adpracoŭvać» za hrachi svajho minułaha.
Zakaźnik miascovaha značeńnia «Vieradoŭski bor» zasnavany ŭ vakolicach vioski Vieradova na terytoryi Maładziečanskaha lashasa z metaj padtrymańnia i zachavańnia bijałahičnaj i łandšaftnaj raznastajnaści pryrodnaha kompleksu i prylehłych terytoryj. Jaho stvareńniu papiaredničała vialikaja praca nieabyjakavych ludziej.
Achoŭnaj terytoryja płoščaj 161,44 ha była abvieščana rašeńniem Maładziečanskaha rajvykankama jašče 7 maja 2024 hoda.
Na terytoryi zakaźnika raźmieščany dva ŭčastki ahulnaj płoščaj 7,4 ha, jakija adnosiacca da typovych i redkich bijatopaŭ, charakternych dla zachodniaj tajhi. Na płoščy 34,9 ha rastuć kaštoŭnyja vysoka-ŭzrostavyja lasy.
90% terytoryi zakaźnika, pakrytaj lesam, zajmajuć chvajovyja lasy, dla jakich charakternaje panavańnie tajhovych vidaŭ raślin.
Tut šyroka pradstaŭleny lasnyja i łuhava-ŭźlesnyja vidy tajhovaha typu. Vyjaŭlena miesca, dzie raście son raskryty (Pulsatilla patens), dzikarosłaja raślina, uklučanaja ŭ Čyrvonuju knihu Biełarusi. Akramia taho tut zaŭvažany 9 inšych uraźlivych vidaŭ raślin, jakija patrabujuć achovy: pieraleska vysakarodnaja, pieršaćviet viesnavy, zvanočak piersikalisty, kolnik kołasapadobny, hniazdoŭnik zvyčajny, hudajera paŭzučaja, čaraŭnik dvuchlisty, palčatakareńnik Fuksa i zubroŭka paŭdniovaja.
Z žyviolnaha śvietu ŭ čarničnym biareźniku vyjaŭleny barsuk (Meles meles), taksama ŭniesieny ŭ Čyrvonuju knihu.
Inicyjatyva stvaryć zakaźnik naležyć Maładziečanskamu lashasu, a padrychtavać dakumienty dapamoh načalnik rajonnaj pryrodnaj inśpiekcyi Uładzisłaŭ Čarnoŭ. Abśledavańnie fłory i faŭny i ekałahičnaje abhruntavańnie zrabiŭ Instytut ekśpierymientalnaj bataniki imia V. F. Kupreviča Nacyjanalnaj akademii navuk Biełarusi.
Čarnoŭ pryvioz z Rajoŭki dvuchtonny kamienny žoran, što zastaŭsia ad byłoj kardonnaj fabryki. Ciapier žoran staŭ niezvyčajnym miemaryjalnym znakam na ŭvachodzie ŭ zakaźnik.
«A što? Kardon ža robiać z draŭniny. Kolki dreŭ pieramałoŭ hety žoran za šmatlikija hady? Voś ciapier chaj addaje daŭhi. Pahruzili jaho padjomnym kranam i pryvieźli siudy», — patłumačyŭ ideju Čarnoŭ.
Na ŭračystaje adkryćcio zakaźnika «Vieradoŭski bor», jakoje adbyłosia 12 lipienia, pryjechali śpiecyjalisty ź Instytuta ekśpierymientalnaj bataniki i Instytuta lesu NAN Biełarusi.
Pavodle słoŭ dyrektary Instytuta ekśpierymientalnaj bataniki Dźmitryja Hrumo, «Vieradoŭski bor» heta «filijał» paŭdniovaj tajhi na terytoryi Minskaj vobłaści. Raślinnaść tut vielmi raznastajnaja, a hleba ŭradlivaja.
U 2012 hodzie bataničnym pomnikam pryrody byŭ abvieščany taksama Vieradoŭski dendrapark. Dendrapark kala zachodniaha ŭskrajku vioski Vieradova zakłali ŭ 2000 hodzie na płoščy 6,2 hiektaraŭ. Tut raście bolš za 600 drevaŭ i kustarnikaŭ, jakija pradstaŭlajuć 80 vidaŭ pradstaŭnikoŭ miascovaj i inšaziemnaj fłory.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady41
Kamientary