Staŭ viadomy prysud za danaty mieniedžaru farmaceŭtyčnych kampanijaŭ Siarhieju Šelehu. Jon uražvaje
Jamu dali bolej, čym mnohim dajuć za zabojstva.
![](http://nashaniva.com/img/w840d4webp1/photos/z_2024_08/out-2024-08-14t155526973111-b4pda.jpg.webp)
Pravaabaroncy źviarnuli našu ŭvahu na toje, što staŭ viadomy vynik suda nad mieniedžaram farmaceŭtyčnych kampanijaŭ 63-hadovym Siarhiejem Šeleham.
Prysud — vosiem z pałovaj hadoŭ kałonii ahulnaha režymu. Maksimalny termin, jaki jamu mahli dać za «finansavańnie teraryzmu» razam z «finansavańniem ekstremizmu» — dvaccać hadoŭ kałonii.
Za zabojstva ŭ Biełarusi minimalny termin — šeść hadoŭ kałonii. A kali vy pjany ździejśnicie śmiarotnaje DTZ, u jakim zahinie čałaviek, to maksimalny prysud — siem hadoŭ kałonii.
Siarhiej Šeleh atrymaŭ adzin z najbolšych terminaŭ za danaty ŭ Biełarusi. Bolš za jaho atrymaŭ tolki minčuk Mikałaj Vasilevič — 9,5 hoda kałonii.
Padrabiaznaści spravy nieviadomyja, ale z prykładaŭ viadoma, što takija terminy dajuć za danaty na Uzbrojenyja siły Ukrainy abo Połk Kalinoŭskaha.
Siarhieju Šelehu 63 hady, i znajści jaho atrymałasia ŭ raskładach sudoŭ dziakujučy prajektu DIT.
Šeleh naradziŭsia i ŭsio žyćcio pražyŭ u Biełarusi.
Paśla ŭniviersiteta pracavaŭ daśledčykam u Instytucie hiematałohii ŭ Minsku, u 1995-m pierajšoŭ u francuzskuju farmakałahičnuju firmu Rhone-Poulenc Rorer na pasadu mieniedžara pa prodažach.
Z 2002 pa 2005 jon byŭ dyrektaram pa miedycynskaj častcy kampanii Hłobałfarma. Paśla pierajšoŭ u kampaniju Sanofi-Aventis (ciapier — prosta Sanofi) na pasadu dyrektara. Na 2022 hod mužčyna byŭ kiraŭnikom kirunku dženzajm — jon śpiecyjalizujecca na redkich chvarobach kryvi, ankałohijach, raśsiejanym sklerozie i imunałohii.
U 2023 hodzie Siarhiej pierajšoŭ u «Navamiedyku». Heta bujnaja kampanija, jakaja zajmajecca optavym handlem farmaceŭtyčnymi vyrabami, a taksama maje ŭłasnuju kliniku ŭ Minsku.
U Siarhieja jość 10-hadovy syn.
Siarhiej zachaplajecca padarožžami i abjeździŭ šmat krain śvietu.
Sud nad im adbyŭsia 22 sakavika 2024 hoda. Jaho abvinavačvali pa troch artykułach KK — «finansavańnie ekstremisckaj dziejnaści» (č. 1 i č. 2 art. 361-2 KK), «finansavańnie ekstremisckaha farmiravańnia» (art. 361-2, straciŭ siłu ŭ mai 2021) i «finansavańnie terarystyčnaj dziejnaści» (č. 2 art. 290-1 KK). Pa sumie pakarańniaŭ jamu mahli prysudzić da 20 hadoŭ turmy, pryčym minimalny prysud — siem hadoŭ turmy.
Sudziła jaho sudździa Nastaśsia Papko. Jana bolš za 10 hadoŭ vynosić palityčnyja prysudy, ale asabliva aktyŭna — z 2020 hoda.
Papko prysudziła 5 hadoŭ błohieru Mikałaju Dziadku, 4 hady šmatdzietnaj maci Volzie Załatar i ad 8 da 15 hadoŭ šaści fihurantam spravy «Busły laciać». Ahułam jana asudziła bolš za 30 čałaviek na bolš čym sotniu hadoŭ kałonii.
![](http://nashaniva.com/img/w732d4webp1/photos/z_2024_08/judge_77511-filzl.jpeg.webp)
5 lipienia 2024 hoda adbyłasia apielacyja pa spravie, i prysud ustupiŭ u siłu.
«Naša Niva» — bastyjon biełaruščyny
PADTRYMAĆ
Kamientary