Rasijskuju «Sotu», jakaja močyć Cichanoŭskuju, spansiruje aliharch Nieŭźlin
«Sota» nazyvaje «infarmacyju pra ŭpłyŭ adnaho sa sponsaraŭ» chłuślivaj.
Fond pa baraćbie z karupcyjaj Alaksieja Navalnaha vypuściŭ rasśledavańnie, pryśviečanaje asobie rasijskaha multymiljaniera Leanida Nieŭźlina. Jašče z 1990-ch jon byŭ pravaj rukoj Michaiła Chadarkoŭskaha. U Rasii jaho prysudzili da pažyćciovaha źniavoleńnia — nibyta za arhanizacyju zabojstvaŭ. Nieŭźlin žyvie ŭ Izraili i sprabuje ŭpłyvać na palityku na postsavieckaj prastory. Ciapier ža, jak śćviardžaje kamanda Navalnaha, Nieŭźlin arhanizavaŭ napadzieńnie na rasijskaha palityka Leanida Vołkava.
Čytajcie: Rasijski multymiljanier Nieŭźlin moh być arhanizataram napadu ŭ Vilni na Leanida Vołkava, paplečnika Navalnaha
Siarod inšaha rasśledavalniki zhadali ŚMI, padkantrolnyja Leanidu Nieŭźlinu. [Infarmatar raskazaŭ], «jakich mienavita žurnalistaŭ Nieŭźlin sabie skupiŭ, pra jaho kišennuju Sota Project — heta taki telehram-kanał-pamyjka, jaki, zdajecca, isnuje tolki dla taho, kab mačyć Fond pa baraćbie z karupcyjaj», — raskazvaje viadučaja Maryja Pieŭčych.
Admietnaść situacyi ŭ tym, što Sota Project — badaj adziny papularny rasijski ŚMI, jaki aktyŭna i paśladoŭna aśviatlaje biełaruski paradak dnia. Pryčym rytoryka vydańnia vidavočnaja — metanakiravanaje zmahańnie sa Śviatłanaj Cichanoŭskaj i sproby dyskredytavać jaje. Telehram-kanał staŭ hołasam apanientaŭ lidarki biełaruskaj apazicyi.
Haračaja stadyja pačałasia paśla taho, jak śpiecyjalnym karespandentam vydańnia stała błohierka Beła Foks, zaciaty krytyk Cichanoŭskaj.
Na staronkach Sota Project dastajecca i «Našaj Nivie», i «Zierkału». Spačatku niezaležnyja biełaruskija vydańni nazyvalisia «padkantrolnymi Cichanoŭskaj», ciapier abranaja inšaja, bolš miakkaja farmuloŭka, «łajalnyja Cichanoŭskaj».
A ŭ čym pazicyja samoha Nieŭźlina pa Biełarusi? Jon pierakanany, što padčas pratestaŭ-2020 apazicyi treba było padrychtavać ludziej sa zbrojaj i infiltravać ich u natoŭp. Tady b, na dumku rasijskaha miljaniera, pratestoŭcy zmahli ŭvajści ŭ prezidencki pałac i ŭziać uładu ŭ ruki. A voś Cichanoŭskuju i jaje kabiniet Nieŭźlin ličyŭ niazdatnymi dla realizacyi siłavoha scenaru. U hetym i možna bačyć asnoŭnuju pryčynu jaho — i padkantrolnaj jamu Sota Project — zaciataj krytyki Cichanoŭskaj.
Sota Project adreahavała na rasśledavańnie Fonda pa baraćbie z karupcyjaj. U dopisie ŭ telehram-kanale suviaź ź Nieŭźlinym nie admaŭlajecca, ale «ŭ čarhovy raz fiksujecca fakt raspaŭsiudu chłuślivaj infarmacyi pra ŭpłyŭ adnaho sa sponsaraŭ na pracu redakcyi».
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary