Dastatkova pazajmacca tolki šeść miesiacaŭ.
Navukoŭcy z Univiersiteta Kvinślenda (Aŭstralija) vyjavili, što vysokaintensiŭnyja intervalnyja praktykavańni pryviali da palapšeńnia kahnityŭnych funkcyj mozhu. Pryčym efiekt zachoŭvaŭsia na praciahu 5 hadoŭ. Vynikami svajho daśledavańnia vučonyja padzialilisia ŭ časopisie Aging and Disease.
Spačatku daśledčyki nabrali hrupu ŭ cełym zdarovych dobraachvotnikaŭ va ŭzroście 65-85 hadoŭ, jakich vypadkovym čynam raźmierkavali na adnu z troch prahram praktykavańniaŭ roznaj intensiŭnaści: nizkaj (uklučali praktykavańni na raŭnavahu, raściažku i ruchalnuju funkcyju); siaredniaj (chutkaja chada na biehavoj darožcy) i vysokaj (čatyry cykły biehu na biehavoj darožcy z nahruzkaj, blizkaj da maksimalnaj). Usie ŭdzielniki na praciahu šaści miesiacaŭ naviedali 72 sieansy zaniatkaŭ.
U čas trenirovak, a taksama na praciahu piaci hadoŭ paśla ich kožny miesiac udzielniki prachodzili testy na kahnityŭnyja zdolnaści i bijamarkiory. Akramia hetaha ŭ pačatku, praz 6, 12 miesiacaŭ i 5 hadoŭ, usim było zroblena MRT-skanavańnie mozhu.
Vyniki pakazali, što praz 6 miesiacaŭ tolki ŭ hrupy dobraachvotnikaŭ, jakija zajmalisia pa prahramie vysokaj intensiŭnaści, było vyjaŭlena značnaje palapšeńnie funkcyj hipakampa — zony mozhu, jakaja adkazvaje za navučańnie i pamiać dy najbolš uraźlivaja dla niejradehienieratyŭnych źmienaŭ.
Taksama nazirałasia admiena pamianšeńnia abjomu niekalkich rehijonaŭ mozhu, uklučajučy i hipakamp, jakija zvyčajna adbyvajucca z hadami, palapšeńnie funkcyjanalnaj suviazi pamiž niekalkimi niejronnymi sietkami.
Vučonyja adznačajuć, što hetyja stanoŭčyja źmieny zachavalisia i praź piać hadoŭ paśla pačatku zaniatkaŭ. Pry hetym jany nazirałasia navat u tych ludziej, jakija pierastali vykonvać praktykavańni.
Jak śćviardžajuć aŭtary, ich adkryćcio moža dapamahčy ŭ raspracoŭcy rekamiendacyj pa fizičnych praktykavańniach dla pažyłych ludziej, a dalejšyja daśledavańni dazvolać acanić roznyja typy praktykavańniaŭ, jakija možna ŭklučyć u prahramu dohladu ludziej u hadach.
Ciapier daśledčyki vyvučajuć hienietyčnyja faktary, jakija mohuć rehulavać reakcyju čałavieka na fizičnyja praktykavańni, kab zrazumieć, ci mahčyma vyznačyć, u kaho jany vykličuć stanoŭčy efiekt, a ŭ kaho nie.
Taksama vučonyja płanujuć praciahnuć daśledavańni mahčymaści vykarystańnia bijamarkioraŭ u jakaści dyjahnastyčnaha instrumienta ŭpłyvu fizičnych praktykavańniaŭ.
Ciapier čytajuć
U Hrodnie vypadkova spynili fihuranta kryminałki za 2020 hod. Jon złamaŭ ruku milicyjanieru i sihanuŭ u raku2
Kamientary