Praź internet možna i padjeści, i padlačycca, i navat ažanicca.
Praź internet možna i padjeści, i padlačycca, i navat ažanicca.
Pavodle statystyki, kožny treci biełarus karystajecca internetam. I čym bolš času ludzi pravodziać za manitorami, tym daskanalejšaj robicca śfiera onłajn‑pasłuh. Usie čuli pra internet‑kramy z tannaj technikaj, ale jakija jašče pasłuhi prapanuje bajnet?
Elektronnyja hrošy
Ciapier praź internet možna apłacić kamunalnyja pasłuhi, telefon, kredyt, sihnalizacyju… Navat sam internet možna apłacić praź internet! Jak?
Naprykład, z dapamohaj sistemy Easypay.
Kab joj karystacca, treba zarehistravacca na sajcie easypay.by, a paśla papaŭniać rachunak u paštovych adździaleńniach albo praz bankamaty. Śfiera onłajn‑płaciažoŭ u Biełarusi pakul raźvitaja słaba, ale na Zachadzie jana ŭžo zdabyła papularnaść. Toj, chto maje elektronnyja hrošy, vałodaje śvietam.
Virtualnaja čarha
Pryjšoŭ čas zabyvacca na čerhi ŭ palikliniku. Zapisacca da doktara možna na sajcie info.minsk.by. Usie minskija palikliniki pracujuć z pasłuhaj. Praŭda, śpis daktaroŭ pakul nievialiki — piać‑šeść śpiecyjalnaściaŭ, ale ŭčastkovyja terapieŭty jość usie biez vyklučeńnia.
U ZAHSy taksama časam treba zapisvacca za paŭhoda da viasiella. Navošta psavać pieradšlubny nastroj u čarzie? Dastatkova zajści ŭ śpiecyjalny raździeł na sajcie Minharvykankama i zareziervavać čas. Praŭda, kab padać zajavu i niepasredna ažanicca (vyjści zamuž), adarvacca ad manitora pryjdziecca…
Nakrutki ad čyhunki
Va ŭsim śviecie bilety na transpart praź internet pradajucca z ahromnistaj źnižkaj. Biełaruskija realii bolš žorstkija. Kab zamović bilet na ciahnik na sajcie rw.by, treba dapłacić 1300 rubloŭ za braniravańnie kožnaha miesca. Jašče za 15 tysiač vam mohuć pryvieźci bilet damoŭ.
Kupić bilet na samalot «Biełavija» možna z dapamohaj elektronnych hrošaj albo zabraniavać i paśla pryjechać u ofis kampanii.
«Minsktrans» dadatkovych hrošaj nie prosić, ale i pasłuhu prapanuje abmiežavanuju. Zabraniavać bilet možna tolki na šeść aŭtobusnych kirunkaŭ — u Polšču i Čechiju. Kab zamović miesca, pryjdziecca telefanavać na vakzał.
Zamiena telefonu i televizaru
Ale patelefanavać — nie značyć vyjści ź interneta. Prahrama Skype, jakoj karystajucca dziasiatki miljonaŭ ludziej pa ŭsim śviecie, dazvalaje biaspłatna telefanavać inšamu karystalniku. Kab zvanić praz skajp na haradski ci mabilny numar, treba, znoŭ ža, mieć elektronnyja hrošy. I słuchaŭki ź mikrafonam. Zvanić praź internet namnoha tańniej. Tak, zvanok na mabilnik u ZŠA budzie kaštavać 100 rubloŭ za chvilinu.
Internet zamienić nie tolki telefon, ale i televizar. Dziasiatki sajtaŭ prapanujuć biaspłatnuju tranślacyju luboha kanała — ad «Al‑Džaziry» i «Biełsata» da «Palavańnia i rybałki». Hałoŭnaje, kab chapała chutkaści interneta.
U restaran praź internet
Zadavoliŭšy intelektualnyja patreby, rana ci pozna ŭzhadaješ pra fizičnyja. Na žal — ci na ščaście? — mycca i čyścić zuby praź internet niemahčyma, a voś zamović čaho‑niebudź padjeści ŭžo možna.
Onłajn‑piceryi i kaviarni adčynilisia ŭžo i ŭ abłasnych centrach. U Minsku ich bolš za dziasiatak. Mieniu tam — jak u zvyčajnych restaranach. Ježu pryviazuć praz paŭhadziny, maksimum praz hadzinu. Kali zamovili na vialikuju sumu, za dastaŭku hrošaj nie voźmuć.
Žyć, nie adryvajučysia ad manitora, robicca ŭsio praściej. Ale varta, kab nie mieć prablemaŭ sa zdaroŭjem, davać svajmu ciełu nieabchodnuju fizičnuju nahruzku. I hałoŭnaje — bačycca ź blizkimi ludźmi. Hetaha nijakija kamunikatary nie zamieniać.
Kamientary